Ducas 9:26 - El Nuevo Testamento en matsés

²⁶ Esus tantiaquin aidën chiaid tantiaquid nebi, quebuedi utsibo dacuëdënquin umbi chiaidbëta ubi tantiaquin chuitiapimbocquid iquendac. Adquid icsho issun adembidi Matsesën Tishaid icshobi Nuquin Papa nadatiambocquidquio icquin abitedishun Icbombo icmiac Nuquin Papabëd icquid bëdambocquidobëd choshon umbitsen: Ubi tantiaquid nec, cauatiapimbo iquendabi.

Ducas 9:26 ပူးပေါင်းရင်းမြစ်များ

Mateo 16:27

Matsesën Tishaid yec Nuquin Papa yacnouësh cun Pabëd icquidobëd bëchamauanquiec choshon Nuquin Papan abitedishun Icbo icmiaid icquin matses cuidte chiendambi. Nuquin Papa tantiec bëdambuec tabadquid icsho aidbëd tabadmequimbi Nuquin Papa tantienquio yec icsambuen naic tabadquido icsho natiamequin cuidendambi.

Mateo 25:31

Adshumbic Esusën padpiden abi chote chuiuapondash: Matsesën Tishaid yec abi yacnouësh abëd icquidobëd choec: Abitedishun Icbombueni nec, quiash bëchamauampambuec choequi cun tsadte dapa bëdamboshëcquidën tsadtoquin abitedimbo ismendambi.

Mateo 26:64

Esusën: Ai, mimbi chiaidquiobi nebi. Tantia. Mibitedi chuinu. Matsesën Tishaid yec abuc niduash Nadatiambocquidën dayun abiucquio tsadsho mimbi isendac. Adembidi abucuësh abu ushu yacno ubi chouasho mibitedishun isendac, quepanëdash Esus.

Madcos 8:38

Esus tantiaquid yec ambi chiaid tantiaquid nebi, quequid icquimbi ubi tantiesabo icsambuec tabadquido dacuëdënquin ubi caic: Aid tantiaquid nebi, catiapimbocquid icsho isash nadendabi. Matsesën Tishaid icshobi Nuquin Papa nadatiambocquidquio icquin abitedishun Icbombo icmiac Cun Pabëd icquido bëdamboshëcquidobëd choshon nidaidënshun umbitsen: Nëid ubi tantiaquid nec, cauatiapimbo iquendabi, quepanëdash Esus.

Uanën dada uaid 12:43

Mabi cun matsesën bëdambuen isnu, quequinuidtsëqui tantiaquin aden chuitiapimbo icpanëdash. Ma Nuquin Papan ubi bëdambuen isnu, quetiadquidi adenquio icpanëdash.

Uanën dada uaid 5:44

Matses: Mibi bëdambo iquec, cameteuidi bunquin Nuquin Papambo mibitedishun tantienquio iquec. Aden Nuquin Papa: Mibi bëdambo iquec, mimbi cametiapimbo iquec, quepondash Esus.

Hechos 10:22

Adoaquien: Codnedio cuëmëdquidën chomiaid nebi. Aidi sondado dadpenshun chuiquid yec bëdambocquidquio nec. Adquid icquin Nuquin Papan chiacpaden nabansho issun isadaidbon bëdambuen isaidquio nec. Aidi Nuquin Papabëd icquidën naden chuipaccosh: Simon Petedo bedtan, cata. Bedtanac choshon chuibansho tantiata, quequin Nuquin Papabëd icquidën chuiposhi, quequin Codnedion ubitedi chuiuaposhi, quepanëdash Codnedion chomiaido Petedo chiec.

Doma 1:16

Esusën naid Chiaid Bëda nadatiambocquin Nuquin Papan tantiametequid nec, quequin chuibanac: Abimbo caic, quequin tantiaquido Nuquin Papa yacno tabadendac. Adquid icnuc Esusën naid dacuëdenquio icquin chuibennec nebi. Aden abia chuibanac: Abimbo caic, quequin tantiaquido isadaidbo icnuc adembidi tantiaquido matses utsibo icsho Nuquin Papan abëd tabadmendac.

Codinto 2 12:10

Aden tantiec cun dada icsambo icnubi bëdambo icquin abi Esuquidistu chuibennec capuebi. Icsambuen chuiquin mamënshunaqui abi Esuquidistu chuibennec capuebi. Bunequi adecbidi capuebi. Utsin: Mibi natiamequin ënmembi, caqui adquiecbidi abi Esuquidistu chuibennec capuebi. Utsin natiamequin mëyanaqui adquiecbidi capuebi. Adquid icnuc umbibi natiapimbo icsho issun Nuquin Icbon nadatiambocquin namiac ëntiapimbocquin chuibennec capuebi.

Cadasia 6:14

Ubien tantiesabimbuec: Ubiuidtsëqui bëdambocquid nebi, quetiapimbo iquec. Adenquio yec Nuquin Icbo Esuquidistu cueste napotiaidën dectanaidquio tantiec: Bëdambocquid nebi, caimbi. Adec Esuquidistu tantiec ubi bunaid ënash icsate bunenquio iquebi. Adsho issun utsibon umbi Esus tantiaquin nasho tantienquio iquec. Adec Esuquidistu cueste napotiaidën diadec uënëspanëdash, quequin tantiec Esus tantiesabon nacpadombuen nainquiocquin umbi icsambuen naid ënash icsate bunenquio iquebi.

Timoteo 1 5:21

Esuquidistubëtan Nuquin Papan nuqui isec. Adembidi Nuquin Papabëd icquidon nuqui iseque. Umbi chuibocpadombuen nata. Min matsesën mimbi tantiaidënquiobi Nuquin Papan Chiaid niacacsho adembidi: Mimbi icsambuen naique. Padi, cata. Shubu utsin icquidon Nuquin Papan Chiaid niacacsho adembidi: Cun matses umbi tantiaidquio neque. Chienquio iquembi, cainda.

Timoteo 2 1:12

Aden chuibenneshobini chieshënquin natiamequin quënën tsadumpondash. Adoaqui dacuëdenquio yec chieshtotiapimbo icquin Esus tantiembi. Umbi tantiaidquio nadatiambocquin nabanquidquio Esus nec. Adquid icquin: Umbi naid chuibanenquio yannushe, queshun abi tantiamequin Esusën ubi chieshtomenquio iquendac. Aidëmbi nidaidën choabi icquin abi chuibanquid chieshtoenquio icquid ubi icmendac, quec dacuëdenquio iquebi.

Timoteo 2 2:12

Aden chieshënquin natiamiaqui chieshtoenquio icquin abi tantiec uënësacsho Esusën ambi namiacno tabadmendac. Esus tantiaquidpenquio nebi, quequid icsho: Adembidi Umbi tantiacmaido nec, quequin Esusën Nuquin Papa chiendac.

Ebedeo 11:26

Iuecshun Nuquin Papa yacno iuedac bëdambo iquendabi, quequin tantiaquin Equipito yacnocquidon bëdamboshëcquid meniaid isuidpampic naden tantiaquin: Nuquin Papan Quidistu Mesias caid chomiacsho matsesën icsambuen chuishunte yacpadombuembidi ma matsesën nëbi ubi icsambuen chuishunnu, quequin tantiec: Nuquin Papan cun matses caidobëd mëyamëdebi, quepampic.

Ebedeo 13:13

Adoaid yec Esusbëd icquid nebi, quiash umanuc buansho isash aidbëd nidacbimbuecquid icnuna. Adquid icsho issun Esuquidistu tantiesabon: Mibi icsamboshë iquec, quequin Esus chieshënnëdacpadombuembidi nuquitsen chieshënendac.

Udas 1:14

Adquido icsho cun tsusedpa Enoc caidën chuipampic. Aidi abia matses uaid Adanën madon baban tishmiaidën baba Enoc nepampic. Aidëmbi naden chuipampic: Nuquin Papabëd icquido dadpenquioshë tamëdtiapimbo icquido Nuquin Icbobëd chosho issun

Esusën Uan ismiaid 1:7

Esuquidistu abu ushu yacno choendac. Adec chosho matses abitedishunquio isendac. Aden cun matsesën ambi mëyanquin uënës uameshun ambi podo ansebuedquio Esus chosho isendac. Padtemboshë, ashibi cuidpec, quetanec abi cuidte tantiec dacuëdec natiaquiec shubiendac. Esus tantiesabo utsibotsen adecbidi abi cuidte tantiec natiaquiec sedenquec shubiquiendac. Adtequidquio iquendac. Amen.

Esusën Uan ismiaid 20:11

Adshumbic padpiden matses cuidte ismeposhi. Aden ismiac tsadte tapa ushumboshë icquidën Nuquin Papa tsadsho ispombi. Icsambuen naquido cuidquidquio yec dacuëdampambuec Nuquin Papa isadnuc abubëdi nidaid abichobi nibëdquio yamposh, padpidec isadtiapimbo yec.

Esusën Uan ismiaid 21:8

Adoshombic nadquidtedi cuidendambi. Nëidic dacuëdquin ubi tantiauidbuedo. Nëidic Esus tantiesabo abitedi. Nëidic chieshëmënquido. Nëidic chieshëmënec cuessunnianquido. Nëidic aton dada utsibëdi chichudnanquido. Nëidic chido daëd dachudnanquido. Nëidic aton chidopenquio chudquido. Nëidic aton bënëpenquio chudmequido. Nëidic nënëchoquido. Nëidic ambibi nacnenaidi papa caquin tantiaquido. Nëidic mua uanquido. Aidotedi chian dapa ënëdenquio yec annëdënquequid icsamboshë nuadquid asupede caid padpidec uënëste caid yacno nësecaindambi, queposh.

Esusën Uan ismiaid 3:5

Mayan Icsa Satanasën: Icsamenu, caqui chieshtoenquio icquin ubi ënenquio icquin tantiaquid icsho ubëdi tabadmequin dashcute ushumbocquid dasiuinquin icsaisa icmendambi. Adoshon aidon cuëmëdquid cuëmëdquidquien dadauate dapan aidon cuëmëdquid uquenquio iquendambi. Adoshon: Nëido ubi tantiaquidotedi neque. Nuquibëd tabadmenuna, Papa, quequin chiendambi Nuquin Papabëd icquidon tantianuc.