Doma 8:39 - El Nuevo Testamento en matsés

³⁹ abuc nidacsho cuëshëdmenquio icquinc, nidaid ëquëducquio nidacsho cuëshëdmenquio icquinc, Nuquin Papan uaid utsi abitedishun cuëshëdmenquio icquinc nuqui caindac. Nuquin Papan nuquitedi bëdambuen tantiaido icsho ënenquio icquin Nuquin Icbo Esuquidistun nuquitedi cuëshëdmenquio iquendac.

Doma 8:39 ပူးပေါင်းရင်းမြစ်များ

Mateo 24:24

Adquid uëshë icnuc: Nuquin Papan Chomiaid Quidistu nebi, quec muaquid utsi utsiec yanendac. Adecbidi: Nuquin Papan oncamiaid nebi, quec muaquid utsi utsiec iquendac. Aidon: Ubi tantiaquid icmenu, quequin ubi chieshënquidombi nadatiambocquin nabanquin ismendac. Adosho issun Nuquin Papan tantiamiaidonquiobi utsin utsinquien ubi tantienquio ictsenendac.

Uanën dada uaid 16:27

Nuquin Papan mibitedi tantiaquin Abi chiannesho mibi nashunendac. Nuquin Papa yacnouësh chondaid Esus nec, quequin Ubi tantiaquidquio mibitedi icsho Cun Pan mibi tantiaquioquin nashunendac.

Uanën dada uaid 17:26

Aden Mibimbo tantiamenuec iuec ubëd icquidobëd tabadquin mimbi chiaidquio chuibanombi. Adembidi ënenquio icquin ubi tantiaquido tantiamendambi. Ënëdenquio yec aidobëd iquendabi. Adshobi abentsëc yacbimbuec mibëd ubi tantiananquiacpadecbidi aido utsibëd tantiananmeta, Papa, quequin Esusën Nuquin Papa chuipondash.

Uanën dada uaid 3:16

Adashic Esus: Matses abitedimbo tantiaquidquio icquin Nuquin Papan aton Mado abentsëqui abided cuidmequin uënës uasho ubi tantiaquid cuidenquiocquin abi yacno ubëd ënëdenquiocnoc tabadmendac.

Doma 11:33

Nuquin Papa abitedimbo tantiaquidquio yec bëdamboshëcquid nec. Adquid icquin ambi natiapimbo ictequid nibëdnuc bëdambuen naquidquio nec. ¿Ada adquid icsho matsesën: Aden nac icsambo iquec. Naden nac bëdambo iquec, quequin Nuquin Papa chuipadic? Padenquio. Ambi naidtedi matsesën tantienquio iquec.

Doma 5:8

Padnuen matses abitedimbo icsambuenuidi naic tabadnuc nuquitedi cuidmenquio icnuec Esuquidistu abided cuidadec uënëspanëdash. Nuquin Papan nuquitedi tantiaquiec, matses camenuen aden Esus namepanëdash.

Doma 6:23

Icsambuen naic tabadec uënësacsho Nuquin Papan ënenquio icquin cuidacno nësecaindac. Padnuen Nuquin Icbo Esuquidistubëd abentsëc yacbimbuec tabadquid icsho Nuquin Papan ënenquiocquin abëdi tabadmendac.

Doma 8:1

Nëbi Esuquidistubëd abentsëc yacbimbuec tabadquid icsho Nuquin Papan nuqui cuidenquio iquendac.

Doma 8:35

Esuquidistun tantiaido icsho ¿tsuntsin nuquitedi Esusbëd cuëshëdmepec? ¿Natiamiac mëyadsho issunda Esuquidistun nuquitedi tantienquio icquin cuëshëdmepec? Padenquio. ¿Natiec tabadshoda Esuquidistun nuquitedi tantienquio icpec? Padenquio. Utsibon chieshënaid icsho bëdambuen isquinc pete nibëdnuc bunsho bëdambuen isquinc dashcute nibëdsho bëdambuen isquinc: Badedquio uënëstsiabi, quec dacuëdec tabadsho bëdambuen isquinc chieshëmënquidon: Badedquio cuessunnenu, casho bëdambuen isquinc caquin Esuquidistun ënenquio icquin nuqui tantiec.

Codinto 2 11:3

Umbi chuibanac Esuquidistu tantiabuedombi nisi bëdambo isadacbimbuecquidën muaquin chiac Eban Nuquin Papan Chiaid niacquin tantienquio icpampicpaden muaquin chuibanac mimbi Esuquidistu tantienquio yampanundac, quec natiec tsadebi.

Codinto 2 2:11

Aden nainquiocsho issun nuqui chieshënquid Mayan Icsa Satanasën nuquitedi icsa uabudnushe, queshun ambi icsambuen naid ëmbued bëdambuen isquin puduedmeta.

Epeso 1:4

Ëndenquimbo abitedi uabi yequi Nuquin Papa nadpampic nuquitedi caic: Nëidtedquio Esuquidistu tantiaquido icsho Umbi: Cun matses nec, caido icsho icsambuen naisabimbuecnuc bëdambuen isendambi, quequin Nuquin Papan tantiapampic. Aden nuquitedi tantiaquioquin

Pidipos 3:12

Tantia, cun utsibo, mibitedi chuinu. Nuquin Papan Chiaid niaquesambo nebi ¿quectabi ique? Abitedimbo tantiabenombi, ¿quectabi ique? Padenquio. Aden tantienquio yec abipadquid bëdamboshë icmenuen abided cuidadquid icquin Esuquidistun tantiamiondashi, quequin aid tantiec bëdamboshë icte bunquiebi.

Pidipos 3:3

Shui dëbid dëtemequidbimbuecquido yec nuquitedi Esus tantiaquidombo nec. Adquido icsho aton Mayanën tantiamiac Nuquin Papa tantiaquido nuqui nec. Adash: Esuquidistuna nebi, quiash nuquitedi cuishonquendac. Aden tantiaquid icquin: Shui dëbid dëtemequin Nuquin Papa bëdambuen ismembi, quetiapimbo nuqui iquec.

Pidipos 3:8

Nëbi Cun Icbombo Esuquidistu tantiec bëdambo iquebi, quequin tantiembi. Aiduidtsëqui tantiate bunquin icsa sandoshon secacbimbuen umbi tantiacpadombuen nabanaidtedi ënondambi.

Tesadonica 2 2:4

Aid chuiquid tapa yanashic: Utsibon papa quequin tantiaid nibëdec, quendac. Nuquin Papa dëniacte bunquiec Nuquin Papa tabadte shubu dapan puduedshun: Nadatiambocquid yec ubi nashunquidquio nec, quequin mimbi Nuquin Papa caid nibëdeque. Ubiuidtsëqui papa cata, quequin chuiquid tapan tsadten tsadquin matses abitedimbo namendac.

Uan 1 4:16

Naden nuquitedi tantiec: Tantianquidquio icquin Nuquin Papan nuqui tantiec. Adecbidi aton matsesbëd tantiananquidquio yec Nuquin Papabëd cuëshëdenquiocquid nec. Adecbidi nuquibëd Nuquin Papa iquec.

Uan 1 4:19

Nuqui tantiaquidquio icquin Nuquin Papan tantiamiac aid tantiaquid yec utsibobëd tantiananquidombo nuquitedi nendac.

Esusën Uan ismiaid 12:9

Aden cuenmiaquien matses tabadacno nidaidën nisi dapabimbuecquid aton iuabobëdi budbudposh. Aidi ëndenquimboshë icpampid Mayan Icsa cashumbic Satanas quequin cuënaid neposh. Aidëmbi nëbi matses abitedimbo mua uaquin icsamequin iuate bunquiec.

Esusën Uan ismiaid 13:14

Aidën namiacpadombuen nadatiambocquin nabanquin muaquin ismiaqui matses dadpenshun: Abimbo caic, quequin bëdi dapabimbuecquid acte ëquëducuësh chobuedën chiacpadombuen nabededposh. Aton chuiquid tantiamequid nidaid ëquëducuësh chobuedën: Nuquin chuiquid tapa chështen cuesac uënëstiadtsëcquio icsho bëdanmebued tantiaquin aidbimbuecnuc nuamboshë isadnuc nacnenta, cac matsesën nacnemposh.

Esusën Uan ismiaid 19:20

Adshobien acte ëquëducuësh chobued aben icquid tapa icsamboshëcquid bedposh. Adotanquimbic aid tantiamequid nidaid shëcuënuësh chobued muaquin oncamiaidtsen bedposh. Aidi nadatiambocquin nabanquin muaquin aton chuiquid tapa icsamboshëcquidën chiacpadombuen matses namequidquio neposh. Adec muaquin aton chuiquid tapabimbuecnuc nacnenmequidtsen neposh. Adecbidi: Cun chuiquidën iuabo nec, quequin matses dadpen bësiadmequimbi mësiadmequid neposh. Adec icsamianquidquio icsho bedposh. Aton chuiquidbëta bedshun cuessunniambobi ënëdenquio yec chian annëdënquequid icsamboshë nuadquid yacno nësecaposh.

Esusën Uan ismiaid 2:24

Tantia. Tiatida yacnocquidobëtabi ubi tantiaquidombotsen chuinu. Mayan Icsa Satanasën tantiamiac: Matsesën tantiatiapimbo yaid umbi tantiaid mimbi tantienquio iquec, quesho mimbi tantiashunenquio icpoc. Adshumbic aidën chuimiaidën chiacpadombuen mimbi nainquio icpoc. Aden bëdambuen nasho issun mimbi icsambuen naid utsi chienquio iquembi.

Esusën Uan ismiaid 20:3

Adotanquin aidën iuabo tabadacno shëcuë ëquëducquiocquid anneposh. Adoshombic puduentiapimbo icnuc chuiquidën dada uaid bëbitaccaquin shëcuë bëtashquioposh. Seta dadpenquio midtedi matanmeshun bëtashaid chicquin badedquio puduenmenumbi adoposh. Aden seta midtedi matanmiabi icquin abi uidën uactedembi nidaid utsi utsiec yacno tabadquidtedi matses mua uaquin icsametiapimbo iquec, queshun chicten bidiacquin uidën uaquioposh.

Esusën Uan ismiaid 20:7

Adshumbic seta midtedi matanmeshun ambi uidën uampidi Mayan Icsa Satanas caid chiquendac.