Doma 6:13 - El Nuevo Testamento en matsés

¹³ Icsambuen nabanec tabadec uënësacbimbuec nuquitedi icpondac. Adquid icbuedëmbi uincuenacbimbuen Nuquin Papa tantiabenshun icsambuen naic tabadenquio icquin aid bunacpadombuen naic bëdambuec tabadnuna.

Doma 6:13 ပူးပေါင်းရင်းမြစ်များ

Ducas 15:24

Cun mado uënësacbimbuec icbuedi nëbi ubëdi tabaduaic. Aidi bënnudacbimbuec icbuedi nëbi istuidacbimbuec choash iqueque, cac bacan bacuë bënë nuambo tsënënaid cuessunneshun codocacsho cuishonquec tabadquin pebededposh.

Ducas 15:32

Min utsi uënësacbimbuec icbuedi nëbi choash tabaduaic. Aidi bënnudacbimbuec icbuedi nëbi istuidacbimbuec chosh, quequin aton papan aton mado bëyucquid chuiposh, quepanëdash Esus.

Uanën dada uaid 5:24

Tantia. Mibi chuinu. Umbi chiaid tantiaquidën ubi chomiondaid cun Pa tantiaquid icsho cuidenquio icquin ubëdi tabadmendambi. Cuidtequid icbuedi ubi tantiabenash ubëdi tabadtequid yanendac, quepondash Esus.

Doma 1:29

Aido nadquido nec. Nëidic utsi icsambuen nambo icquidobi muaquin cuidmequido. Nëidic icsambuecshë tabadquido. Nëidic aton chidopenquio chudquido. Nëidic aton bënëpenquio chudmequido. Nëidic dada aton dada utsibëdi chichudnanquido. Nëidic chido aton chido utsibëdi dachudnanquido. Nëidic dadpen bunquin bedquido. Nëidic chieshëmënquido. Nëidic utsina isash natiambo bunec chieshëmënquido. Nëidic cuessunnianquido. Nëidic chushcananquido. Nëidic muaquido. Nëidic icsamboshë icquido. Nëidic utsibo icsaiduidi chuiquido.

Doma 12:1

Tantia, cun utsibo, Nuquin Papan cuidte bunenquio icquin bëdambuen isaido icsho mibitedi chuinu. Abi bunaidquio obeca bëdambocquid pichicaquin ismiacbimbuen: Umbi nate bunaid nainquiocquin mimbi nate bunaid bunebi, Icbo, quequin Nuquin Papa chianneta. Aden chiannec Esus tantiec iccuededtequid nendac.

Doma 6:11

Adembidi icsambuen naquido icbuedi uënësacbimbuecquid nebi, quequin mibitedishun tantiata. Adbuedi nëbi mibitedi Nuquin Papa bëdambo icmenuec Esuquidistubëd abentsëc yacbimbuec tabadec.

Doma 6:16

Mibitedishun naden tantiec: Icbon chiacpadombuen iuan nabanquid nec. Adquid icnuc ambi tantiacpadombuen icsambuen nabanec tabadec uënësacsho ënenquio icquin cuidacno nësecaindac. Padnuen ambi chiacpadombuen naic tabadsho Nuquin Papan icsaisabimbuenuc bëdambuen isaid mibi iquendac.

Doma 6:19

Matses icquin umbi chuibanac tantiadenquio iquec, nëidon canushe, queshun bëdambuen tantiamenuen cuembo mibitedi chuibanembi. Nuquin Papan Chiaid niacquin icsambuen nateuidi bunquiec mibitedi icsaded icsadedpondac. Adec tabadbuedi nëbi Nuquin Papa tantiabenshun aidën chiacpadombuen naic bëdambuec tabadta.

Doma 7:23

quebuedi icsambuen naquid yec ubibi bëdambuec tabadtiapimbo iquebi. Quënën tsadunacbimbuen umbi icsambuen ëquëducshun tantiaquin naid ëntiapimbo iquebi.

Doma 7:5

Esus tantiabi yec nuqui bunacpadenuidi naic icsapadennec. Aden nainda, quequin Nuquin Papan Moises chuiquin dada uamiampid tantiashi: Adequi icsate bunquiebi, quiash nuquitedi icsaquiopadennec. Adquid yec uënësacbimbuec icsho ënenquio icquin cuidacno nidmequin nuqui nësecatsempondash.

Codinto 1 6:15

¿Abi tantiaquid yec Esuquidistubëd abentsëc yacbimbuec tabadquid nebi, quequin tantienquioda mimbi icpe? ¿Aidbëd abentsëc yacbimbuec tabadbuedi icsambuen naic piucquid bedec chudadquidbëd daëdash abentsëc yacbimbuecta tabadtiad? Padenquio ictiad, caimbi.

Codinto 1 6:20

Nuquin Papan piucquid dadpen menequin bedshunacbimbuen ambi tantiamiaido yec aidëna mibitedi nec. Adquido icquin aidën chiacpadec bëdambuec tabadquin Nuquin Papa tantiata.

Codinto 1 6:9

¿Icsambuen naic tabadquido Nuquin Papan namiacno tabadtiapimbo iquec, quequin tantienquioda mimbi icpe? Mua uadenda. Nadquidtedi Nuquin Papa yacno tabadtiapimbo iquendac. Nëidic piucquid bedec chudadquido. Utsibic ambibi nacnenshun papa caquin tantiaquido. Utsibic aton bënëpenquio chudmequido. Utsibic aton chidopenquio chudquido. Utsibic chido daëdi dachudnanquido. Utsibic dada daëdi chichudnanquido.

Codinto 2 10:4

Mibi yacno nidshun matsesën tantiacpadempenquio Nuquin Papa nadatiambocquidën tantiamiacpaden umbi Ambi Chiaid chuibannubi Mayan Icsa Satanasën icsambuen tantiamiac ubi chieshënec icsambuec onquequidon icsambuen chuibanaid Nuquin Papan ënmendac.

Codinto 2 5:14

Esuquidistun tantiaid icquin ënenquio icquin naden chuibanquid nebi. Matses abitedi tantiec abided cuidadec Esuquidistu abentsëqui uënëspanëdash. Adquid icnuc uënësacbimbuen aid tantiaquid icquin nuqui bunaid nainquio iquendac, quequin nuqui tantiec.

Codinto 2 5:15

Adec matses abitedi cuidmenquio icnuec Esuquidistu uënëspanëdash. Adashic uincuempanëdash, queshun aid tantiaquin uënësacbimbuen nuqui icsambuen nabambued ënshun nuqui tantiacpadombuen nainquiocquin Esusën chiacpadombuen nanuna.

Codinto 2 8:5

Adoac: Daëdpactsëc tantiatsiash, quequin umbi tantianubi ambi tantiactedi dadpen sambededpondash. Nademba chuishun napondash: Nuquin Icbombo tantiaquin nanuna, queshun Nuquin Papan tantiamiacpaden Pabadon chiacpadombuen nanuna, queshun ambi tantiactedi dadpen menequin sambededpondash.

Epeso 2:5

Adec tantianquid icquin icsambuen naic uënësacbimbuec tabadshobi nuquitedi tantiaquioquin Esuquidistubëta uincuemiacbimbuen abëd ictequido Nuquin Papan nuquitedi icmiac. Adec tantianquid icquin Nuquin Papan nuquitedi abi yacno tabadmendac.

Epeso 5:14

Bëdambuec tabadquin ismedenniac icsambuen nabuedëmbi bëdambuen tantiendac. Adquid chuiquin naden dada uanëdaid iquec: Mibi usheque. Isucun. Uënësaidotedi nidtome. Adquid icsho Esuquidistun mibi bëdambuen tantiamendac, quequin chuipanëdash.

Pidipos 1:20

Aid tantiec dacuëdenquio yanshun abi tantiasho Nuquin Papan icsambuen namenquio icquin bëdambuen isec. Umbi naondacpadombuen dacuëdenquio icquin Esusën naid chuibante bunec chieshtotiapimbo iquebi. Ma utsibon: Esuquidistu bëdambo iquec, canu, quiash uënësabi yec chieshtotiapimbo iquebi.

Codosas 2:13

Ënden Nuquin Papan matsespenquio icquin icsambuen naic tabadec uënësacbimbuec mibitedi icpanëdac. Adquid icquin Nuquin Papan ënden: Naden nata, quequin chiaid tantienquio icquin niacquido mibitedi icpanëdac. Adquid icbuedi Esuquidistu tantiaquid yansho issun: Ubëd tabadtequid nec, queshun mimbi icsambuen naidtedi tantienquio yec bëshunquin Nuquin Papan mibitedi bëdambuen isendac.

Codosas 3:5

Adec Esuquidistubëd tabadec bëdamboshëcquid iquendabi, quequin tantiaquin mimbi icsambuen nabanaidtedi cuessun secacbimbuen mibitedishun ëmbanta. Adshun: Umbi chudtemaid chudnu, quenquio icquin ënta dadan. Umbi chudmetemaid chudmenu, quenquio icquin ënta chidon. Aden natemaid bunmec dasiuidenda. Adembidi mimbi icsambuen nate bunaidtedi ënta. Adembidi mitsana dadpen bedteuidi bunaid ënta. Mimbi: Bednu, quequinuidi tantiaid matsesën ambibi nacnenshun: Papa, quequin tantiacbimbuecquid mibi bedte bunaid nendac.

Tesadonica 2 2:12

Aden Ambi Chiaidquio tantiatiapimbo icquin aid niacniaquec icsambuen nateuidi bunsho Nuquin Papan cuidquiendac.

Timoteo 2 2:15

Mimbi bëdambuen naoc, Nuquin Papa camenuen bëdambuen nata dacuëdenquio icquin. Umbi naid ma Nuquin Papan isnu, queshun adota. Ambi chiaid bëdambuen isban isbanshun chieshtoenquio icquin Nuquin Papan Chiaidquio chuibanta, mado.

Santiaco 4:1

¿Atotsi quiash Esus tantiaquido yequi mibitedi chieshëmënec chushcanante buncuededpe? Mibibi icsate bunacpadequi aiduidquio ënenquio icquin tantiabudequi chushcanante bunec chushcanancuededec. Adecbidi cuesnante yanendac.

Petedo 1 2:24

Esuquidistu nuqui icsaid bedshunash abided cuidadec cueste napotiaidën diadec uënëspondash. Nuquitedi icsaquido icbuedi ma icsaid ënash bëdambuec tabadnu, quiash uënëspondash. Adecbidi abi tantiaquido bëdambuen isnuec Esuquidistu mëyamëdpondash.

Petedo 1 4:2

Aden mimbi tantiacpadombuen nainquio icquin Nuquin Papan tantiacpaden nate bunquidquio mibitedi iquendac.

Uan 1 1:9

Padnuen Nuquin Papa chiec: Icsambuen naombique. Ubi bëdambo icmequin ubi bëdambuen ista, Papa, quesho tantiashun ambi chiacpadombuen naquin nuqui bëdambuen isendac. Nuqui icsambuen naidtedi tantienquio yec bëshunquin icsambuen naisabimbuecnuc nuqui bëdambuen isendac.