Doma 3:22 - El Nuevo Testamento en matsés

²² Aden ambi chuiquin dada uamiampicpadombuen nëbi abi tantiamequid Esuquidistu uidtsëqui tantiasho Nuquin Papan matses bëdambuen isec icsambuen naisabimbuecnuc. Isadaidbobëtambi matses utsibontsen Esus tantiasho adoendac.

Doma 3:22 ပူးပေါင်းရင်းမြစ်များ

Ducas 15:22

Aden chiaquien bëdambo yanshun aton iuabo naden aton papan chuiposh: Cun mado ëndenquio nidondaid choshe. Dashcute bëdaidquio bedshun cun mado dasiuinta. Adoshombic mëusudtetsen mëusunta. Adoshombic tapucudtetsen tasiuinta.

Hechos 11:12

Adec tabadnubi Nuquin Papan Mayan Bëdan chuiposhi: Aid cacuidenquio yec nidtan, quesho tantiash aidobëdi nidpobi. Adecbidi Ope yacnocquido dada 6ted Esus tantiaquidobëd nidec Codnedion shubun puduedpobi.

Hechos 15:9

Matses utsibo nec, quenquio icquin aidotsen Esus tantiamequin bëdambuen tantiamequiopondash.

Hechos 3:16

Esusën nëid bëdanmec, quequin umbi abimbo tantianubi nëid dada uishcash uesho mimbi isbededbuedi bëdanash bëdambuec capusho mibitedishun isec.

Doma 1:17

Esusën Chiaid Bëda chuibansho tantiashun Esus tantiaquid icsho Nuquin Papan bëdambuen isec, quequin nuquitedi tantiec. Naden chuiquin Nuquin Papan dada uamiampid iquec: Ambi chiacpadombuen naic tabadquin Abi tantiasho Nuquin Papan abëd tabadtequido icmendac, quequin dada uamepampic.

Doma 10:12

Nuquin Papan: Isadaidbo nec. Matses utsibo nec, quenquio icquin abitedishun Icbombo icsho matsesën: Ubi nashun, Papa, quequin abi chuisho tantiashun: Nashuntiapibi, quenquio icquin nashunendac.

Doma 10:4

Ënden Nuquin Papan: Naden nata, quequin chiacpadombuen matsesën nasho bëdambuen isembi, quedennedëmbi nëbi Esuquidistu tantiasho Nuquin Papan ambi chiampicpadombuen matses icsaisabimbuecnuc bëdambuen isendac.

Doma 2:1

Aden utsin icsambuen nabanaid chuisho tantiash: Adquid icsamboshë iquec ¿quequinda tantie? Adec: Utsibo icsambocquid nec, quebuedi mimbitsen aidon nacpadombuen icsambuen naic.

Doma 3:30

Abipadquid utsi nibëdnuc Nuquin Papa abentsëcquiobi iquec. Adquid icquin ambi chiacpadombuen isadaidbon Esus tantiasho: Nëid shui dëbid dëtemequid nec, quenquio icquin Nuquin Papan bëdambuen isec. Adembidi: Nëid shui dëbid dëtiacmaid nec, quenquio icquin Esus tantiasho bëdambuen isec.

Doma 4:16

Nuquin Papan naden Abadauan chuipampic: Abadauan, umbi chuisho tantiash: Abimbo mimbi caic, quesho mibi bëdambuen isquin: Min tsiuecquido: Ubi piucquid mene, cainquiocquin aid nidaid abitedi menendambi, quequin chuipampic. Aden chuiquin ambi cuidenquio icquin bëdambuen iste Abadauanën tsiuecquidotedi tantiametiadquio icpampic. Nuquin Papan: Naden nata, quequin chuiquin Moises meniaid bedshun isadaidbouidtsëqui chienquio icquin adopampic. Abadauambimbuen abi tantiaquido icsho bëdambuen isendac. Aden ambia Nuquin Papa tantiaquid yec Abadauan nuquitedishun papabimbuecquid nec.

Doma 8:1

Nëbi Esuquidistubëd abentsëc yacbimbuec tabadquid icsho Nuquin Papan nuqui cuidenquio iquendac.

Doma 9:30

Aden chiaid tantiash ¿atotsi nuqui quendac? Matses utsibon abi tantienquio icbuedombi ambi chiacpadombuen naquin tantiabensho icsaisabimbuecnuc bëdambuen isendac. Ambi chiacpadombuen naic tabadnu, quesabobi Nuquin Papan abi tantiasho icsaisabimbuecnuc isendac.

Codinto 1 12:13

Adecbidi isadaidbo yec matses utsibo yec utsin iuaido yec matsesën iuacmaido yec quec Esus tantiaquido iquec. Adquido icsho acten mentoaido yec abentsëc yacbimbuec nuquitedi tabadnubi Nuquin Papan Aton Mayan abentsëcquiobi nuqui meniaid nuquibëd tabadec.

Codinto 1 4:7

¿Tsuntsin: Utsibo padenquio icquin: Mibitedi bëdambocquid nec, capash? Nuquin Papambien mibi adoambo iquec. Adoambo yac ¿atotsi quiash: Ubitedi bëdambocquido nebi, mibi quepe? Ubibi adquidquio yanobi, quiacbimbuen mimbi chuipec.

Cadasia 2:16

Adquid icnuc Nuquin Papan: Naden nata, quequin chuiquin Moises dada uamiampid tantiaquin nabansho Nuquin Papan icsaisabimbuecnuc nuqui bëdambuen isec, quetiapimbo nuquitedi iquec. Esuquidistu tantiashouidtsëqui Nuquin Papan nuqui bëdambuen isec, queshun nuqui Esuquidistu tantiabenondac. Adshun ambi: Naden nata, quequin chiampiduidi nainquio icsho icsaisabimbuecnuc Nuquin Papan bëdambuen istiapimbo iquec, quequin nuqui tantiec.

Cadasia 2:20

Esusbëd uënësacbimbuen umbi icsambuen nabanaid ënondambi. Nëbi Esusbëd cuëshëdenquio yec bëdambuec tabadebi. Ubi tantiaquiec ubi cuidmenquio icnuec Nuquin Papan Mado abided cuidadec Esuquidistu uënëspanëdash, quequin tantiashoeni Aidëmbi nëbi bëdambuec tabadquid icmec.

Cadasia 3:22

Adquid icnuc Nuquin Papan chuiquin dada uamiampid niac niacquido yec mëtaniacbimbuec matses abitedimbo icsambuec tabadquido nec. Adquid icbuedëmbi ambi Abadauan chiampicpadombuen naquin Esuquidistu uidtsëqui tantiasho Nuquin Papan bëdambuen isendac.

Cadasia 3:28

Isadaidbo yec isadaidpembo yec matses iuaido yec matses iuapenquio yec dada yec chido yec quequin Esus tantiaquid icsho bëdambuen isec. Nëbi mibëtan Esuquidistu tantiaquid utsibobëd abentsëc yacbimbuecquido nec.

Epeso 3:12

Esuquidistunuidtsëqui abi tantiasho Nuquin Papa nuquitedi bëdambuen ismec, quequin tantiec dacuëdenquio yec Nuquin Papa dayunquio tsadacbimbuec nuquitedi iquec.

Pidipos 3:9

Esuquidistubëd daëdash aidbëd abentsëc yacbimbuecquid nebi. Adquid yec Moisesën chiampicpadombuen naquin aidën chiacpadombuen nainquio icchitembi, quequin tantiec nadondabi. Nuquin Papambien Esuquidistu umbi tantiasho ubi bëdambuen isquin ambi chiacpadombuen ubi namec, quequin tantiabenondambi.

Codosas 3:11

Adquid icmiac Esuquidistu tantiaquid utsibotedi Nuquin Papan bëdambuen tantiaquiec. Nëid isadaidbo nec. Nëid isadaidpembo nec. Nëid shui dëbid dëtemequid nec. Nëid shui dëbid dëtemesa nec. Nëid matses utsin dada uaid isec onquequin dadpen tantiaquido nec. Nëid matses utsin dada uaid isec onquequin daëdpactsëc tantiaquido nec. Nëid iua nec. Nëid iuapenquio nec, quenquio icquin aidtedishun Esuquidistu tantiasho Nuquin Papan bëdambuen isendac. Adecbidi abitedishun Icbombo abentsëcquiobi Esuquidistu nec. Aidi abi tantiaquidotedibëd icquidquio nec.

Santiaco 2:23

Nuquin Papan naden chuiquin dada uamiampicpadombuen napampic: Umbi chiacpadombuen naquidquio icquin ubi tantiaquidquio Abadauan nec, queshun bëdambuen ispampic icsambuen naisabimbuecnuc, quequin chuipampic. Adoaid icsho matsesën: Abadauan Nuquin Papabëd icquidquio nec, quequin chuipampic.