Doma 12:8 - El Nuevo Testamento en matsés

⁸ Utsibic: Utsibo chieshtomenquio icquin Esus tantiameta, quequin chuiquid icquin: Bëdambuec tabadnuna, quequin chuibanta. Utsibic atona nibëdquido menequid icta, caid icquin cudasenquio icquin menianneta. Utsibic Esus tantiaquidon chuiquid icta, caid icquin Nuquin Papan namiacpadombuen Esus tantiaquido bëdambuen tantiaquin nabanmeta chieshenquio icquin. Utsibic daicsaido yec isedanquido yec aton shubu nibëdquido yec aton pete nibëdquido yec macho yec tsësio yec quesho bëdambuen nashunquid icta, caid icquin cuishonquequin nashumbanta.

Doma 12:8 ပူးပေါင်းရင်းမြစ်များ

Mateo 25:40

Adoac naden abitedishun Icbombo icquin chiendambi: Tantia. Mibitedi chuinu. Umbi chiacpadombuen atona nibëdquido utsibon bëdambuen istiapimbocquido mimbi nashundednec. Aden ubi nashunacbimbuembi mimbi aido nashundedneque. Ubëdi tabadec cho, caindambi.

Hechos 11:23

Adoac Antioquia yacno choshon ambocquido Esus tantiaquido Nuquin Papan bëdambo icmiaid icsho isash: Bëdambo iquebi, quec cuishonquequin: Adembi chieshtoenquio icquin Nuquin Icbo Esus tantiata, capanëdash Bednaben.

Hechos 13:12

Aden Edimas bëshu uacsho isec tantiadempambo ictanec: Nuquin Icbon chiaid abimbo iquec, quiash chuiquid tapa Sedquio Paudo Esus tantiaquid yampanëdash.

Hechos 13:15

Ambo tabadnubien Nuquin Papan Moises dada uamiampidbëta Nuquin Papan oncamiampidën dada uamiampidtsen isec onquequin chuitanquin chuiquidon: Isedquido iqueque. Aid daëdi tabadacno nidshun: Ubitedi bëdambo icmenuen ¿ada chuibante bune? En chuiban. Tantianu, quequin Bednabebëta Pabado chuipanëdash.

Hechos 15:32

Adnubien Udasbëtan Sidasën Nuquin Papan oncamiaido icquin Nuquin Papan Chiaid chuibanquin Antioquia yacnocquid Esus tantiaquido: Chieshtoenquio ictsiabi, camenuen bëdambo icmequin tantiamepanëdash.

Hechos 20:2

Auëshquio puduanec nidquimbi nidaid Masedonia caid yacnocquid Esus tantiaquido iccuededacno iccuededacnombuen chiec: Chieshtoenquio icquin Esus tantiata, quequin aden bëdambo icmequin chuibidanec nidaid Quedesia caid yacno nidpanëdash Pabado.

Hechos 20:28

Nëbi nidebique. Ubi nidan chieshtoenquio icquin Esus tantiec bëdambuec tabadta. Adembidi mimbi chuibanaido Esus tantiaquido chuiquin: Chieshtoenda. Esus tantiec bëdambuec tabadta, cadednequin bëdambuen chuibanta. Nuquin Papan Mayan Bëdan aido chuibanquid mibitedi icmioshe. Adota. Aido Nuquin Papa yacno tabadmenuec Esuquidistu abided cuidadec intac mëyanec uënëspanëdash.

Hechos 4:36

Adecbidi tsusedpa Debin tsiuecquid acte utsi nënantanquio nidaid nacnëdquid Chipide caid yacnoshon tishaid Edusaden yacno choash Ose tabadpanëdash. Aidi: Utsibo shubisho issun bëdambo icmequid nec, quequin Bednabe cuëmpanëdash Esus chuibennequidon.

Doma 12:13

Esus tantiaquido atona nibëdsho issun meneta. Isedanquido chosho bëdambuen isquin iuedta.

Doma 13:6

Bëdambuen tabadmenuen Nuquin Papan chuiquid tapa icmiaidon chiacpadombuen naquin: Nëidtedi piucquid meneta, caid icnuc menequid.

Codinto 1 12:28

Esus tantiaquido icsho Nuquin Papan namiaido nadquidtedi iquendac. Esuquidistun: Ubi chuibenneta, caido. Utsibic Nuquin Papan oncamiaido. Utsibic Nuquin Papan Chiaid tantiamequido. Utsibic nadatiambocquin nabanquin ismequido. Utsibic daicsaidobëta nënquido bëdanmequido. Utsibic utsibo nashumbanquido. Utsibic iccuededquido namequido. Utsibic: Abi onquiacmaid onquete utsin onquequin chuibanquido, quec adquidtedi iquendac.

Codinto 1 14:3

Padnuen Nuquin Papan iuecshun natequid chiaid tantiaquin chuibanquidëmbien: Ma Esus tantiaquido bëdambuen tantiec chieshtoenquio yec tabadnu, queshun chuibanec. Adembidi utsibobëd tantiananquin nabanec: Ma dayacquio yec bëdambuec tabadnu, queshun chuibanec. Adembidi tantiananquin dayacquio icmiaid icquin natiamiaid utsibo icsho: Ma bëdambo yec cuishonquenu, queshun dayacquio icmequin chuibanec.

Codinto 2 1:12

Ubitedi bëdambuec tabadquin ismequid nebi, quequin tantiec bëdambo iquebi. Matsesën tantiamiacpadpenquio yec utsibobëd bëdambuec tabadobi. Nuquin Papanquio tantiamiacpaden ismec utsibobëd bëdambuec tabadobi. Adquiecbidi mibitedibëd tabadobi.

Codinto 2 11:3

Umbi chuibanac Esuquidistu tantiabuedombi nisi bëdambo isadacbimbuecquidën muaquin chiac Eban Nuquin Papan Chiaid niacquin tantienquio icpampicpaden muaquin chuibanac mimbi Esuquidistu tantienquio yampanundac, quec natiec tsadebi.

Codinto 2 8:12

Atona daëdpactsëc icquidën menete bunquioquin menesho isash: Bëdambo iquec, caindac Nuquin Papan. Dadpen meneta, quenquio Nuquin Papa iquec.

Codinto 2 9:11

Ma utsibo atona menequid icnu, queshun Nuquin Papan mibi dadpen icmeshunendac. Adoac mimbi: Ma utsibo menenu, caid ubitedi meniac buanshun menebanac: Bëdambo iquebi, quec tabadec. Adec tabadquin mimbi meniaid tantiaquin: Nuquin Papa bëdambo iquec, quequin mimbi meniaid bedquidon chiendac.

Codinto 2 9:13

Aden nashunaid issun mibitedi tantiec: Chiaid Bëda Esusën naid chiac: Esuquidistu tantiaquid nebi, quequin abimbo chuiquidquio aido nec, quequin mimbi dadpen meniaid bedshun: Nuquin Papa bëdamboshë iquec, quequin aidon chiendac.

Codinto 2 9:7

Aden chiampid icnuc: Nëidted menembi, quequin ambi tantiactedi menequid. Cudasacbitsëcquien menenquio icquid. Utsin: Nëidted mene, quequin ancac icsambo ictsiash. Menete bunquioquin menesho isash Nuquin Papa: Bëdambo iquec, quendac.

Epeso 6:5

Tantia, iuabo. Mibitedi chuinu. Nidaidënshun mibi iuaquid yec min icbo neque. Aidën chiacpadombuen nabanta. Chieshënenquio icquin bëdambuen isquin nashunta. Esuquidistu nidaidën icsho nashunacbimbuen mibi iuaquidën chiacpadombuen nabanta.

Codosas 3:22

Iuabon, nidaidënshun mibi iuaquidën chiacpaden nabanta. Aidën: Naden na, quequin chuishun isnuc nabanta. Mibi iuaquidën isenquiocnobi adombuembidi nabanuata. Aden nabansho mibi bëdambuen isendac. Cun Icbo Esuquidistun ubi isec, queshun aden nabanta.

Tesadonica 1 2:3

Adembidi abimbo chuiquin Esusën naid chuibanondambi. Bëdambuen namenuen bëdambuen chuibanondambi. ¿Min piucquid bednuen mua uaquindambi mibitedi chuibandionda? Padenquio.

Tesadonica 1 2:8

Mibitedi tantiaquioquin Nuquin Papan Chiaid Bëda chuibanec iuec mibëd tabadondabi. Aden umbi chuibanaido icsho utsibon mibi chieshënquin: Cuessunnenu: casho tantiash: Ubiquien na, quetsenondabi.

Timoteo 1 4:13

Mibi yacno nidec ubi puduedabi icnuc Esus tantiaquido iccuededacnoshon Nuquin Papan Chiaidquio isbanquin adenuidi chuibanta. Nuquin Papan chiacpadec chieshtoenquio yec bëdambuec tabadnuna, quequin Nuquin Papan Chiaidquio isbanquin matses bëdambuen tantiamequin chuibanta.

Timoteo 1 5:17

Tantia, mado. Esus tantiaquidon abi chuibanquid nashuntetsen mibi chuinu. ¿Ada Esus chuibanquidën bëdambuen naosh? Adquidën Nuquin Papan Chiaid bëdambuen tantiamequin Esus bëdambuen chuibansho ambi chuibanaidon bëdambuen isquin nashunquin dadpen menequid nendac. Ma bëdambo icnu, queshun piucquid menequid nendac.

Timoteo 1 6:18

Aidbidi chuiquin: Bëdambuec tabadquin utsibo nashumbanquiota. Adembidi cudasenquio icquin mitsana utsibo menianneta.

Ebedeo 10:25

Aden nabanec: Nuquin Papa tantiaquid utsibobëd iccuededtiapimbo iquebi, utsi utsiec quenubi adenquio icnuna. Adec iccuededec: Nuquin Papan chiacpadquiec bëdambuec tabadnuna, quec chuinannuna. Cuidnuen matsesën naid chuibante uëshë nëbimbobi yanec, quiash adec baded badedquiec chuinannuna.

Ebedeo 13:17

Mibi Esus chuibanquidon chiacpaden nabanta. Nuquin Papan: Chieshtoenquio icquin ubi tantiaquido bëdambuen isquin dayun uata, caid nec. Aidi: Esus tantiaquido naden namiombi, quequin Nuquin Papa chuiquid nec. Ubi chuibanquid nec, queshun ambi chiacpadombuen mibitedishun nabansho isash aid cuishonquec. Aden ambi chiacpadombuen nainquiocsho isash uënësquio ictsiash. Adnuc mibitedi bëdambo ictiapimbo ictsiac.

Ebedeo 13:22

Cun utsibo, mibitedi bëdambuen tantiamenuen daëdpactsëc umbi chuiquin dada uabued chieshtoenquio icquin tantiadoneta.

Ebedeo 13:24

Mibëd icquid Esus tantiaquidobëta mibi chuibanquidtedi chuiquin: Mibi tantiec tsadebi, quiosh, quequin chuita. Adembidi umbitsen mibi tantiembi, quiosh, quequin chuita, queuapec Esus tantiaquido nëuëshquio Itadia yacno tabadquido.

Ebedeo 13:7

Adembidi Nuquin Papan Chiaid mibi tantiamenu, quequin mibi chuibanquidon chiaid bëshunenda. Aido Esus tantiaquiec bëdambuec tabadpanëdash. Aidon tantianëdacpadombuen tantiec bëdambuec tabaduata.