Doma 12:7 - El Nuevo Testamento en matsés

⁷ Utsibo nashunquid icta, quequin namiaid icquin bëdambuen nashumbanta. Utsibic Nuquin Papan Chiaid bëdambuen tantiashun utsibo tantiameta, caid icquin bëdambuen tantiameta.

Doma 12:7 ပူးပေါင်းရင်းမြစ်များ

Mateo 28:19

Nidaid utsi utsiec yacno nidshun ubi tantiaquido icmenuen matses abitedi Umbi Chiaid chuibenneta. Adoac ubi tantiabensho acten mentoquin: Nëid Esus tantiabenshun Nuquin Papatsen tantiaquid nec. Nëidbëd Aton Mayan Bëda tabadec, quequin utsibo ismequin acten mentobanta.

Uanën dada uaid 3:2

Aidi inchëshën Esusbëd onquenuec chopanëdash. Adec choshon: Nuquin Papan namiaid icquimbien bëdambuen chuibanquin naic, quequin mibi tantiombi. Mimbi nadatiambocquin nabansho issun: Nuquin Papan namiaidënuidtsëquien aden nabantsiash, mibi caombi, quepanëdash Nicodemo.

Hechos 13:1

Adashic: Esuquidistu tantiaquid utsi utsiec Nuquin Papan oncamiaidobëd chuibanquin tantiamequido Antioquia yacno nëidtedi tabadpanëdash. Nëidic Bednabe. Utsibic Simon cashumbic Dada Chëshë quequin cuënaid. Utsibic Sidene yacnocquid Dusio. Utsibic nidaid Cadidea yacnocquidon chuiquid tapa Edodes Antipasbëta caniuaid Menain cuëmëdquid. Utsibic Saudo.

Hechos 20:20

Chuibanenquio iquembi, quenquio icquin mibitedi Esus bëdambuen tantiamenuen matses dadpen iccuededacnoshon chuibanondambi. Adembidi shubun shubunquiec puduedcuennequin chuibenniondambi.

Hechos 20:28

Nëbi nidebique. Ubi nidan chieshtoenquio icquin Esus tantiec bëdambuec tabadta. Adembidi mimbi chuibanaido Esus tantiaquido chuiquin: Chieshtoenda. Esus tantiec bëdambuec tabadta, cadednequin bëdambuen chuibanta. Nuquin Papan Mayan Bëdan aido chuibanquid mibitedi icmioshe. Adota. Aido Nuquin Papa yacno tabadmenuec Esuquidistu abided cuidadec intac mëyanec uënëspanëdash.

Hechos 6:1

Adashic badiadquidën badiadquidënquiec Esus tantiaquid dadpenquio yannubi isadaidbo quidiecon onquetenuidi onquequido cumapenec nadec cuëdcuededec: Cun matses niantebo badiadquidën badiadquidënquien pete daëdpactsëc menequimbi min matsesën onquetenuidi onquequid chidobo pete dadpen mimbi menepacboc, quepanëdash.

Codinto 1 12:28

Esus tantiaquido icsho Nuquin Papan namiaido nadquidtedi iquendac. Esuquidistun: Ubi chuibenneta, caido. Utsibic Nuquin Papan oncamiaido. Utsibic Nuquin Papan Chiaid tantiamequido. Utsibic nadatiambocquin nabanquin ismequido. Utsibic daicsaidobëta nënquido bëdanmequido. Utsibic utsibo nashumbanquido. Utsibic iccuededquido namequido. Utsibic: Abi onquiacmaid onquete utsin onquequin chuibanquido, quec adquidtedi iquendac.

Codinto 1 12:5

Nuquin Icbon tantiamiaid icquin utsibo tantiaquin nashunquid utsi utsiec iquec. Adec dadpen utsi utsiec icnubi abi nashunquidon Icbo abentsëcquiobi iquec.

Codinto 1 14:26

Tantia, cun utsibo. Naden mibi chuinu. Mibitedi Esus tantiec iccuedednuc utsi utsiec cuëdënte cuëdënec. Utsimbic Nuquin Papan Chiaid tantiamequin chuibanec. Utsimbic: Nuquin Papan naden ushquin isacbimbuen ismioshi, quequin Nuquin Papan ismiaid chuibanec. Utsimbic abi onquiacmaid onquete utsin onquequin chuibanec. Utsimbic abi onquiacmaidën onquete utsin onquequin chuibansho tantienquiocsho issun aid onquete tantiaquidën: Ma utsibon tantianu, queshun chuibanec. Aden chuibanquin: Ma Esus tantiaquidtedi bëdambuen tantiec chieshtoenquio yec tabadnu, queshun aidtedi nabanec tabadta.

Cadasia 6:6

Esus tantiaquido icsho: Nadec tabadquid, quequin chuibanaido icquin Nuquin Papan Chiaid abi chuibanquid nashunquid nendac.

Epeso 4:11

Adoac aidënquiobi abi tantiaquido utsi utsien nadquidtedi icmebanec. Nëidic Esuquidistu chuibennequido. Utsibic: Nuquin Papan oncamiaido. Utsibic Chiaid Bëda Esusën naid chuibennequido. Utsibic Esus tantiec iccuededquido chuibanta, caido. Utsibic abëd iccuededquido tantiamequin chuibanquido.

Codosas 4:17

Adembidi Adquipo cuëmëdquid naden chuita. Nuquin Icbo Esuquidistun: Naden nata, caid icquin bëdambuen tantiaquin nabanta, quequin chuita.

Timoteo 1 2:7

Aden Esus chuibanmenuen Nuquin Papan Ambi Chiaid chuibanquidquio icmepondashi. Adembidi Esusën: Isadaidpembo tantiamequin ubi chuibenneta, caondaidbidi nebi. Adoaid icquin: Ma Esus tantianu, queshun Nuquin Papan Chiaidquio muainquio icquin abimbo chuibennec nebi.

Timoteo 1 3:2

Adshumbic: Nuquin Papan Chiaid chuibanquid nadquid nec, quequin chuita. Icsambuen nainquio yec bëdambuec tabadquid nec, utsibon caidquio Nuquin Papan Chiaid chuibanquid nendac. Adquid chido abentsëc inquid nendac. Ambi icsambuen nate bunaid ënash bëdambuec tabadquid nendac. Bëdambuen tantiaquidquio yec bëdambuec tabadquid nec, utsibon caidquio nendac. Isedanquido bëdambuen isquin iuedshun aton shubun ushmequid nendac. Nuquin Papan Chiaid bëdambuen tantiamequin chuibanquid nendac.

Timoteo 1 4:16

Nuquin Papan Chiaid niacmane, quec mibibi datantiadec: ¿Adabi bëdambuec tabadpeba? ¿Adambi Nuquin Papan Chiaidquio muainquio icquin chuibampoba? quec mibibi tantiadta, mado. Bëdambuec tabadquin Nuquin Papan Chiaidquio ënenquio icquin chuibanta. Aden Nuquin Papan chiacpadombuen chuibanash Aidbëd mibi tabadendac. Mimbi chuibansho bëdambuen tantiaquidotedi adecbidi Esusbëd tabaduaindac.

Timoteo 1 5:17

Tantia, mado. Esus tantiaquidon abi chuibanquid nashuntetsen mibi chuinu. ¿Ada Esus chuibanquidën bëdambuen naosh? Adquidën Nuquin Papan Chiaid bëdambuen tantiamequin Esus bëdambuen chuibansho ambi chuibanaidon bëdambuen isquin nashunquin dadpen menequid nendac. Ma bëdambo icnu, queshun piucquid menequid nendac.

Timoteo 2 2:2

Matses dadpenshun tantianuc umbi chuibansho mimbi tantiondac. Umbi aden chiondaid utsibotsen chuiban. Adshun mimbi chuibanaido abentse abentsen: Aidon chieshtoenquio icquin Esus bëdambuen tantiamequin chuibantsiash, queshun: Mimbitsen chuiban, cata, mado.

Timoteo 2 2:24

Nuquin Papan Chiaid chuibanquid utsibëd chushcananenquio icquid nendac. Chieshëmënenquio icquin aton matses bëdambuen isquid nendac. Adembidi nëishenquio icquin Nuquin Papan Chiaidquio bëdambuen tantiamequidquio nendac. Badedi chieshtoenquiocquid nendac.

Timoteo 2 4:2

Aidën chiacpadombuen naquin Nuquin Papan Chiaidquio chuibanta, mado. Matses tantiate bunenquio icnuc chuibanquimbi utsibo tantiate bunquid icnuc adembi chuibanta. Esus tantiaquidon icsambuen nasho issun: Esus tantiaquido adesambo neque. Bëdambuequien tabadtiad, quequin chieshënenquio icquin chuita, mado. Utsibo bëdambuec tabadsho: Mibi bëdambuec tabadoc. Adquiequi tabadta, quequin chieshtoenquio icquin chuibanta. Bëdiactsëc tantiactsëcquido bëdambuen tantiamequin: Esus tantiaquidon nadoquid, quequin chuibanta, mado.