Doma 1:11 - El Nuevo Testamento en matsés

¹¹ Aden mibitedi iste bunebi. Mibëd tabadquin Nuquin Papan Chiaid chuibantsiambi. Nuquin Papan tantiamiacpadombuen ma chieshtoenquio icquin tantiaquiono, quequin mibitedi chuibantsiambi.

Doma 1:11 ပူးပေါင်းရင်းမြစ်များ

Hechos 16:5

Aden chuibanac ambia tantiabenquidon Esus udictsëc tantiabenquionobi utsibo Esus tantiaquid dadpen yanuapanëdash.

Hechos 19:21

Adashien Pabado: Edusaden yacno nidnu, quequin nidaid Masedonia caid yacnocquido isbidanquin nidaid Acaya caid yacnocquidotsen isbidanec nidec Edusaden yacno nidash tabadashic shubu dadpen icquid Doma caid yacnotsen nidtiadquio iquebi, quequin Pabadon tantiapanëdash.

Hechos 19:6

Aden acten mentoaidotedi dada 12ted icsho Pabadon mëdanten mamishbanshobi Nuquin Papan aton Mayan Bëda menepanëdash. Adoac abi onquiacmaidënquio onquequin: Nuquin Papan: Naden naindambi, quequin oncamiaid chuibampanëdash.

Doma 1:12

Chieshtoenquio icquin Esus tantianuna, quec utsibobëd chuinanec bëdambuec tabadec aidobëd bëdambo ictsiabi, quiash mibitedi iste bunebi.

Doma 15:23

Nëbi nidaid cuëshë utsi utsien umbi tantiacno nainquin chuibenniombi, quiash mibi yacnotsen nidtiadquio iquebi. Ënden nidte bunondaidi seta dadpen matanmiashi abi nëbi mibitedi isec nidte bunquiebi.

Doma 15:29

Adec nidshun mibëdi tabadquin umbi Esus tantiamequin chuisho Esuquidistun nuquitedi bëdamboshë icmendac, quequin tantiembi.

Doma 15:32

Aden Nuquin Papan tantiamiacpadombuen naquin amboba istanec mibitedi yacnotsen nidendabi. Mibi istuidash cuishonquendabi. Mibëd tabadec bëdambo yanendabi.

Doma 16:25

Nuquin Papa Bëdamboshë iquec, canuna. Umbi Esuquidistu chuibanac tantiabensho Nuquin Papan mibitedi chieshtoenquio icmiac umbi chuibambued Esus tantiec tabadta. Nuquin Papa ëndenquimboshë abitedi uabi yec: Iuecshun naindambi, quequin ambi matses tantiamenquio icpampidi mibi Esus tantiamiac.

Codinto 2 1:15

Aden Codinto yacnocquidon ubi bëdambuec tabadaid chiendac, quequin tantiec: Mibitedi daëden isec nidnu, queuidobi.

Codinto 2 1:21

Nuquitedi Nuquin Papan: Cuna nec, quequin Esuquidistubëd abentsëc yacbimbuecnuc tabadmequin bëdambuen isaido nec.

Codinto 2 11:4

Adec ubi tsadnubi Codinto yacno choshon utsibon Esuquidistu umbi chuibued utsi uain icsambuen chuibansho badedquio mibitedishun tantiashunec. Adembidi Nuquin Papan Mayampenquio caic: Mayan utsi iquec, quesho tantiash: Ubi mene, mibi quepec. Adembidi, Mibi bëdambo icmequid Esusbimbuecquid utsi iqueque. Aid tantiata, quequin umbi chiaid utsi uain chuisho tantiashun: Abimbo caic, quequin mibitedishun tantiec. Aden utsibon umbi chiondaid utsi uain chuisho tantiec, quesho tantiash Esuquidistu tantienquio yantsiash, quec tsadebi.

Codinto 2 9:14

Adembidi aidon mibitedi tantiaquin Nuquin Papa chiannendac naden: Mimbi tantiamiacpadombuen nabanquidquio Codinto yacnocquido nec. Aido bëdambo icme, Papa, quequin chiannendac.

Pidipos 1:8

Esuquidistun tantiamiacpadombuen mibitedi tantiec: Aido uënësquio iquec, ubi quesho Nuquin Papan: Abimbo caic, quequin tantiec.

Pidipos 2:26

Aidi mibitedi padpiden iste bunec uënësquio yec tsadposh. Ubi nënec uënëstsembued cun matses chuinuec nidaccosh, quiash shubiantiadtsëcquio icposh.

Pidipos 4:1

Tantia, cun utsibo, umbi tantiaidquio icsho mibitedi chuinu. Mibi iste bunquiebi. Umbi chuibanac Esus tantiabensho isash bëdamboshëcquid meniacbimbuec cuishonquiondabi. Ubi yacpaden chieshtoenquio icquin Nuquin Icbo Esus tantiec bëdambuec tabadta.

Tesadonica 1 3:13

Adembidi mibi bëdambuen tantiamequioquin chieshtoenquio icmeta. Adsho mibi tantiaquido mimbi bëdamboshëcquid icmequin icsaisa icmiaidobëd nidaidën padpidec choshon cun Icbo Esusën: Tesadonica yacnocquido icsambo iqueque. Cuidnu, catiapimbo ictsiash, Papa, quequin mibitedi tantiaquin Nuquin Papa chiannembi.

Tesadonica 2 2:17

Adquid icsho naden chiannembi: Aido chieshtomenquio icquin Esus tantiamequin bëdambuec tabadquid icme. Adembidi bëdambuec chuinanquid icmequin nashunnanquid icmeta, Papa, quequin Nuquin Papa chiannembi mibitedi tantiaquin.

Tesadonica 2 3:3

Nuquin Icbo bëdamboshë icquid nec. Muesambo icquin ambi chiacpadombuen naquid icquin nuquitedi bëdambuen dayun uaindac. Ubi tantienquio yannushe, queshun nuqui chieshtomenquio icquin Mayan Icsa Satanas nuqui iuametiapimbo iquendac.

Ebedeo 13:9

Esusën naidquio chuinu, quequidën utsi chiec muaquin chuibansho tantienda. Padnuen mibi bëdambuen isquin nashunquid: Nuquin Papa tantiaquidquio ma yannu, quequin mibi chuibanquidën chuibanacpadombuen nabanta. Utsibic: Nëid petemaid nec. Nëid petequid nec, quequin tantiaquin naquid yec Nuquin Papa tantiaquidquio yanenquio mibi ictsiac.

Petedo 1 5:10

Aden utsibon chieshënquin natiamiaido yec iuec iuecpactsëc mibitedi mëyadec tabadendac. Adec tabadsho Nuquin Papan bëdamboshëcquid icmequin dayacquiocquid yacbimbuecnuc chieshtoenquio icquid mibi icmendac. Adembidi nuqui tantiaquidquio icquin ambi Esus tantiamiaido icsho abi yacno buanshun nuqui bëdamboshëcquid icmiac ënëdenquio yec Esuquidistubëd daëdash abentsëc yacbimbuecnuc tabadmendac.

Petedo 1 5:12

Umbi daëdpactsëc chuiquin Sidbano dada uamebued mibi yacno buanmembi: Ma mibitedishun isnu, queshun. Aidi chieshtoenquio icquin Esus tantiaquidquio icsho umbi cun utsi caid nec. Ma nëid isash: Ubitedi tantiaquidquio icquin Nuquin Papan ubitedi bëdambuen isquin bëdambo icmec, quequin ma tantianu, quequin abimbo mibitedi chuibanondambique. Chieshtoenquio icquin Nuquin Papa tantiec tabadta.

Petedo 2 1:12

Umbi aden chuibuedtedi mibitedishun tantiondac. Aden tantiash chieshtoenquio yec Esus tantiec bëdambuec mibitedi tabadanondac. Aden abimbo chiaid tantiondaid icsho mibi adembi chuiquin tantiamedednendambi.