Codosas 1:23 - El Nuevo Testamento en matsés

²³ Chieshtoenquio icquin cainquin Esuquidistu tantiaquid icsho abi yacno mibi iuedendac, quequin chuibansho mimbi tantiondac. Adenuidi Chiaid Bëda ënenquio icquin tantiata. Adombuembidi shubu dadpen icquid Doma yacno chuiquid tapan namiacnoshon chuibennesho nidaid utsi utsiec yacno tabadquidon tantiapanëdash. Umbitsen adembidi aid chuibennepondambi.

Codosas 1:23 ပူးပေါင်းရင်းမြစ်များ

Madcos 16:15

Aden chuishumbic: Nëbi nidaid utsi utsiec yacno nidanneta. Adec nidshun: Nuquin Papan namiacno tabadte iquendac, quequin Chiaid Bëda chuibenneta.

Ducas 22:32

Aden mibitedi Mayan Icsa Satanasën iuatiadquio iquec, quequin tantiaquin Nuquin Papa naden chiombi: Simon ubëd icquidquio neque. Mayan Icsa Satanasën iua yannushe. Aidën: Nuquin Papan Chiaid niac niacmenu, casho adomenda, Papa, quequin chiombi. Adec ubëd icbuedi cuëshëdtsembosh chouashun padpidec cuëshëdenquio icquin cumapenen ubi tantiaquin ubëd icquid utsibo adombuembidi cuëshëdenquio icnuc cumapenen ubi tantiameta, capanëdash Esusën Petedo chuiquin.

Ducas 6:48

Shubu uaquin bëdambuen tantiaquidënquio shëcuë ëquëducquio uëdëshcashun buintad nitsinquid. Adoaid acte mauanec chëuëdquidën chimeshadenquio iquendac.

Uanën dada uaid 15:6

Uba icbon cuidi utsi utsiec bacuëesa icsho pateshun tsindoshon tanunacsho nëdëncaquid. Adoacbimbuen ubi tantienquio yanec ubëd cuëshëdshun utsibo ubi tantiamenquio icsho Nuquin Papan icsambuen naquido cuidacno nësecaindac, quepondash Esus.

Hechos 1:25

Udas padon icsambuen nash chian annëdënquiacno nidbuedën nabanuidbued namenu, quequin mimbi bëdambuen isaid abentsëc ubi isme, Papa. Aden mimbi ismiac: Mibitsen Esus chuibennequid icta, caindambi, quequin Nuquin Papa chuibededpanëdash.

Hechos 1:8

Aden chiashic: Aton Mayan Bëda Nuquin Papan mibitedi meniac aidënquio bëdambuen tantiamiac nadatiambocquin naquin ubi chuibennequidquio mibitedi iquendac. Edusaden yacnoshomba mimbi ubi chuibanendac. Adoshombic nidaid cuëshë Udea yacnocquidobëta nidaid cuëshë Samadia caid yacnoquido chuibanendac. Adoshombic ënapenquio nidshun nidaid utsi utsiec yacnoshontsen adembidi mibitedishun chuibanendac, quepanëdash.

Hechos 11:23

Adoac Antioquia yacno choshon ambocquido Esus tantiaquido Nuquin Papan bëdambo icmiaid icsho isash: Bëdambo iquebi, quec cuishonquequin: Adembi chieshtoenquio icquin Nuquin Icbo Esus tantiata, capanëdash Bednaben.

Hechos 14:22

Aidtedi yacno chouaquin Esus tantiaquido naden chuibampanëdash: Natiamiantequid iquendac. Adquid icnuc Nuquin Papan namiacno tabadtequid nebi, quequin Esus tantiec chieshtoenquio yec tabadta, capanëdash Pabadon.

Hechos 2:5

Aden Nuquin Papan aton Mayan menenubien isadaidbo utsibo Edusaden yacno chochoash dadpen tabadpanëdash. Aido Esus tantiesabo iquequi aton tsusedpabon chiampicpaden nanuec nidaid utsi utsiec yacnouësh Edusaden yacno chochoaido icpanëdash.

Hechos 20:24

Aden Nuquin Papan Mayan Bëdan chuisho tantiashi: Cuessunnenushe, quenquio yec niduaibi. Esuquidistun: Ubi chuibenneta, cacpaden naimbudquin utsi utsiec yacno nidshun: Esus tantiasho Ambi tantiaid yec Nuquin Papabëd tabadte iquec, quequin Chiaid Bëda chuibanembi.

Hechos 26:16

Umbi namiaid mibi icmenuec isadcuenec chobique. Nidtota. Adshun: Esus isondambi, quequin ubi chuibenneta, caid nëbi mibi yanec. Ubi chuibennequin mimbi isaidbëta umbi iuecshun mibi ubi tantiamiaid chuibenneta.

Hechos 4:12

Abi yacno iuedanquid aid abentsëqui icnuc utsi nibëdec. Nuquin Papa yacno tabadte bunec aid tantiaquid icta, quepanëdash Petedo Uambëd.

Doma 10:18

¿Esusën naid chuibansho tantiamboda isadaidbon icpadic? Ai, ma tantiapaboc. Naden chuiquin Nuquin Papan dada uamiampid iquec: Nidaid utsi utsiec yacno nidshun ambi chuimiaidon chuibansho matses abitedishun tantiendac. Adembidi nidaid abichobi yacno tabadquidontsen chuibansho tantiendac, quequin chuipampic.

Doma 15:16

Nuquin Papan adquid icmiac Esuquidistun naid chuibennequidquio icquin matses utsibo nashunquin aidën bëdambuen iste chuibenniombi. Adoac Nuquin Papa ismequin nuadte bëda pichicacbimbuecquido icsho Nuquin Papan Mayan Bëdan aido bëdambuen tabadmendac.

Doma 2:7

Abi tantiec bëdambuec tabadsho issun mabi Nuquin Papan: Mibi bëdambo iquec, canu, quiash abëd tabadte bunec ambi chiacpadec bëdambuec tabadquid uënësacsho Nuquin Papan ënëdenquiocnoc abëdi tabadmendac.

Doma 5:5

Aden chieshtoenquio icquin cainquin abi tantiaquid icsho Nuquin Papan ¿ada cacunmepec? Padenquio. Nuquin Papan nuquitedi tantiaquidquio icquin aton Mayan Bëda nuquibëd tabadmec, quequin nuquitedi tantiec.

Codinto 1 15:58

Cun utsibo, umbi tantiaido icsho mibitedi chuinu. Umbi chuibambued utsi uainquiocquin tantiec chieshtoenquio yec chonoadbudec tabadquin Nuquin Icbo Esuquidistu ënenquio icquin nashunec tabadta. Nuquin Icbo Esuquidistubëd abentsëc yacbimbuec tabadquin nabanec chonoadaid ambembi nabanaidpenquio nec, quequin mimbi tantiec.

Codinto 1 3:5

¿Mitsipadquidibi Apodobëd nepe? Nuquin Papa nashunquid icquin Esuquidistu chuibennequid ubi daëdi nebi. Adquid icquin umbi chuibannac Esuquidistu tantiaquid mibitedi yanondac. Nuquin Icbon: Naden chuibanta, cacpadombuen ubi daëdshun chuibanoc.

Codinto 2 10:1

Pabado nebi. Tantia. Mibitedi chuinu. Cumapenec chushquenquio icquin matses bëdambuec tabadmenu, quequin chuibanquid Esuquidistu icpanëdash. Mibi yacno nidshun Esuquidistupadquid icnu, quequin ubi chieshënquidi bëdambuen tabadmenu, quequin chuibanondambi. Adoaqui ubi chieshënquido nadec onquec: Nuquibëd tabadquin dacuëdacbimbuen cumapenen Pabadon chushcainquio iccondash. Utsibo yacno nidash tabadquin dada uaquimbi cumapenen chushcaic, quequin icsambuen chuishunoshi.

Codinto 2 11:23

¿Esuquidistu chuibanquid nebi, quepecta aido iquec? Ubien Esuquidistun: Ubi chuibenneta, caidquio nec. Adquid icquin aidquio chuibanquidquio nebi. Aden chiec tantiesabimbuec onquec nebi. Utsi bëdiactsëc chonoadnuc ubien cumapenec chonoadquid nec. Adecbidi quënën tsadunaid utsi icnubi quënë utsin utsinquien tsaduntedniaid nebi. Adecbidi utsi bëdiactsëc cacuesaid icnubi iuen cacuesto cacuestoaid nebi. Mëyanac uënëstsenobi, utsi quenubi iuenquio mëyanac uënëstsen uënëstsenondaid nebi.

Codinto 2 3:6

Umbi tantiaid chienquio icquin Nuquin Papan abimbo chuiquin ambi bëdambuen ismete chuca chiaid chiec nebi. Nuquin Papa matses bëdambuen ismequid Esuquidistu umbibi chuibennetiapimbo icsho Nuquin Papan Mayan Bëdan tantiamiac Esuquidistu chuibennequidquio nebi. Ambi: Naden nata, quequin chuiquin dada uamiampicpadombuen chuibanta, caidpenquio nebi. Ambi: Naden nata, quequin dada uampidtedi nabanenquio yec Nuquin Papa yacno matses tabadtiapimbo iquec. Padnuen Esus tantiasho aton Mayan meniaido yec Nuquin Papabëd tabadtequido nendac.

Codinto 2 4:1

Nuquin Papa bëdamboshëcquidën ubitedi bëdambuen isquin: Esuquidistu chuibenneta, caid icquin chieshtoenquio icquin aidi chuibanquido ubitedi nec.

Codinto 2 6:1

Nëbi ubitedi Nuquin Papan: Umbi Chiaid chuibenneta, caido nebi. Adquid icquin: Nuquin Papa matses bëdambuen ismenuen Esusded cuidpanëdash, quequin Nuquin Papan Chiaid umbi chiac pamumëdacbimbuec tantiate bunenquio yec tabadenda.

Cadasia 4:11

Mibitedi caic: Icsambuen naic tabadosh, utsibo quesho tantiash: Esus chuibanec abembi chonoadondabi, quiash dacuëdebi.

Cadasia 5:5

Padnuen nuquitedi Nuquin Papan Mayanën tantiamiac naden nuqui tantiec: Esuquidistu uidtsëqui tantiasho Nuquin Papan icsaisabimbuecnuc nuqui bëdambuen isec, quequin nuqui tantiec.

Cadasia 5:7

Mibitedi: Aid bedembi, quiash aiduidtsëqui tantiec titinquiacbimbuen mimbi Esusquio tantiondac. Adquid icsho ¿tsuntsin: Aid tantienda, cac Esus tantienquio yano?

Cadasia 6:9

Umbi aden chuisho tantiashun chieshtoenquiocquin bëdambuen naic tabadta. Adec tabadsho issun ambi tantiacpadën Nuquin Papan nuqui bëdambo icmequin menendac.

Epeso 1:18

Nadembidi mibitedi tantiaquin Nuquin Papa chiannembi. Mimbi bëdambuen tantiamiac: Ma mibëd tabadte bunquin cainquidombo ma icpanuna. Adash: Nuquin Papa tantiaquido utsibobëd bëdamboshë yacno tabadendabi, quequin ma tantiapanuna, quequin chiannembi.

Epeso 2:21

Aidted abia icquid icnuc Esuquidistu tantiaquid dadpen yansho issun Icbon tabëcshun tanebanaidbimbuecquido neuaic. Adec abi tantiaquido abi tabadte icmiac bëdamboshë yampec.

Epeso 3:17

Adembidi Esuquidistu tantiaquidombo icmequin ënëdenquio yec utsibobëd tantiananec tabadquid icmeta, Papa, quequin mibitedi tantiaquin Nuquin Papa chiannembi.

Epeso 4:16

Cun Icbombo Esuquidistu nec, quequin aidën chiacpadombuen nabanquidquio yec abi tantiaquidtedi aidbëd abentsëc yacbimbuec tabadquido nec. Esuquidistun tantiamiac canidoacbimbuen abentsëcshun abentsëcshunquien bëdambuen nabanec tantiananec tabadec abi tantiaquidtedi aidbëd abentsëc yacbimbuecquid yanendac.

Codosas 1:25

Mibitedi bëdambo icmenuen Esus tantiaquidotedi nashunquid icmequin Nuquin Papan: Nidaid utsi utsiec yacno nidshun Esuquidistun naid Chiaid Bëda chuibenneta, caidquio nebi.

Codosas 2:7

Adec tabadquin cute aton tapun ëquëducquiocquidën uidënash nidacbimbuen Esuquidistu tantiaquid icquin aidquio tantiaquiota. Aden Esuquidistu chuiquin ubipadquidon mibitedi tantiamepanëdash. Aid tantiaquid icquin Nuquin Papa chuiquin: Mimbi nac bëdambo iquebi, Papa, quequin Nuquin Papa chianneta.

Tesadonica 1 3:3

Ma ubi tantiaquido chieshënquin natiamenu, quequin Nuquin Papan tantiacpadombuen natiamiac chieshtoshon Esus tantienquio yannushe. Chuitan, caondambi. Aden Nuquin Papan tantiacpaden Esus tantiaquid icsho mibitedi natiametequid iquendac, quequin umbi chuibansho mimbi tantiondac.

Tesadonica 1 3:5

Umbi istanenquio yac utsin chieshënac ¿adecbidida Tesadonica yacnocquido chieshtoenquio icpatsiashba? quequinuidtsëqui tantiec tsadtiapimbo iquebique. Istan, caondambi Timoteo chuiquin. Ubitedi adometsiash, quequin tantienquio icshobi: Icsamequin tannu, quequid Mayan Icsa Satanasën namiac chieshtoshon Esus tantienquio yanacsho isash abembi chonoadquin chuibanondambi, quequin tantiamane, queshun: ¿Ada umbi chuibanac Esus tantiabenondaido bëdambuec tabadeque? Istan, caondambi Timoteo chuiquin.

Tesadonica 1 5:8

Padnuen nuquitedi Esus tantiec bëdambuec tabadquido nec. Adquid icquin nuqui icsambuen nate bunaid nainquio icnuna. Sondado: Shocosh tsasimbo icquid shictonquenu. Sicsenushe, quiacbimbuec icnuna. Mayan Icsa Satanasën Esus tantiamenquio icnushe. Esus tantiaquioquin matsestsen tantiaquionona. Adecbidi sondado: Masenushe. Shocosh tsasimbo icquid mauete mauenu, quiacbimbuecbidi icnuna. Mayan Icsa Satanasën icsambuen tantiamequin chieshtomenushe. Esus tantiasho cuidenquio icquin Nuquin Papan abi yacno ubi tabadmendac, quequin tantiec bëdambuec tabadnuna.

Tesadonica 2 2:16

Nuquin Icbo Esuquidistubëtan Nuquin Papan nuqui tantiaquin bëdambuen isec. Adembidi: Nuquin Papa yacno Esusbëd iquendabi, quequin tantiamequin nuquitedi bëdambo icmec.

Timoteo 1 1:12

Tantia, mado. Mibi chuinu. Nuquin Icbo Esuquidistun: Ubi bëdambuen chuibantsiash, queshun: Ubi chuibennequid icta, Pabado, cashun ubi bëdambuen namec. Adoaid icquin: Ubi namequid yec mibi bëdamboshë iquec, Icbo, quequin Nuquin Icbo Esus chiannembi.

Timoteo 1 2:7

Aden Esus chuibanmenuen Nuquin Papan Ambi Chiaid chuibanquidquio icmepondashi. Adembidi Esusën: Isadaidpembo tantiamequin ubi chuibenneta, caondaidbidi nebi. Adoaid icquin: Ma Esus tantianu, queshun Nuquin Papan Chiaidquio muainquio icquin abimbo chuibennec nebi.

Timoteo 1 3:16

Ëndenquimbo abi bëdambuen ismequid ambi matses tantiamenquio icpampidi nëbi Nuquin Papan ismiac abi tantiamequid Esuquidistu bëdamboshë iquec. Aidi Nuquin Papan matsesmepanëdash. Nuquin Papan Mayanën: Nuquin Papapadquidquio yec icsaisambo Esus nec, quequin tantiamec. Matsesën uënës uaqui uincuennëdaid yec Nuquin Papabëd icquidonquio isaidquio Esus nec. Abi chuibennequidon nidaid utsi utsiec yacno nidshun chuibenniac matses utsin utsinquien Esus tantiabempanëdash. Aidquiobi Nuquin Papan abuc indoshon abëdi tabadmeuapanëdash.

Tito 3:7

Adec aton Mayan Bëda nuquibëd icsho issun: Cuidenquio icquin bëdambuen isquin bëdambocquid icmeshun aidtedi ubëdi tabadmendambi, quequin Nuquin Papan tantiec, quequin ënëdenquio yec abëd tabadte nuqui cainec.

Ebedeo 10:38

Aid chote tantiec Ambi chiacpadec bëdambuec tabadquin abi tantiasho Nuquin Papan abëd tabadtequido icmendac. Utsin chieshtoshon ubi tantienquio icsho bëdambuen istiapimbo iquendabi, quec Nuquin Papa, quequin chuiquin dada uapampic.

Ebedeo 3:14

Tauambuen nuqui Esus tantiabenondacpadombuen chieshtoenquio icquin tantiec uënësabi yacpadembi ënenquio icquin tantiaquido yec Esusbëd tabadtequido nuqui nendac.

Ebedeo 3:6

Padnuen Esuquidistu Nuquin Papan Madombo nec. Adquid icquin aton Papan shubun icquido namequid nec. Aden aton shubun icquido dayun uacbimbuen nuqui dayun uaindac. Adoac aidën shubun icquidbimbuecquid nebi, queshun chieshtoenquio icquin Nuquin Papan chiacpadombuen nuqui naindac. Aden naquido icsho abi yacno nuqui tabadmendac, quiash cuishonquequin abi cainquido Esusën dayun uaindac.

Ebedeo 4:14

Esus Nuquin Papan Madombo yec nëish iua cuessunneshun pichicaquidon chuiquid tapambobimbuecquin Nuquin Papa matses bëdambuen ismequid nec. Adquid yec abuc nidshun Nuquin Papa chiec: Ubi tantiaquido matses bëdambuen ista, quequin chiannec. Aden chiannequid nec, queshun chieshtoenquio icquin Esus tantiaquionona.

Ebedeo 6:19

Aden nuqui cainaid chieshtoenquio icquin tantiaquin: Ënden aton shubumpin ëquëducquio nëish iua cuessunneshun pichicaquidon chuiquid tapa puduedampicpadombuen Nuquin Papa yacnombo puduedquin nëbi ubi bëdambuen ismequid nec, quequin nuqui Esus tantiec. Aden nuqui cainaid cano dapa uidën uate dapambo iuëmbocquidbimbuecquid nec. Utsi tantienquio nuqui iquendac.

Petedo 1 1:3

Nuquin Papa, Nuquin Icbo Esuquidistun Papa, bëdamboshë iquec, canuna naden tantiaquin: Icsambuen naquido cuidte bunenquio icquin uincuenmequin chuca nuqui icmenuen Nuquin Papan abided cuidadec uënësaid Esus nuqui tantiamiondash. Adoac nuqui naden tantiec: Esuquidistu uënësacsho chococac uincuenash padpidec uënëstiapimbo iquendac. Adembidi Esus tantiec uënësacsho uincuenmeshun Nuquin Papan abi yacno nuqui tabadmendac padpidec uënëstiapimbo icnuc.

Petedo 1 1:5

Aden Nuquin Papa tantiaquidombo icsho isash: Aid tantienquio yannushe, quiash nadatiambocquin nabanquid icquin Nuquin Papan nuquitedi dayunuaic: Abitedimbo cuidquin chuibante uëshëmbi Esusën bedtanacsho: Ubi yacno tabadmendambi, quequin Nuquin Papan nuqui dayun uaindac.

Uan 1 2:27

Adec muaquid icnuc Nuquin Icbo Esuquidistun abi tantiasho mibi meniaid mibëd icquin aton Mayanën tantiamiac Nuquin Papan Chiaid mimbi bëdambuen tantiec. Adembidi Nuquin Papan Chiaidtedi tantiamequin abimbo tantiamec. Aden aton Mayanën tantiamiac Esusbëd abentsëc yacbimbuec tabadquid icta.

Esusën Uan ismiaid 2:10

Aidon ubi mëyantsiash, quec dacuëdec natienda. Mayan Icsa Satanasën: ¿Ada Esus tantiaquido chieshtoenquio ictsiashe? Tannu, quequin namiacpadombuen chieshëmënquidon mibitedi utsi utsien quënën tsadunendac. Adoac 9tedec ushec mibitedi natiec mëyadendac. Puduenabi yec chieshtoenda. Ubi tantiaquido icsho: Cuessunnenu, cac dacuëdenda. Aidon cuessunniacsho bëdamboshë icquid meniacbimbuen ubëdi tabadmendambi padpidec uënëstiapimbo icnuc.