Codinto 2 12:21 - El Nuevo Testamento en matsés

²¹ Adecbidi padpidec mibi yacno niduashun adquid icsho issun: Umbi Esuquidistu chuibanondaido nec, quesho Nuquin Papan tantiamiac natiaquiec bëpiumane, queshun dada uaic nebi. Icsambuen nadednequidën ambi icsambuen naid ënabi icsho isash shubimane, queshun dada uaic nebi. Ambi natemaidi naic chudnanquin ambi icsambuen naid ënenquio icquin ambi icsambuen naid utsi dadpen ënenquio icpec, quiash shubiendabi.

Codinto 2 12:21 ပူးပေါင်းရင်းမြစ်များ

Doma 13:13

Icsambuen nainquio yec bëdambuec tabadquid nebi, queshun peteuidi nua penquio yec tabadquinc tantiadennuen acte paë uaid aquenquio icquinc utsin chido chudenquio icquinc utsin bënë chudmenquio icquinc canuna. Adecbidi utsina isash cuna adquid nibëdec, quiash chieshëmënec tabadenquio icnuna. Adembidi utsin namesho isash chieshëmënenquio icnuna.

Codinto 1 5:1

Mibëd Esus tantiec iccuededquid abentsëcshun aton papan chido aton titatsibi bedaccosh, quequin chiec onquesho tantiombi. Aden ambi natemaidi bedshun chudaid icsamboshëcquid nec. Nuquin Papa tantiesabombi aden nambo iquec.

Codinto 2 10:6

Aden tantiaquid dadpen matses iccuededsho issun Nuquin Papan chiacpadombuen nainquio icquin utsin utsinquien ënenquiocsho cumapenen mibi chedobëtabi chushcaindambi: Ma Esus tantiec abitedi bëdambo iccuedednu, queshun.

Codinto 2 12:7

Nuquin Papan abi yacno indoshon dadpenquio ismiondac bëdamboshëcquid nebi, quequin chuinushe, queshun Mayan Icsa Satanasën chomiaidën natiamedednepondashi. Aden natiamiac pinchuquën siadaid nami ëquëduc nidash chiquidtiapimbo yacbimbuec cun dada paëmbo yannec. Bëdanenquio iquec.

Codinto 2 13:2

Tauambuec nidshun Esuquidistu chuibanac aid tantiaquido mibitedi yanondac. Padpidec nidash pudueduashun icsambuen nadednequid icsho issun: Mimbi icsambuen naid ënta, caondambi. Aden chiondashumbic uannombo icquin nëbi mibitedi chuiuaimbi. Padpidec nidash pudueduashun Nuquin Papan tantiamiacpadombuen icsambuen naquid utsibobëta cumapenen chuiquin chushcaindambi, quequin chuiuaic nebi.

Codinto 2 8:24

Aido chosho issun bëdambuen isquin tantiata. Ma umbi chuibenniacno Esus tantiaquidon mimbi naid chuisho tantiashun naden chuinu: Pabadon chiacpadombuen Codinto yacnocquid Esus tantiaquido bëdambuen naquido nec, ma quenu.

Cadasia 5:19

Nadquio icsateuidi bunquid matses iqueque. Tantia. Chuinu. Nëidic aton chidopenquio chudquido. Nëidic aton bënëpenquio chudmequido. Nëidic ambi natemaidi naic chudnanquido. Nëidic abi bunaiduidi naquin mëmunesabo. Nëidic chuitemaid chuiquin icsamete bunquido.

Codosas 3:5

Adec Esuquidistubëd tabadec bëdamboshëcquid iquendabi, quequin tantiaquin mimbi icsambuen nabanaidtedi cuessun secacbimbuen mibitedishun ëmbanta. Adshun: Umbi chudtemaid chudnu, quenquio icquin ënta dadan. Umbi chudmetemaid chudmenu, quenquio icquin ënta chidon. Aden natemaid bunmec dasiuidenda. Adembidi mimbi icsambuen nate bunaidtedi ënta. Adembidi mitsana dadpen bedteuidi bunaid ënta. Mimbi: Bednu, quequinuidi tantiaid matsesën ambibi nacnenshun: Papa, quequin tantiacbimbuecquid mibi bedte bunaid nendac.

Ebedeo 13:4

Min chido bedash aidbëd abentsëc yacbimbuec bëdambuec tabadta. Adquid yec: Cun chidopenquio chudnu, quesa iquec chido utsi isuidquid icta. Adecbidi chido yec: Dada utsi chudmenu, quesa icta. Adecbidi abitedishun natemaidi naic chudnanquin nanu, quesa icta. Aden mimbi isuidenquio icquin nabansho issun Nuquin Papan mibi cuidendac.

Petedo 2 2:18

Adec muaquido bëdambuec onquiacbimbuec ambembi chiec onquec. Utsin chiaid tantienquio icquin ambi tantiaiduidi naden chiec: Mibi bunacpaden mimbitsen: Nata, cac Esus tantiactsëcquin Nuquin Papan Chiaid naquin ambi icsambuen naid ënuidbuedi padpidembuec icsaindac. Aton chidopenquio isec chudte bunquin ambi icsambuen naid ënte bunenquio iquec. Chido dada utsi chudmete bunquid chudmequin icsambuen namec. Adquidotedi Nuquin Papan cuidtequidombo nec.

Udas 1:23

Bacuëmpi cute nëdënquiacno nidsho: Baded bed. Pichiquenushe, quiacbimbuen Nuquin Papan chian annëdënquiacno nësecaquin cuidnushe, queshun utsibo tantiamequin Esus chuibannuna. Icsaquidotsen bëdambuen isnuna. Esus tantiamenuen aido bëdambuen isec: Ubitsen icsamane, quiash aido icsacpadec icsainda.

Udas 1:7

Adecbidi shubu dadpen icquid Sodoma yacnocquidobëd Comoda yacnocquido chido piucquid bedec chudadquid dadpen icpampic. Adecbidi aton chidopenquio chudquid dada dadpen icpampic. Adecbidi chido aton bënëpenquio chudmequid icnubi aton dada utsibëdi chichudnanquido icpampic. Adecbidi shubu dadpen icquid utsi utsiec anoentsëc icquido icsambuecbidi tabaduapampic. Adec tabadsho issun cuidquin Nuquin Papan natiamequin uesquin nëdëncapampic. Aden cuidampid tantiaquin: Icsambuen naquidotedi chian annëdënquiacno nësecaquin cuidquidquio Nuquin Papa nec, quequin nuqui tantiec.

Esusën Uan ismiaid 21:8

Adoshombic nadquidtedi cuidendambi. Nëidic dacuëdquin ubi tantiauidbuedo. Nëidic Esus tantiesabo abitedi. Nëidic chieshëmënquido. Nëidic chieshëmënec cuessunnianquido. Nëidic aton dada utsibëdi chichudnanquido. Nëidic chido daëd dachudnanquido. Nëidic aton chidopenquio chudquido. Nëidic aton bënëpenquio chudmequido. Nëidic nënëchoquido. Nëidic ambibi nacnenaidi papa caquin tantiaquido. Nëidic mua uanquido. Aidotedi chian dapa ënëdenquio yec annëdënquequid icsamboshë nuadquid asupede caid padpidec uënëste caid yacno nësecaindambi, queposh.

Esusën Uan ismiaid 22:15

Adec aido tabadnubi nadquidtedi ambo puduedtiapimbo yec umanucquio tabadendac. Nëidic icsambocquid yec chieshëmënquido. Nëidic nënëchoquido. Nëidic aton dada utsibëdi chichudnanquido. Nëidic aton chidopenquio chudquido. Nëidic aton bënëpenquio chudmequido. Nëidic aton chido utsibëd dachudnanquido. Nëidic chieshëmënec cuessunnianquido. Nëidic ambi nacnenaid papa caquin tantiaquido. Nëidic abi bunaiduidquio naic mua uanquido. Adquidotedi Nuquin Papa yacno puduedtiapimbo iquendac.

Esusën Uan ismiaid 22:20

Ma aidtedi tantianu, quequin ubi chuibanquid yec: Ai, nëbimbobini nidaid yacno budendac, queposh. Adsho tantiashun: Amen. Ai, abimbo mimbi caique. Chota, Cun Icbo Esus. Capombi.