Génesis 35:2 - Sharanahua: Diospan Tsain2 Nicatan Jacob ahuun yorafo yoini isca huaquin, —Nan rami huafo maton dioscoinma man aya cuscan potafain nashitacahuun maton sahuutifo rama patsamuafo sahuucahuun. အခန်းကိုကြည့်ပါ။ |
Ayacaquin yoinifo isca huaquin, —Nocon diosfofin fasi sharaquin. Nocon diosfo non rami hua oro rami huafain platahuunoa rami huafain cuno broncehuunoa rami huafain cunu hierrohuunoa rami huafain ihuihuunoa rami huafain toquirihuunoa dios futsafo non rami huani. Nanfofin nantifi fasi sharaquin, —ishon yoinifo.
Uhuun yoramishtichin Upa Diosin noco nannori yoiyotiani cuscan shara. Ascashu non isharanon. Nantifi nocon chaca non shatunon. Ahuarafoan nocon caya iyamarai nocon nomuran noco chaca huamatiro nanfo non shatucoianshu nan cuscara shara non itiro. Non Upa Dios noicoianshu a cuscara shara fusti non ipainon.
Ascacun non Jesús icoinra huacun nan noco nashonihuunshon nocon ointi funa sharacoin huashotiro. Ascashocai non chaca huamisi cuscan afanan non shinantiroma nocon nomuran unimacoinon. Ascashon noco nan unu tsosi sharapan nashimana cafisca noco huatiro. Non afanan ahuashta chaca nocon nomuran shinanonma. Ascan nan iconcoin Upa Dios fu rafuashu non afu tsainshquin.
Ascatari Dios fu rafucahuun a cufifafaincahuun. Man ascaino matofu rafucacaitiro. Man chaca huamisi cuscan shatucahuun. Ascashu afanan ointi rananya iyamacahuun. Man Dios tanafiashon nantianricai nan icoinra huamafoan acai cuscan man huatiroma. Ascaquicai man tanasharatiroma. Ascashon maton nomuran man shinanchacamisi cuscan shatucoincahuun.
Nocon Ifo Diosin noco yoia cuscan man man nican. Ascacun Diosihuunoa shinansharafain a nicasharacahuun noco yonoai cuscan non huanon. Unu Eufrates fari iquiaiquirinoa yafi Egipcio ano nocon shunifoan dioscoinma cufinnifo. Manrifi asca huayamacahuun. Nan rami huafo potacahuun. Nocon Ifo Diosi fusti cufinfain mato yoiai cuscan fusti huacahuun.
Ascan man nocon Ifo Diosi tanapaiyamaquin catoncahuun tsoan oinmatimain man ipaicain. Unu Eufrates fari iquiaiquirinoa maton shunifoan dioscoinfoma aton oinmati ipaonifo. Ascano nan Amorreofoan aton dioscoinfoma man aton oinmati ipairaca. Nantian Amorreofo mai ano man ica. Ascacun catoncahuun rato diosmain matona itiroquin mato yoia cuscan man anon. Ascafia un non uhuun yorafoan non nocon Ifo Diosi fustiton noco yonoa cuscan non huairan, —ishon Josué Israelifo yoini.
Ascaiton Josué ato cumani isca huaquin, —Man yoia cusca iconmainquin caifo futsafoan aton dioscoinfoma potacahuun. Nocon Ifo Diosi yoicahuun isca huaquin, “Ifo Diosin, nonfin min oinmatiquin. Min noco yonopaiyai cuscan non mia ashoshquin. Min nocon Ifo. Min nocon Diosin. Nocon nomuranshon non mia fasi noicoin,” nannori nocon Ifo Diosi iconcoin fusti yoicahuun, —ishon Josué ato yoini.
Ascan futsafohuunoa un mato yoinon isca huaquin. Ahuara non coapaiyamafiaino chi muran pacuaiton non nushfiriscatiro cononma. Nanscarifi aqui futsan chaca huafafainmisi cuscan shatuataicuma numariscahuun. Ascashon ato yoicahuun aton chaca arifi shatuyamashu chi muran iquinonfoma. Ascan futsafoanri fasi chacacoin huamisifo. Nanscarafohuunri ramapaicahuun. Ascafia oinfain marifi man ato cuscara chaca huamisi iishcaquima. Atohuun ramapaitan nan ahuarashta chaca huaifo cuscan noicasmacoincahuun.
Yocaifoan ato cumani, —Uncai ahuuscai oama. Un nocon Ifo Diosi moi facuoma rutushoni oa. Un moi facuoma rutuano marifi uqui fucahuun non Dioshuunoa yoisharafain non cufinon. Nanton noco amapaiyai cuscan fusti non atiroquin. Ascan Moisés yononi cusca acahuun. Ascaquifin man nocon Ifo Diosi ahuunacoinshon man ismatiroquin, —ishon Samuel yoini. Asca huatan Isaí furufo futan Moisés yononi cuscan Samuel ato ashoni. Nanton moi facuoma rutuano a fu nanno inonfo.
Nantian Samuel nantifi Israelifo yoini isca huaquin, —Iconmainquin man nocon Ifo Diosiqui nasocoianmainquin caifo futsafoan aton diosfo rami huafo potacahuun. Nan rami huafo ahuun anu Astarté ointsafo nantifi potacoincahuun nocon Ifo Diosi mato amapaiyai cuscan huaashquin. Nan fusti ifohuacahuun. Man nanscaiton nocon Ifo Diosin mato numai Filisteofoan afanan mato ahuusca huanonfoma, —ishon Samuel ato yoini.