Efesios 3:9 - Sharanahua: Diospan Tsain

⁹ Upa Diosin nantifi onihuanonpacoai cuscan afin tapiyoni. Tsoashtacai Jesushuunoa tapiataima. Ascacun ua catonni manifoti Furunhuunshon un ato yoinon. Upa Diosin ua tapimani cuscacai atirifi tsoa tapimayoima.

Efesios 3:9 ပူးပေါင်းရင်းမြစ်များ

Mateo 10:27

Ahuara un mato fusti yoimisi nanfo nantifi yorafo cayacafi ato yoisharacahuun.

Mateo 13:35

Nannori Diosin tsain yoimisiton nan Jesús yoinon pacoai cuscan cunuqui isca huani, “Un ato ahuara futsahuunoa ato yoi ato tapimashquin. Upa Diosin nantifi onihuani chain tsoan ascara nicayomisima cuscarafo un ato yoishquiran,” ishon yoini cuscacoin man aa.

Mateo 25:34

Ascatan un Niaifoshon nan ua tanamisifo un yoiqui isca huashquin, “Uqui fucahuun. Uhuun Upa Diosin mato unimamanon. Nan mai onihuaitian matohuunoa shinanquin isca huani, ‘Un icano un ato iquimanonpacoi uhuun yorafo inonfo. Uhuunafori atona inonpacoiran,’ ishon Upa Diosin shinanyoni.

Mateo 28:19

Ascacun manifoti anoafo yoifoanfafaitacahuun ua icoinra huafain ua tanasharanonfo. Uhuun Upa Diosin ahuun anuhuunshon yafi uhuun anuhuunshon non Diospan Yoshin Sharahuunshonri yorafo unu muran iquimashcaquin.

Juan 5:17

Ascaiton Jesús ato yoini. —Uhuun Upa Diosin shafatifi yora shara huafafainmisi. Nanscarifi aqui urifi uhuun Upan acai cuscan un huafafainiran, —ishon ato yoini.

Juan 5:19

Nan shinainfo cuscan Jesús onanniquin. Onanshon ato yoini isca huaquin, —Un mato icon yoinon. Ua nicacahuun. Uficai un ahuashta huaima. Uhuun Upa Diosin acai cuscan mun oinmisi. Nanscacoin urifi un huai. Ahuunshon fusti un aquin.

Hechos 15:18

Diosin ahuamamishti tapian. Icataima inonpacoai cuscan yoiyoniran,” ishon cununi.

Romanos 11:25

Uhuun yoramishtichin, tsain futsanhuunoa man shinanmisima un mato tapimai maton nomuran man shinanon. Nan tapianshu cacapaimisi man inonma. Icon natian uhuun caifo Israelifoan aton ointi curushu Diospan tsain shara Jesushuunoa nicacasmacani. Ascafia uhuun caifomafoan ahuun unutaqui Jesús icoinra huaifoan Upa Diosin ahuun yora imashquin. Nantianricai afanan uhuun caifoan nicacasmamisi ishcanima. Ascano nantifi Israelifoan Jesús icoinra huaifoan Upa Diosin ato numai ahuun yorafo inonfo. Nannori nocon shuni Isaías cununi isca huaquin, “Nocon Numamisi Sión ano icaquin. Afin Israelifo numai oi afanan chaca huanonfoma.

1 Corintios 2:7

Non mato Diosihuunshon yoimisi cuscan huafaincai tsoan tapiyopaonima. Cristo yorafotihuunoashu nashoshquiai cuscan Diosincai ato tapimayopaonima. Diosin mai onihuataima shinanquin isca huani, —Uhuun Furumun ato chipo nashoshquin nan a icoinra huafoti ato nimapacushquin, —ishon shinanyoni.

Efesios 1:4

Mai oni huataima Jesucristohuunshon Upa Diosin noco catonni ahuun yorafo non inon. Ascacun nantifi nocon chaca soashofain nan Furun cuscara shara non inon.

Efesios 3:2

Upa Diosin mato shinanfain matohuun ramapaicain mato tapimapai. Ascashon ua catonfain matoqui ua nichini un mato yoinon.

Efesios 6:19

Ascashon uarifi cufishocahuun Diospan Yoshin Sharahuunshon ahuun tsain shara ranotama un ato yoifafainon. Nan uhuun caifomafohuunoashuri Jesús ato nashoni un yoinon.

Colosenses 1:23

Ascano nan tsain shara Jesucristohuunoa icoinra huashon man ahuara futsa shinanyamaitocai Upa Diosin matohuunoa yoipacunacama isca huaquin, —Min fasi chaca huamisiran, —ishoncai yoipacunacama. Ascatamarocon man icoinra huaaquin unuyamaiton oinquin nan mato yoiyotiani cuscaino mato ihuishquin man afu ipanon. Man Jesushuunoa tsain shara nicaquin tau huani cuscan nannoricoin un manifoti ato tapimani. Ascacun unquian Pablo un Upa Diosin tsain yoifoanfafainmisi Jesushuunoa ato yoishquin.

Colosenses 1:26

Nan tsain Jesucristohuunoacai noco shunifoan tapiyopaonifoma. Diosin tsoa tapimayopaonima. Natiantan Diosin rama shara noco tapimani. Non ahuun yorafocun.

Colosenses 3:3

Afanan un mato yoi Cristo noco nashoni. Ascan manfin afu naa shinantsayoniquin. Natianfin man Cristo fu rafucain Upa Dios furi man icacaini. Nanscarifiai mato furi Upa Dios icacaini. Man ascafiaitocai tsoanshta ointirofoma man Cristo fu rafuai cuscan afu isharashcaquin.

Colosenses 4:3

Ascashori nocori cufishocahuun Upa Diosin mani futsafoanri noco nichiano non Cristohuunoa ato yoinon. Nannoa icafoancai tsoan Cristohuunoa nicayomisima. Ascan un Cristohuunoa tsain shara un yoiaiton ua futsafoan cunu muran iquimanifo.

2 Tesalonicenses 2:13

Ascafia uhuun yoramishtichin mancai ascarama. Nocon Ifo matohuun noicoinquin Upa Diosin mato catonni. Ascano mancai omitsiscapanacafo muran catamarocon ahuun Yoshin Sharapan ahuun tsain iconcoin man man icoinra huaa.

1 Timoteo 3:16

Icon atirifitocai tsoan Diospan tsain tapiataima isharashcaquin. Ascafia Jesushuunoashu non isharatiro. Aafin Apa Dios icariashu mai ano fotoni nocon cuscara yoracoin iishquin. Ascatarifi Diosin Yoshin Sharapan ismapaoni Jesuscai ahua chaca huamisima icon fustisi imisi. Diospan oinmati afu nai muran icafoanri oinnifo. Ahuunoashu manifoti futsafoan yoiqui isca huamisifo, —Jesús Upa Diosin facu. Ascashon arus fusti maton chaca soashotiroran, —ishon yoifoanfafainmisifo. Yoiaifoan nicacanashu atirifi manifoti anoshon icoinra huacani. Ascashu Jesús naafiashu mai murannoashu funini. Chipo afanan Apa icano nuinacahuani arifi nantifiton aton niaifocoin iishquin.

2 Timoteo 1:9

Ascano Upa Diosin noco numani non ahuun Furun cuscara shara inon. Non ahuara shara huaa rafanancai noco numanima. Afin apaiyai cuscan noco numani. Nocohuun noiquin noco numani. Ahuarafo oni huataima Jesucriston nocohuun ramapaicain nocohuun noia.

2 Timoteo 4:17

Asca huafiaifoanno nocon Ifo ufu ica. Ahuun curush ua inan un fasi chai ahuun tsain shara uhuun caifoma un yoiaiton cayacaficoin nicasharanonfo. Ascashon nocon Ifoan ua numani masharofo muran ua potanonfoma.

1 Pedro 1:20

Upa Diosin mai oni huataima Furun Jesús catonni noco Numamisi inon. Ascafia futsafoancai tapiyopaonima natiantan Diosin mato tapimana.

Apocalipsis 13:8

Ascan nanfoan nantififain nan yoina pofu cuscara noishcani. Ascashon yoiquin isca huashcani, —Minfin nocon Diosiquin, —huashquicani. Ascaifoancai nocon Ifo Jesús aton anu ahuun libro muran cunuima afu nipanonfo. Mai oni huataima Jesús nantifi icoinra huanonpacoaifoan ato anufo ahuun libro muran iquisi cunuyoni afu ipanonfo. Ascashu nan chashoanun facu cuscarashu noco nashoni noco nimapacushquin.

Apocalipsis 14:6

Ascatan un oian Diospan oinmati futsan afu nai muran ica fasi cuyacoin noyaino nantifi yorafo maifoti anoafo tsain shara ato yoinon. Caifoti yoifain shoco futsafoti yoifain nantifi tsain futsa futsatapafo yoimisifoti yoifain manifotiri ato tsain shara yoinon. Upa Diospan tsain nipanacahuunoa ato yoia.

Apocalipsis 17:8

Nan yoina pofu min oian yoinacoinma. Afin niaifo uhuapa chacacoin. Nanscacun Dios noicasmamisi. Niyopaoni. Natian niyamafiashu chipo nan yoshin chacafo icanoashu cainshquin. Nannoashu cainfiacun Upa Diosin omitsiscapanacafo muran potashquin afanan anoashu canacama huaquin. Tsoan Jesús icoinra huamacai aton anu ahuun libroqui cunuama afu ipanon. Nanfoan na niaifon yoina pofu cuscara oincashon mustairitan, “¡Aira! ¡Oincapon! Man nafiacanashu afanan oaran,” ishon yoishquicani.

Apocalipsis 4:11

Ascan minfin isharamisiquin. Ascacun mihuunoa fusti non yoitiro isca huaquin. Min nocon Ifocoin. Min nocon Dios. Tsoa futsacai mia cuscara sharama. Min isharapacunaca. Ascacufin non mia fasi noicoinquin. Ascan minfin min shinanpasi ahuamamishti huatiroquin. Min nantifi ahuamamishti onihuani. Min apaiyai cuscan fusti nantifi min onihuani. Ascacun minhuunoashu fusti nitiroforan,” ishon nan Jesús tanamisifo veinte cuatro yorafoan yoiafo.