Daniel 4:31 - Sharanahua: Diospan Tsain

³¹ Nannori yoitapaiyaino samamashta nai murannoa tsain nicaquin isca huani, —Niaifon Nabucodonosor, ua nicasharahuu. Min afanan nunoa niaifoma. Mincai afanan nunoa tsoa yonotiroma.

Daniel 4:31 ပူးပေါင်းရင်းမြစ်များ

Génesis 14:18

Nantiari niaifo futsan ahuun anu Melquisedec Abramqui noconi. Nan Melquisedec Salem pushu rasi anoafoan aton niaifo ini. Ascan Diosifin nantifi mai anoafo yafi nai murannoafori finoncoianquin. Nan Melquisedec yorafohuunshon Diosi cufinmisi ipaoni. Nanton misi yafi fimi ahuun anu uva Abram fushoni.

Salmos 145:13

Nocon Ifo Diosin minfin nantifi yorafo iquipacuquin unupacunacama. Nantishotapiquin min yorafo min aton Ifo iquicai min unupacunacama. Min noco yoiyomisi cuscan nanscara min huamisi. Nantifi min oni huafoti min atohuun noicoin.

Daniel 4:24

Niaifon, min namapan un mia tapimana cuscan nannoricoin. Ifo Diosi nantifi finoncoinshon nan yonoa cuscan ashquin,

Daniel 4:26

Nan min namapan min oian cuscan ihui ahuun foro yafi ahuun tapofo nituan cuscan. Nanhuunshon Diosin mia tapimapai min yoiquin isca huanon, “Ifo Diosin nai muran icaton nantifi manifoti ato iquinaran,” ishon min yoiafin afanan min niaifocoin iishquicain. Manifoti min ato iquishquin.

Daniel 4:30

Fomancayashon pushu rasi oinquin yoini isca huaquin, —¡Aicho! Unfin nan pushu rasi Babilonia anoa acaquin nanno niaifo inon. Unfin uhuun curushhuunshon acaquin nuno ishquin. Nantifiton oincaquifin tapitirofoquin unmain ahuamamishti huatirocun, —ishon yoini.

Daniel 4:32

Yorafoan min pushu muranshon mia nichicani afanan yorafo fu itamarocon min fasi fununun cai yoinafo icano. Nan moifoan fasi pitiro cuscan min nansca huai. Siete fari finontan min yoishquin isca huaquin, “Ifo Diosin nantifi finoncoian. Nantofin nantifi manifoti ato iquinanquin. Nantofin ratoran yora niaifo imapaiquin imatiroquin,” ishon min yoicairan, —ishon nai murannoa Nabucodonosor oi nicani.

Daniel 4:34

Ascan siete fari finontanaino Nabucodonosor yoini isca huaquin, —Unfin Nabucodonosor un Diosi icari nai muran foisicai un afanan niso itamarocon cayacafi un afanan shinanni. Un Diosi cufini isca huaquin, “Diosin min fasi nantifi finoncoian. Min fasi sharacoin nipanaca. Tsoa futsacai mia cuscarama,” ishon un cufini. Nan Diosifin nantifi yorafo iquipacunacaquin. Nan manifotiton aton niaifo faritifi ipanaca.

Daniel 5:20

Ascashu min shuni Nabucodonosor chipo cacapaimisicoin ipaoni. Ahuun nomuran mutocoinquin shinanquin isca huani, “Tsoa futsacai ua cuscarama. Unfin nantifi uhuun mai ano afo un oni huaquin. Nanscashofin nantifi un finoncoianran,” ishon ahuun nomuran shinainton Ifo Diosin yonoa cuscan ahuun yorafoan nan potanifo afanan niaifo iyamacain afananricai isharamisi cuscan anima.

Daniel 5:28

Nan tsain Parsin: maton tsainman yoia isca huaquin, “Min mai man ato pashcanan huaquin futsai. Atirifi Medofona icaino atirifi Persafona iquiran,” —ishon Daniel yoini.

Daniel 6:27

Nanton yorafo numafain ato nimapacunaca. Tsoa atiroma cuscan ato ismafain tsoan oinyomisimari nai murannoa yafi mai anoafo ato ismamisi. Ascashon nanton Daniel numaquin masharo pofufoan ahuusca huanonfoma, —ishon niaifo Darío ato yoini.

Mateo 3:17

Ascano nanno niafoan nai murannoa Upa Diosin ahuun oi nicanifo yoiquin isca huaiton, —Nan uhuun Facu un catoan. Un fasi ahuun noi. Un fasi aqui unimacoinran, —ishon Apa Diosin yoini.

Lucas 12:20

Ascashon anori shinanfiaiton Diosin yoini, “Mincai ahua tapiama. Na yamutafin min naicain. ¿Min naanomun na min mucuafo ahuuscaiquin?”

Juan 12:28

Upan, Uhuunshon ato oinmahuu min fasi shara, —ishon Jesús yoini. Yoiaiton nai muranshon oi ashcafinin Apa Diosin cumani, —Un minhuunshon un ato ismafafaini un shara. Nanscarifi un afanan huai, —ishon yoini.

Apocalipsis 16:7

Asca huashon Dios icanoa nai muran nan cufiti ano fustishosi Upa Diosin cufinmisifo anoa un futsanfo nica yoiquin isca huaifoan, —Nocon Ifon Diosin, min nai oinmati yoia cuscan iconcoin. Mia nicayosma shunifo min ato icon cayacafi ato onaintimairan, —ishon yoiafo.

1 Samuel 13:14

Ascashucai min non min facufo Israelifo aton niaifo ipatiroma. Aafin shinain cuscan nocon Ifo Diosin nocofunu futsa nan shinain cuscaran catoinquin Israelifoan niaifo inon. Nocon Ifo Diosin mia yonoa cuscacai min aama. Ascan natiafin nocon Ifo Diosin nocofunu futsa catoinquin. Nan ahuun tsain tanapai nanfin Diosin catoin nocon caifoan niaifo inon, —ishon Samuel yoini.

1 Samuel 15:23

Shointi yafi yoshin chaca fu tsainqui chacacoin. Nanscarifiai nocon Ifo Diosi mia yonoa cuscan min ayamai nanrifin chacacoinquin. Ahuara afi rami huacashon cufimisifo cuscan fasi chacacoin. Nanscarifiai nocon Ifo Diosin mia yonoa cuscan min nicacasmaifin chacacoinquin. Nocon Ifo Diosin mia yoia cuscan min acasmaiton natian nocon Ifo Diosin afanan mia niaifo imapaimaran, —ishon Samuel yoini.