Apocalipsis 9:20 - Sharanahua: Diospan Tsain

²⁰ Atirificai afohuunoashu nayamafiacani aton chaca shatuafoma Upa Dios tanashcaquin. Ascatamarocon yoshin chacafo tanamisifo cuscan shatuyamafain oro iyamarai cuno oshopa sharashta non cuno futsan ahuun anu bronce non toquiri non ihuirifi ramihuafo. Ascafia nanfoancai ahua oinyamafain nicatirofoma raquiri cahuascatirofoma, —Naan nocon Dios. Non ahuun noiran, —ishon yoimisifo cuscan shatuafoma.

Apocalipsis 9:20 ပူးပေါင်းရင်းမြစ်များ

Daniel 5:23

Ascatamarocon min futsafo shinanmapaiquin isca huaiquin, “Unfin Dios nai murannoa un finoanquin. Diosi nai muran icacai nancai ahuamaran,” ishon min yorafo shinanmapai. Ascan nan cuchofo Diospan tsainti pushu murannoa funifo min non niaifo patasharinoafo non maton ainfofoyashon nan cuchofoan man vino aya. Min yoia isca huaquin, “Noco diosfo shara. Non ato ramihua platahuunoa non orohuunoa non cuno broncehuunoa non cuno hierrohuunoa non ihuihuunoa non toquirihuunoa ato ramihua. Nanfo fasi sharacoinran,” ishon min yoia. Nanfoancai oinyamafain nicayamafain ahua tapitiromafofiacun. “Nocon diosforan,” ishon min afohuunoa yoia. Mi fu fusiafoanri nannori yoiafo. Anori yoifiaquicai min Ifo Dioscoinhuunoa yoi sharamisima. Nantomain mia nimatiro iyamarai mia namatiroquin.

Daniel 5:4

Ayacaquin yoinifo isca huaquin, —Nocon diosfofin fasi sharaquin. Nocon diosfo non rami hua oro rami huafain platahuunoa rami huafain cuno broncehuunoa rami huafain cunu hierrohuunoa rami huafain ihuihuunoa rami huafain toquirihuunoa dios futsafo non rami huani. Nanfofin nantifi fasi sharaquin, —ishon yoinifo.

Mateo 21:32

Juanpan mato yoisharapaoni isca huaquin, “Man chaca huamisi cuscan shatufain natian Dios shinancahuun,” ishon mato yoipaoni. Ascafiacai man icoinra huanima. Nan niaifo pui fishomisifo futan ainfo furomafoanri icoinra huaifoan oinfiaquicai maton chaca shatuyamafain man icoinra huamisimaran, —ishon Jesús ato yoini.

Hechos 17:29

Iconcucain nocofununcai afin Dios oni huatiroma. Cuno chashna faca facaitsa iyamarai cuno oshopa iyamarai toquiri nocofunufoan rami huafiatirocai Diosin ascarama.

Hechos 19:26

Ascafia man man nicamisi na nocofunu Pablonun noco yora ichapafo Efeso anoafo amaquiri shinanmana. Non rami huafocai diosima. Ahuamafinquin ato huamisi. Ascan yoimisi cuscan atirifiton icoinra huafo.

Hechos 7:41

Nantian Aarón ato moipan facu cahua shara ointsa rami huashoni aton Dios inon. “¡Aicho! Nan moipan facu cahua shara ointsa non rami huaa. Nan nocon Dios. Non ichananshotiro moi futsa rutushoshquin a fufori ratashoshquin nocoquin unimanon. ¡Aicho! Non rami huaa cuscan shararan,” ishon yoinifo.

2 Corintios 12:21

Man asca huainofin un matoqui nocoaitian un ratuicain. Maton nomuran man ahuarafo shinanchacafain maton nomuranshon man chaca huapaiyai cuscan huariaino. Nocofunufoan aton ahuinma fu icaifoanno ainfofori aton funuma fu icaifoanno. Nanscara chaca futsa futsatapafo huafiain man maton chaca shatuashma Diosiqui man afanan nasoyamaino. Un matoqui nocoshon oian man asca huaino un ratutiro. Maton ointaifi uarifi Diosin matohuunshon ua rafimashquin. Man acai cuscahuunoashu un fasi omitsiscatiro. Ascacun un uaiyanan mato oinmai.

Deuteronomio 4:28

Man mai futsa ano icaitian aton dioscoinma nan ihuihuunoa iyamarai toquirihuunoa ahuara ointsa rami huafo. Nanfoancai ointiroma icain nicatirofoma icain pitirofoma icain shututirofoma. Ascafia nanscarafo yora futsafoan ato cufiain cusca marifi ato futan man cufinshquin.

1 Timoteo 4:1

Diosin Yoshin Sharapan noco cayacafi tapimayoni atirifiton Jesús potaifo cuscan. Ascashocai afanan icoinra huapaitama nan yoshin chacafohuunshon ato yoipaiyaifo ato tanacani funoshcaquin.

Apocalipsis 15:1

Ascatan uhuun namapan ointsa un ahuara futsan un oian. Tsoan oinyomisima cuscara nai murannoa un oian. Oin uhuun nomuran, —¡Uru! —un ica. Natian un oian cuscan mato tapimanon. Nicacahuun. Diosin yora yoitimashunifoqui fasi sinaiquin. Ascacun ahuun oinmati siete afu icafo ato yonoa nantifi mai anoafo onaintimai omitsiscanonfo. Nan ahuun unutaqui Upa Diosin ato onaintimai. Afanancai atoqui sinaquin ato onaintimashquima.

Apocalipsis 16:8

Ascatan Diospan oinmati afu ica futsan Dios icarishon ahuun tutso murannoa ahuara chaca fari camaqui ocashquin. Ocano farihuunoashu yorafo coa.

Apocalipsis 9:19

Aton ashfa futan ato inan yorafo rututiro. Aton ina nan rono paupaton ina cuscarafo. Nanfoan yorafo omitsisca huafo nanonfo.

Apocalipsis 9:21

Ascashon chaca futsa futsatapafo huamisifo cuscan shatuafoma. Rutumitsamisifo cuscari shatuyamafain shointian cuscan shatuyamafain nocofunufo aton ahuinma fu imisifo cuscan shatuyamafain ainfofori nanscarifiaifono. Onumisifo cuscari shatuafoma. Ascashu nanfo chacacoinfiashon tsoan aton chaca shatuafoma nocon Ifo Jesucristo tanasharashcaquin.