Apocalipsis 13:15 - Sharanahua: Diospan Tsain

¹⁵ Ascacashon ato yonocun Satanashuunshon man ramihuafo nan yoina pofu cuscara ointsa man shacaimana. Ascano shacaitan nan ramihuafoan tsaincoinin yoia isca huaquin, —Ua ifoacahuun. Min Diosiran ua huacahuun. Tsoan ua noicasmaquin nannori yoicasmaiton nan rutucahuun, —ishon ato yonoa.

Apocalipsis 13:15 ပူးပေါင်းရင်းမြစ်များ

Génesis 2:7

Ascatan nocon Ifo Diosin mai fishon yora huaquin futsashon nocofunu onihuani. Asca huatan ahuun ruchocoqui ashaitanaino nocofunu shacaina cahuani ninon. Ascatan Diosin nocofunu oni huaquin tau huaniquin.

Santiago 2:26

Afanan un mato iscara tapimasharanon. Nocon furo yoshin nomaqui caanofin nocon caya natiroquin. Afanancai shara itiroma. Nanscarifi aquin non Diosin icoinra huafiashon noco yononi cuscan non futsafo shara huayamainocai nancai ahuama. Non ascaicai non shara itiroma.

Apocalipsis 13:1

Ascan uhuun namapan ointsa ua oinmana cuscan afanan un mato tapimai. Unuhuan cusumun un niano yoina cuscara musucoin unuhuan murannoashu cainacahuanaiton un oian. Ahuun caya fustifiashu siete mapoya. Ascan ahuun mashori diez ya. Nan ahuun mashoti niaifoan maiti maia. Ascanshon Upa Diosiqui tsain chaca huaquin ahuun fumananfoqui cunu futsa cuscarafo nutan.

Apocalipsis 13:12

Nan yoina pofu unuhuan murannoashu cain tauaton ahuamamishti huafain yorafoti iquina cuscan nan yoina pofu futsari nanscara huaa. Ascashon nantifi maifoti anoa ato yonoa isca huaquin, —Nan yoina cuscara mapo ruranfo man naacoinfiashu afanan man nia. Nancai noco iforan nocon Diosiran huacahuun, —ishon ato yonoshquin.

Apocalipsis 13:14

Satanashuunshon nanscara huariaquin yorafo man paran Diosiran huanonfo. Ascashon ato yonoa, —Nan yoina pofu cuscara nopu cunopaton man rutufiafo afanan nimisi nan ointsa uhuapacoin ramihuacahuun, —ishon ato yonoa.

Apocalipsis 14:9

Asca huatan afanan Diosin oinmati futsari nai muran icaton nocotoshishon oi ashcafinin yoia isca huaquin, —Tsoan na yoina pofu cuscara yafi ahuuna ointsa ramihua nicacoiainno yoimisi isca, “Nan uhuun Dioscoinran,” ishon anori yoiquin aton mucu iyamarai aton fumananqui na yoina pofu cuscara ahuun anu cunua Upa Diosin atoqui sinacoinshquin. Naafoanno Diosin ato fasi curushcai onaintimacoinshquin. Chi muran ato potafiacai cuyonacama. Jesús nan chashoan facu cuscara yafi ahuun oinmatifo afu nai muran icafo aton ointaifi ato omitsiscapanacafo muran potashquin. Isin muuqui unupacunacafoma. Tsoan ato numatiroma. Nan yoina pofu cuscara yafi ahuuna ointsa ramihua ifoanfo ahuun anu aton mucu iyamarai fumananqui cunua. Ascacun shafatifi yafi yamutishonri omitsiscapacoinshcani. Tsoan tunupacunacafomaran, —ishon Upa Diosin ahuun oinmati nai murannoaton yoia.

Apocalipsis 16:2

Nicacashon Diosin oinmati futsan tauhuaqui ahuun tutso nai muranshon mai ano oca. Nan yoina pofu cuscara ahuun anu aton mucu iyamarai aton fumananqui cunuafo yafi afin ramihuamua ointsa ifoanfono nanfo aton yoratisho coo suyacoin fuchiriscata isincoin tunutirofoma.

Apocalipsis 16:5

Nantianri oinmati futsan Dios fu tsaincaiton un nica. Nan unu cushumisiton isca huaquin yoia, “Upa Diosin tsoa min oni huataima min iyopaoni. Min ipaoni cuscan natianri min nipanaca. Min shara fustisi imisi. ¡Aicho! Nantianri mia nicacasmamisifo min ato onaintimai cuscan iconcoin. Aton chaca shatucanashu min Furun Jesús Ifocoianfo non min tsain aton yoimisifori nan icoinmaran huafoan ato rutuafo. Ascacufin min icoinra huafoma namai cuscafin iconquin. Min yorafo fasi omitsiscamamisifo ascan min nan icoinmaran huafo onaintimai omitsiscanonfo. Min cayacafi iconcoin ato onaintimaran,” ishon Diospan oinmatinin yoia.

Apocalipsis 17:14

Ascacashon nan nocofunun yoina pofu cuscara futan nan mucu rafuti niaifofoan nocon Ifo Jesús ahuun yorafoya noicasmacani. Jesús ahuun yorafo cunani ahuun tanamisifo inonfo. Ascashon ato catoan. Nanfo ahuuscarafiaino nocon Ifon cachiquiri huamisima. A tanacoinmisifo. Nan yoina pofu cuscara nan mucu rafuti niaifofo futan Jesús chashoan facu cahuan sharashta cuscara nan nocon Ifo yafi ahuun yorafo rutumapaishcani. Rutupaiyaifoan atorocofin Jesús ato namashquin. Nantianri ahuun tanamisifo afu iishquicani. Nocon Ifon nantifi niaifofo uhuapafo non niaifofo patashariri aton niaifocoinshon ato iquitiro. Nocon Ifon Jesús aton Ifocoinshon ato iquitiro. Nantifi niaifofo yafi ifoafori manifoti anoafo ato iquitiro. Ascan tsoancai nocon Ifon Jesús shuhuintiroma ahuun tanamisifocai ato tsoan cuyotiroma, —ishon nan Diosin oinmati afu nai muran imisiton ua yoia.

Apocalipsis 17:17

“Min noco yonopaiyai cuscan non atiroran,” ishon nan mucu rafuti niaifofoan niaifo yoina pofu cuscara yoiafo. Ascafia Diosin nannorisi ato shinanmana afin apaiyai cuscan atohuunshon anon. Ascatan Diosin yoiyomisi nan anon pacoai cuscan nanscara huashquin.

Apocalipsis 17:6

Nan ainfon furoma cuscara Jesús icoinra huafo ichapa nan Jesús uhuun Iforan huamisifo ato rutumamisi un oian. Un na ainfo oin un mustairia. Un yoia, —¡Ajaa! Ascaran ainfon chaca un oinyomisimaran, —ishon un yoia.

Apocalipsis 18:20

“Ascafiaifoanno nantifi Upa Dios fu icanoafoan unimacahuun. Babiloniafoan Jesús icoinra huafo man omitsiscamamisifo. Ascancufin Upa Diosin ato fasi onannitimana omitsiscapanacafo. Nantifi Jesús icoinra huafoan non Jesús fu rafumisifoan non Diosin tsain inon pacoai yoimisifoanri unimacahuun,” —ishon yoia.

Apocalipsis 18:24

Babiloniafoan Diosin tsain yoimisifo non Jesús icoinra huafo futsafori rutumamisifo. Manifoti anoa ato rutunifo,” ishon Diospan nai oinmatinin yoia.

Apocalipsis 19:20

Aton rututamarocon Jesús ato achia chi muran ato potashquin. Nan yoina pofu cuscara yafi nan fuparamitsamisiton, —Unfin Diosin tsain mato yoimisiquin, —ishon yoifiashu chanimisi. Nanton yoina pofu cuscarahuunoa tsoan atiroma cuscan Satanashuunshon huamisi. Ascan nantifi cunua yorafo nan yoina pofu cuscara ahuun anu atoqui nua. Nanfoan yoimisi isca huaquin, —Min uhuun dios. Un mia noiran, —ishon yoimisifo. Ascarafofin nan yoina pofu cuscaraqui. Ascan nan paramitsamisiton tsoan atiroma cuscan ahuamamishti acai cuscan man oianfo. Ascaquin ato paracoian. Nan rafu nan yoina pofu cuscara yafi nan paramitsamisi niyoa Jesús ato chi urumanhuan muran pota.

Apocalipsis 20:4

Ascatan niaifoan tsaotifo Upa Diosin icanoa un oian. Jesús ahuun yorafo nan tsaotifo camaqui tsaoafo. Jesús yonoano a futan futsafo yonoshquin. Ascashon nannori un oian nan Jesús icoinra huaa futsafo. Nanfo niyoano nan yoina pofu cuscara yafi ahuuna ointsa rami huati nanfoan ifoanmisima. —Minfin uhuun Ifo. Un mia noiran, —ishoncai yoimisifoma. Aton anu aton mucu iyamarai aton fumananqui cunumisifoma. Ascatamarocon yoimisifo isca huaquin, —Jesús fustifin nocon Ifoquin, —huamisifo. Diospan tsain fustisi tanamisifo. Ascan nan yoina pofu cuscara atoqui sinaquin ato tushtumana. Nai futsufiafo Diosin ato funimani. Funishon Jesús futan mai ano mil fari yorafoti iquina.