2 Corintios 3:3 - Sharanahua: Diospan Tsain

³ Ascacun futsafoan mato ointirofo man nan Cristo aficoin cunua cuscarafo. Ascashon mato tapitirofo non mato tapima cuscan Jesús cuscara man inon. Toquiri sapaqui cunuahuunshoncai ato oinmanama. Maton nomurancai ahuaton cunuama. Upa Diosin nipamisiton ahuun Yoshin Sharapan mato imashara nantifiton mato oinonfo.

2 Corintios 3:3 ပူးပေါင်းရင်းမြစ်များ

Salmos 42:2

Uhuun nomuran un mia fasi shinain. Un fasi nomicoin nan unu yopai cuscari un fasi mia yopacoin min ua ashoai cuscan min ua shinanmasharanon. ¿Uhuun Upa Diosin ahuutian un miqui catiromun mi fu iishquin?

Éxodo 24:12

Ascatan nocon Ifo Diosin Moisés yoiquin isca huani, —Machi mamaqui uqui mapunyohuu. Un mia min caifofoya un yonoai cusca mato toquiri sapa rafu cunushona cusca man nicasharanon. Ascatan nan un mia yoiaino min u fu nuno nituyotiroran, —ishon Upa Diosin yoini.

Éxodo 31:18

Ascano nan machi Sinain mamaquishon nocon Ifo Diosin Moisés tapimani cusca yoiqui anaitiano nan ato yononi cusca toquiri sapa rafuqui Diosin ahuun mutotinin ato cunushoni. Ascashon Moisés inanni ahuun caifo foshotanon.

Éxodo 32:15

Ascatan Moisés nocon Ifo Diosi maquinoashu machi ariashu tununman fotopacuni. Upa Diosin ato yononi cusca toquiri sapa rafu ocuma rafu cunua. Nan rafu tsomashu Moisés machi mamaquinoashu fotoni.

Éxodo 34:1

Ascatan nocon Ifo Diosin Moisés yononi isca huaquin, —Na toquiri sapa rafu min moshaita cuscaran afanan nanscara rafu fihuun. Nan un mato cunushonita cuscaran nanscara tsainri un afanan mato cunushonon.

Daniel 6:26

Uhuun yorafoan uhuun mai anoafotiton un mato yoinon nicacahuun. Daniel ahuun Diosifin nipanacaquin. Nan fustifin ahuun yorafo fu ipanacaquin. Nanton nantifi ato iquipacunaca. Ascan un mato yonoi Daniel ahuun Diosiqui man musunon ahuunoa yoi sharapacushquin.

Mateo 16:16

Ascaiton Pedronun cumani, —Minfin Cristoquin. Nan Diosin nipanacaton mia catonni min ahuun facuran, —ishon yoaiton.

1 Corintios 3:5

Ahuuscaimun atirifiton man isca huaquin, —Non Pablo yafi Apolos tanairan, —man ica. Apolos fucai un ahuama. Nonfin nocon Ifo Diosin ahuun oinmatiquin. Nocohuunshonfin man Jesús icoinra huaniquin. Diosin noco catonni noco yonomapaiyai cuscan noco yonoshquin Furunhuunoa man tapinon.

2 Corintios 3:6

Ahuun curushu noco inanno nan tsain funa Jesucristohuunoashu Dios fu nipatirofo non ato tapimatiro. Moisés cununi cuscahuunoacai non ato tapimamisima isharanonfo. Asca nonfin Diospan Yoshin Sharahuunoashu non isharatiroquin. Moisés cununi cuscan fusti tanashu non funotiro. Naashu omitsiscapanacafo muran non catiro. Ascan Diosin Yoshin Sharapan noco nimapacutiro non afu nipanon.

2 Corintios 3:7

Shinancapon. Upa Diosin nocon caifo Israelifo ato yonopaiyai cuscan toquiri sapaqui ato cunushoni. Ato yononi cuscan nicayamacanashu natirofo omitsiscapashcaquin. Upa Diosin ato yononi cuscan Moisés ato yoiaino Diosinhuunoashu ahuun fuso fasi chashaqui nocon shuni Israelifo ointima huani. Chashafiashu funainquimashta nishmapacuni. Ascatan Upa Diosin Moisés yononi cuscan fasi sharashtacoinfiashu natianfin ahuun Yoshin Sharapan noco yonoai cuscan fasi finacaia ahuun yono sharashtacoin man noco ismaquin.

2 Corintios 6:16

Cristo icoinra huafo ichanancashon Upa Dios cufitirofo. Nantianricai icoinra huamafo atofu ichanantirofoma ahuara ramihuacashon cufishcaquin. Nan rafucai ositirofoma. Futsafoancai Upa Dioscoin cufipaicanima. Ascan nonfin Diosin pushu cuscaraquin. Nocon Diosfin natian niaquin. Diosin yoini isca huaquin, “Unfin atofu iquicai. Ato fu rafucacaishquin. Un aton Dios icano. Nanfo uhuun yorafo inonfo.

Hebreos 8:10

“Un Israelifo yoishquiai cuscacai cunu fustihuunshon un ato tapimashquima. Ascatama aton nomuran uhuun tsain shara nanumafain aton nomuran cunui cafisca huaano. Nan un ato yonoai cuscacoin anonfo. Ascano un ato Upa Diosincoin iishquin. Nanfo uhuun yorafo iishcani.

Hebreos 9:14

Nanfo iconfia fasi mimacaia Cristo noco nashonihuunshon chaca noco soashotiro. Ascashon atocai ahuashta chaca huapanacama. Ascan nan Diosin Yoshin Shara nipamisihuunshon Apa yoini isca huaquin, —Upa un atohuunoashu nai. Ascacun uhuunshon min aton chaca soashotiro min yorafo inonfo, —ishon Jesucriston Apa yoini. Ascan non chaca huamisi cuscan non unuyamashu omitsiscapanacafo muran non cacuana. Ascafia non afanan asca huatamarocon Cristo noco nashonihuunshon non afanan chaca shinanonma. Ascashu nocon nomuran chocatsa shara cuscara itiro. Ascashon Upa Dios nipanaca non yonosharashotiro.

Josué 3:10

Nantofin na mai shara noco inanshquiquin nan mai anoshon caifo futsafo nocomaquishon potashquin. Cananeofo potafain Hititafo potafain Heveofo potafain Ferezeofo potafain Gergeseofo potafain Amorreofo potafain Jebuseofo potashquin. Nan ato potacun man tapitiro maton Diosi nan niafin mato fu icaquin.

Apocalipsis 2:1

Ascatan Jesús ua yoiqui isca huaquin, —Ua icoinra huafo Efeso anoa aton Diosin tsain yoimisi un yoipaiyai cuscan ua cunushoquin isca huai. “Unquian maton Ifo Jesús un nantifi Uhuun Upa Diosin tsain yoimisifo un atofu icacaimisi ato cushusharashquin. Ascacun un mato yoipaiyai cuscan ua nicasharacahuun.

Apocalipsis 2:12

Ascatan afanan Jesús ua yoiqui isca huaa, —Ua icoinra huafo Pérgamo anoa aton Diosin tsain yoimisi un yoipaiyai cuscan ua cunushoquin isca huai, “Unquian un maton Ifo Jesús, un mato yoisharapai man tapinon. Uhuun tsain nan nopu ocuma rafu cunocoin cuscara. Ascashon uhuun tsainmansi uhuun yorafo cushusharafain nan ua noicasmamisifo un ato onaintimatiro.

Apocalipsis 2:18

Ascatan afanan Jesús ua yoiqui isca huaa, —Ua icoinra huafo Tiatira anoa aton Diosin tsain yoimisi un yoipaiyai cuscan ua cunushoquin isca huai. “Unquian, un maton Ifo Jesús, un mato yoisharapai man tapinon. Uhuun furo chii shahuacai cuscara. Ascacun un mato onancoian. Uhuun tau nan cuno faca facaitsan cuscara. Ascacun un mato yoiquin isca huai.

Apocalipsis 2:8

Ascatan afanan Jesús ua yoiqui isca huaa, —Ua icoinra huafo Esmirna anoa aton Diosin tsain yoimisi un yoipaiyai cuscan ua cunushoquin isca huai. “Unquian, un maton Ifo Jesús, un mato yoisharapai man tapinon. Ahuara oniataima un iyopaoni. Urifi ipanaca. Uncai unupacunacama. Mun nafiacun Upa Diosin ua funimani. Ascashucai un afanan napanacama. Unrocon nipanaca. Ascacun un mato yoiqui isca huai.

Apocalipsis 3:1

Ascatan afanan Jesús ua yoiqui isca huaa, —Ua icoinra huafo Sardis anoa aton Diosin tsain yoimisi un yoipaiyai cuscan ua cunushoquin isca huai. “Unquian, un maton Ifo Jesús, un mato yoisharapai man tapinon. Diosin Yoshin Shara ufu rafumisi. Ascacun nan Diosin tsain yoimisifo un iquimisi. Ascacun un mato yoi isca huaquin. Man amisi cuscan mun tapicoian. Yorafoan matohuunoa yoimisifo isca huaquin, ‘Nan Sardis anoafoan Jesús icoinra huafain isharacoinmisiforan,’ ishon matohuunoa yoimisifo. Man isharamisifo ointsacun. Ascafia mancai matohuunoa yoiaifo cuscan man amisima. Mancai ua tanacoianma.

Apocalipsis 3:14

Ascatan afanan Jesús ua yoiqui isca huaa, —Ua icoinra huafo Laodicea anoa aton Diosin tsain yoimisi un yoipaiyai cuscan ua cunushoquin isca huai. “Unquian, un maton Ifo Jesús, un mato yoisharapai man tapinon. Upa Diosin ua amapaiyai cuscan fustisi huamisishaquin uhuun tsain un mato yoinon. Urifi nan icon fustisi un yoimisi. Ascan Upa Diosin nantifi onihuanifoti aton niaifofin unquin. Ascacun un mato yoiquin isca huai.

Apocalipsis 3:22

Ascacun man pafiquiyaquin Diosin Yoshin Sharapan nan icoinra huafo ato yoiai cuscan nicasharacahuun,” —ishon Jesús nan icoinra huafo Laodicea anoafo yoia.

Apocalipsis 3:7

Ascatan afanan Jesús ua yoiqui isca huaa, —Ua icoinra huafo Filadelfia anoa aton Diosin tsain yoimisi un yoipaiyai cuscan ua cunushoquin isca huai. “Unquian un maton Ifo Jesús, un mato yoisharapai man tapinon. Unfin ishara fustimisiquin. Uhuun tsainrifi iconcoin. Pushu ifo shafiya arus fusti pushu fuputiro yorafo iquimai iyamarai fupotiro futsafo iquinonfoma. Nanscarifiai maton niaifo David shafi cuscara ipaoni. Tsoa ahuun mai ano imapai iyamarai ato nitun huapaoni iquinonma. Nanscarifiai unfi David funaquin. Urus fusti un yoitiro upa Dios icano tsoa iquitiro iyamaraimain iquitiroma. Ascacun un mia yoi isca huaquin.

1 Samuel 17:26

Ascaino David chaima futsa niaton yocani, —¿Tsoan Filisteo rutuamun ahua niaifoan inainquin? Nan Filisteo noco fucash huaquin noco cashu mutsama huaino non rafipaitiro. Manfin Israelifoan ahuun ranushumuafia manfin nan Diosin ahuun yoraforiquin. Nocon Diosifin natian niaquin. ¿Ahuuscai na Filisteo Diospan ahuun yorayamafiashon noco tsain chaca huafain noco musumapaimun? —ishon David ato yoini.