1 Samuel 18:17 - Sharanahua: Diospan Tsain

¹⁷ Ascan shafa futsa Saúl David yoini isca huaquin, —Caifo futsafoan nocon Ifo Diosi nicacasmafo. Nanscacun nocon Ifo Diosin ato cuyoshquiai cuscan min ahuunoashu ratushquima nocon ranushumuafo min iyotiro nocon noicasmaifo rutunon. Min asca huaiton oinquin uhuun ainfacu iyoa mia inantiro min ahuin inon. Ahuun anu Merab, —ishon Saúl David yoini. Saúl ahuun nomuran shinanquin isca huani, —Uncai David rutuima. Filisteofo fu rutunancaquin nanfoan David rutucaniran, —ishon shinanni.

1 Samuel 18:17 ပူးပေါင်းရင်းမြစ်များ

2 Samuel 11:15

Nan cunun yoini isca huaquin, —Fasi rutunain finacoiyainfoanno Urías nichihuun. Ascan min ranushumua futsafo yoihuun Urías icano nasoriscanon Urías arus fusti nanno nitunon Amonitafoan a rutunonfo, —ishon cununi.

2 Samuel 12:9

¿Ascan ahuuscaquin uhuun tsain ahuamaran ishon min shinanmun? ¿Ahuuscai min chaca huamun? Min Amonitafohuunshon Urías rutufain ahuun ahuin min fiian min ahuin inon.

1 Samuel 17:25

Ascan Israeli ranushumuafoquin yoinannifo, —Nicapon nan Filisteo uhuapacoin yoimisi cuscan. Shafatifi noco yoimisi tsoamain a fu rutunantiroquin. ¿Saúl niaifoan yoia cuscan man man nicamun yoiquin isca huaiton? “Tsoan Goliat rutuafin un pui ichapacoin inaincai. Uhuun ainfacuri un inain ahuun ahuin inon. Non nantifi Israelifo faritifi pui yoca cuscan ahuun yorafo afanan non ato pui yocapacunacamaran,” ishon niaifoan yoiaran, —icashu Israelifo yoinannifo.

1 Samuel 17:36

Masharo rafu ahuun anu leon yafi oso un rutua. Ascan nocofunu Filisteo Diospan ahuun yorama. Nan masharo rafu un rutua cuscan un nanri rututiro. Manfin ranushumuafo Diosinafoquin. Diosifin niaquin mato cushushquin. Ascafiaino Filisteon mato ratupai.

1 Samuel 17:47

Ascan nopu yafi ashi ascarafocai nocon Ifo Diosin yopaima ahuun yorafo numashquin. Ascan rutunainfoan nocon Ifo Diosin apaiyai cuscan rato futsan shuhuinmatiro. Ascan na shafata min non min caifo nantifi nocon Ifo Dioshuunshon non mato rutuqui futsairan, —ishon David yoini.

1 Samuel 18:21

Ahuun nomuran shinanni isca huaquin, —¡Aicho! Un David yoishquin uhuun facu fu fiananon. Ascan fiananfotaima un afanan David rutunainfo ano un nichishquin Filisteofoan nan rutunonfo, —ishon shinanni. Nannori shinanfiashon Saúl David yoini isca huaquin, —Afanan un shinan futsa min uhuun raisi iishquiran, —ishon Saúl David yoini.

1 Samuel 18:25

Nicashon Saúl ato yoini isca huaquin, —David yoihuun isca huaquin, “Nan cien Filisteofo min rutuafin min uhuun facu fitiroquin. Nan ua noicasmaifofin un copiquin ato rutupaicain,” —ishon Saúl ato yoini. Ascafiashon ahuun nomuran shinan futsani. —David cien Filisteofo rutupaiyaino nanfoancaifin David rutushquicaniquin, —ishon ahuun nomuran shinanni.