1 Corintios 3:8 - Sharanahua: Diospan Tsain

⁸ Tsoaran futsan tau huaquin ato Jesús icoinra huamafin nan chipo ato yosiaitori ato tsain nannorifosi ato tanamasharanon. Nan rafutan nannori shinancani. Ato Jesushuunoa yoishcaquin a tanasharanonfo. Ascacufin Diosin a yonoshonaifo cuscan futsa paratama inanfain futsa ichapama shara inanshquin. Ahuuscamain yonoi aafoquin.

1 Corintios 3:8 ပူးပေါင်းရင်းမြစ်များ

Daniel 12:3

Tsoan nataima Diosin ato shinanmapaiyai cuscan shinanmisifo Diosi fu isharapacunacafo. Nai muran chasha cuscan nanfori chashapacunacafo. Ratora futsa tapisharashofin futsafo Diosihuunoa tapimamisi shara inonfo nan tapiafofin fishifo chashai cuscan nanfori chashapacunacafo.

Mateo 16:27

Ascatan un chipo nai murannoashu mai ano fotoaino nan uhuun Upa cuscaracoin iishqui. Ascashu un chasha curanaino uhuun oinmatifo ufu nai muran icafo ufu fotoshcani. Nantianri un nantifi yorafoan aton niaifocoin iishquin. Ascashu nan yorafoan acafo cuscan un ato inanpacushquin. Nan shara huamisifo un ato inansharafain un ato unimamashquin. Ascan nan chaca huamisiforicai un ato ahua inansharashquima.

Lucas 19:19

Nicaquin nanrifi yoini, “Mirifi mucu fustiti pushurasi anoafoan ato niaifo min iquiran,” ishon yoini.

Romanos 2:6

Upa Diosin nan niyoshon amisifo cuscan atoti inanpacushquin.

1 Corintios 15:58

Ascacun uhuun yoramishtichin futsa futsa huaquin shinanyamacahuun. Diosin noco imapaiyai cuscan nan fusti shinansharacahuun. Jesús tanasharacahuun. Nocon Ifo Jesús yonoshosharafafaincahuun. Man man tapia nocon Ifo futan yonoicai ipaitsi non yonoshotiroma.

1 Corintios 3:7

Ascashon un mato yoiai cuscacai un Apolos fu ahuama. Diosin fustitofin yorafo aton nomuran shinanmasharatiro ahuun tsain tanasharacoinonfo.

1 Corintios 3:9

Manfin Diosin ahuun mau cuscaraquin. Ahuun pushu cuscararifi. Mau ifo fustifiano futsafoanrifi yonoshotirofoquin. Aafin maton ifoquin. Nonfofin ahuun yonomatifoquin a futan non mato yonoshotiro. Nanscarifiai pushu ifo fustifiano futsafoanri yonoshotirofo. Nanscarifiai manfin Diosin ahuun mau cuscaracoinquin. Ahuun pushu cuscararifi. Diosin fustifin maton Ifoquin. Nonfofin ahuun yonoshomisifoquin. Noco yonoa cuscari non maton nomuran non mato shinansharamatiro ahuun tsain man tanasharanon.

1 Corintios 4:15

Yorafoan mato Cristohuunoa tapimatirofia ascan unfin tauhuaquin mato Cristohuunoa tapimaniquin. Ascanofin man Cristo icoinra huaquin. Uhuunoashuri man Diospan facufoquin. Ascatan un maton upa cuscaracoin. Futsafoan Cristohuunoa mato tapimatirofia afocai maton upa cuscara itiroma. Urus fustifin un maton upa cuscaracoinquin.

1 Corintios 9:7

Un iscara mato tapimapai. Ranushumua futsacai cashman yonomisima. Ahuun caifo cushucufin nan yorafoan aton pushurasihuunoa pui niaifoan ato inanmisiquin. Nanscarifi aqui mau fanamisiton ahuun mau foaisharanon afin ahuun yono pitiroquin. Chashoanfo cushumisitori ahuun chashoanfoan shoma ayatiro.

Gálatas 6:4

Ascafia nofin nocon nomuran non shinantiro non Jesús yonoshosharaimun. Ascan non yonoshosharai tapiashu non fasi unimatiro. Ascaquicai non shinanquin isca huatiroma, —Futsan chaca huai cuscacai un huamisimaran, —ishon non shinantiroma.

Gálatas 6:5

Nantififain non chaca huamisi. Ascashori nantififain nocon nomuran non shinantiro non amisi cuscan. Tsoa futsacai Diosin noco amapaiyai cuscan noco huamatiroma. Nofin non atiro.

Hebreos 6:10

Upa Diosin icon fustisi. Amaquiri ahuashta shinantiroma. Ascashon mato shinanfafaini. Man ahuun noiquin ahuun yorafo man shara huashomisi. Ascaquin man Dios ismai man noiai cuscan. Ascashori man unutama ato shara huafafainmisi. Man ato shara huaa cuscan Upa Diosin mato oiainnocai ointi aquimapacunacama.

1 Pedro 5:4

Nan nocon cushumisicoinfin nocon Ifo Jesucristoquin nan nocoaitian mato yoishquin isca huaquin, —¡Aicho! Man mai ano niyoshon ua icoinra huafo man ato cushusharamisi. Ascan nantifi un iquinafo ya man ufu ipatiro niaifo patashari iishquin. Man ufu ipaiyai cuscacai unupacunacamaran, —ishon mato yoishquin.

2 Juan 1:8

¡Oinfain! Atohuun caoyamacahuun. Man funotiroquin. Upa Dios yonoshofiaqui man atohuun caohuaino mato inanpaiyai cuscan man funotiroquin. Ato nicayamacahuun nantifi Upa mato inanpaiyai cuscan fishcaquin.

Apocalipsis 2:23

“Ascano ahuun tanamisifori un namaquin cuyoshquin. Un asca huaiton nantifi ua icoinra huafo maifoti anoafoan tapitirofo un nantifi yorafo onancoian. Ascashon aton nomuran shinainfo cuscan un onancoian. Tsoancai ahuashta ua fomantiroma. Ufimain un nantifi onancoincun. Ascacufin nan shara huamisi urifi un ato shara huashquin. Ascan ratoran futsan chaca huamisi nanrifi un onaintimashqui.

Apocalipsis 22:12

Ascashon Jesús afanan yoia isca huaquin, —Ua nicasharacahuun. Un matoqui samamashta nocoriscai. Nocoshon un mato yoia cuscan man huacun un mato inansharashquin. Nan shara huamisifo un ato shara huafain nan chaca huamisifo un ato onaintimacoinshquin.