Yohana 20:17 - Maləmce Məfele mala Ɓakuli: Kurcau Məbəshe

¹⁷ Yesu ne wi ama, “Ce a kúr a rǝam ɗang, acemǝnana ǝn malaká nyar aban Tárram a kuli peatu ɗang. Ado ka, kyane aban amǝ'eambǝam, alaggana mem, kya banggia wia ama, Mǝ ndo mǝ nǝ nyare aban Tárram, mǝnana nda Tárria ka, aban Ɓakuli mem, mǝnana nda Ɓakuli malea ka.”

Yohana 20:17 ပူးပေါင်းရင်းမြစ်များ

Matiu 12:50

Ɓwa mǝnana kat kǝ pak gir mǝnana Tárram mana a kuli ka earkiyice ka nda mǝ'eambǝam, andǝ mǝ'nggaulem, andǝ nggem.”

Matiu 25:40

Pǝlǝa Murǝm nǝ̀ nyesǝia wia ama, “Ɓafo, ǝn nggǝ bangga wun, gir mana kat wu pakki mwashat ata aɓwana mem, ko nggearǝ mǝnana à kǝ sǝni nda ɓwa mǝkyauwe mala aɓi ka, Mǝ nda wu pakkam ngga.”

Matiu 28:7

Sǝ wu nyare a kaurǝa wu kya ne alaggana male ama, ‘Longŋǝna nǝ yilǝmu, ɗǝm ngga nda aka wun dǝmbǝa kǝ ká a Galili ka. Wu nǝ̀ ngga sǝni akano.’ Ɓalǝ wun ɓǝ̀ kasǝa ama ǝn bangŋǝna wun ngga.”

Markus 12:26

Sǝ amur cau mala lo mala alú ka, wu ɓal mbo aɓa malǝmce mala Musa, amur mǝ'ndanggun mǝnana kǝ earki bǝsa ka? Nda anzǝm mǝnana a Ibǝrayim andǝ Ishaku andǝ Yakupu wukina, sǝ apǝlǝkia pas yi kutikina ka, sǝ Ɓakuli yi bangcau nǝ Musa ama, “Mǝ nda Ɓakuli mala Ibǝrayim, andǝ Ɓakuli mala Ishaku, andǝ Ɓakuli mala Yakupu.”

Markus 16:19

Anzǝm mǝnana Mǝtalabangŋo Yesu nania cau ka, kara à twali à um nǝi a kuli, kya do a bu-mǝli mala Ɓakuli.

Luka 10:4

Wu kǝa twal boalo, ko luru gya, ko ankura, a bu wun ɗang, sǝ wu kǝa makki kǝɓwa kun a njargula ɗang.

Yohana 13:1

Ué bǝti à nǝ̀ tita Lamsan Yalimuru, sǝ Yesu sǝlǝna ama bu-pwari male yina mǝnana nǝ̀ nying ɓanza nǝ̀ o aban Tarrí ka. Yì ka, earnace aɓwana male mǝnana à nda a ɓanza man ngga, sǝ ado ka lǝmndǝia wia earcearǝu mǝnana malkiyi raka.

Yohana 13:3

Yesu sǝlǝna ama Ɓakuli Tarrû pani wi rǝcandǝa amur agir kat, sǝ sǝlǝna gbal ama pur nǝban Ɓakuli, sǝ ndo nǝ̀ nyare nǝ̀ o abani ka.

Yohana 14:2

Aɓa ɓala mala Tárram ngga aban-do na kam pas. Ɓǝ̀ pa anggo raka ɓǝn bangŋǝna wun. Mǝ ká mǝ nǝ ngga gilǝki ban-do ace wun.

Yohana 14:28

Wu ɗenyi nǝ cau mǝnana ǝn bangga wun ama, mǝ nǝ o, sǝ mǝ ngga nyar aban wun ɗǝm ngga. Ɓǝ̀ mǝsǝcau wu earǝna cem ngga, ban nǝ̀ ɓoara wun ace o mem aban Tárram, mǝnana kutiam nǝ gulo ka.

Yohana 14:6

Yesu eari wi ama, “Mǝ nda njargula, Mǝ nda mǝsǝcau, sǝ Mǝ nda yilǝmu; kǝɓwa pà nǝ̀ ká aban Ɓakuli Tarrû ɗang she nǝ banam.

Yohana 16:28

Ən pur aban Tárram sǝ ǝn yiu a ɓanza, sǝ ado ka, mǝ ndo mǝ nǝ nying ɓanza mǝ nǝ nyar aban Tárram.

Yohana 17:11

Ado ka mǝ ndo mǝ nǝ nying ɓanza, mǝ nǝ nyare abano, sǝ yia ka à ndakani a ɓanza piu. Dâ Ɓakuli Mǝfele! Yalia, nǝ rǝcandǝa mala lullǝo mǝnana a pam ngga, acemǝnana yia ka ɓǝa duk mwashat kǝla mǝnana sǝm nda mwashat sǝnǝ we ka.

Yohana 17:25

We Dâ Mǝ'cauɓoarna! Ɓanza surǝo ɗang, sǝ mim ngga ǝn surǝo, sǝ amǝnia yì alaggana mem ngga, à sǝlǝna ama a nǝ turam.

Yohana 17:5

Sǝ ado ka, Dâ, nyesǝam gulo a ɓadǝmbǝo, gulo mǝnana mǝ ndanǝi sǝnǝ we ɗiɗyal sǝ a yi pusǝ ɓanza ka.

Yohana 20:27

Pǝlǝa lǝmndǝì Toma abui sǝ ne wi ama, “Sǝn abuam; sǝ wu tsǝk munabuo kani; sarǝ buo ci a rǝ pengye mana a mǝsǝ nkanggariam ngga. Ɗeki ɓabum tuti mo, earnǝ cau!”

Yohana 7:33

Yesu nea wia ama, “Mǝ ndakani ado ata wun zuku, sǝ mǝ nǝ nyare mǝ nǝ o aban Tárram mǝnana tasǝam ngga.

Amǝ Roma 8:29

Aɓwana mǝnana Ɓakuli angŋa dǝmbǝa twalǝnia ka, nda gbal tària ɓǝa do kǝla Muni, ace mǝnana ɓǝ̀ Muni duk muna-dǝmbǝa aɓalǝ amǝ'eambǝi mǝnana pas ka.

2 Amǝ Korinti 6:18

“Mǝ nǝ duk Tar wun, sǝ wu nǝ̀ duk amunem. Mǝnia ka nda cau mǝnana Mǝtalabangŋo mana Karban kat bang ngga.”

Amǝ Galati 3:26

Ace mani ka, wun kat ka, wu ndaka muna mala Ɓakuli ace guli ma'wun arǝ Kǝrǝsti Yesu.

Amǝ Ibǝru 11:16

Sǝ yia ka, à nda ban alta nzali mǝɓoarne mǝnana kuti mǝno ka, nzali mǝnana a kuli ka. Nda gir mǝnana tsǝa sǝ Ɓakuli ka, kǝsǝkya pakki wi, yi mana ɓǝa tunǝi ama nda Ɓakuli malea ka ɗang, acemǝnana gilǝkina nggeala acea.

Amǝ Ibǝru 8:10

“Adyan ngga, mǝnia nda kurcau mǝnana mǝ nǝ pang nǝ ɓala mala Isǝrayila, aɓalǝ apwari mǝno ka. Mǝtalabangŋo nǝ nakiyi mǝnia yì cau ka. Mǝ nǝ tsǝk angguracau mem aɓa ɗenyicau malea, sǝ mǝ nǝ gilǝia a ɓabumia. Mǝ nǝ duk Ɓakuli malea, sǝ yia ka, à nǝ̀ duk aɓwana mem.

1 Bitǝrus 1:3

Ɓwangsǝban kat ka, ɓǝa pe Ɓakuli, Tár Mǝtala sǝm Yesu Kǝrǝsti! Ace mǝsǝswatǝr male mǝgule ka yina nǝ sǝm aɓa bǝsa ɓǝlban. Sǝm kum mǝnia yì bǝsa ɓǝlban ngga acemǝnana Ɓakuli loasǝ Yesu Kǝrǝsti a ɓembe ka. Ado ka sǝm ndanǝ do tsǝkɓalǝu mǝyilǝmui,

1 Yohana 3:2

Wun agyajam, sǝm ado ka, sǝm ndaka amuna mala Ɓakuli, sǝ à malaká lǝmndǝa sǝm ulang pa mǝnana sǝm ngga pak ka ɗang. Sǝa ma sǝm sǝlǝna ama ɓǝ̀ Yesu yi pusǝna rǝì ka, sǝm nǝ̀ pa kǝla yi, acemǝnana sǝm nǝ̀ yia sǝni kǝla mǝnana ndakam ngga.

Sǝna 21:3

Ən ok ɓe giu mǝgule pur nǝban bunomurǝm mala Ɓakuli, na cau ama: Wu sǝni, ban-do mala Ɓakuli adyan ngga, nda aban aɓwana male! Yì ka, nǝ̀ do andǝia, sǝ yia ka, à nǝ̀ duk aɓwana male. Ɓakuli nǝ nggearǝì nǝ̀ do atea.

Sǝna 21:7

Ɓwa mǝnana kat limurǝm ngga, mǝ nǝ pe wi liɓala mala amǝnia yì agir ka, sǝ yì ka, nǝ̀ duk munem sǝ mǝ nǝ duk Ɓakuli male.