Matiu 25:34 - Maləmce Məfele mala Ɓakuli: Kurcau Məbəshe

³⁴ Sǝ Murǝm nǝ̀ ne aman a bui mǝli ka ama, “Wu yiu, wun aɓwana mana tsǝkbu mala Tárram na mur wun ngga. Wu yi ak Domurǝm mana à gilǝki ace wun pur a tita ɓanza ka.

Matiu 25:34 ပူးပေါင်းရင်းမြစ်များ

Matiu 13:35

Pak mǝnia ka ace mǝnana ɓǝa lumsǝ cau mana mǝɓangna mala Ɓakuli bangŋa ama, “Mǝ nǝ mǝn kunam nǝ kanicau, Mǝ nǝ arkia wia ɓalǝ agir mana à nda aɓa sǝmbǝrǝa pur a tita ɓanza ka.”

Matiu 19:29

Sǝ ɓwa mǝnana kat nying ɓala ko amǝ'eambǝu andǝ amǝnggaula, ko tarrû, ko nggeau, ko amuna, ko anzali, ace lullǝam ngga, nǝ̀ kumia kusǝ gbǝman. Sǝ nǝ̀ kum yilǝmu mǝnana málá male pà kàm raka.

Matiu 20:23

Yesu nea wia ama, “Ɓafo, wu nǝ̀ gandǝ nu tanni mǝnana mǝ nǝ nu ka, sǝa ma pa ban-do a buam-mǝlì ko mǝnggare ka pà aɓa rǝcandǝa mem ɗang. Amǝnia yì aban ngga nda ace aɓwana mǝnana Tárram gilǝkia wia ka.”

Matiu 21:5

“Wu ne amǝ Urǝshalima ama, Wu sǝni, murǝm ma'wun nia kǝ yiu aban wun ngga! Yì ka, mǝ'nwangsǝ-muru na, kǝ yiu a nzǝm mǝndambǝritso. A nzǝm muna mǝndambǝritso sǝ kǝ gya.”

Matiu 25:21

Ɓwamǝgule male ne wi ama, “À pangŋǝna pepe, a nda mǝturo-ɓala mǝɓoarne andǝ mǝ'mǝsǝcau nì! A lǝmndǝ mǝsǝcau arǝ agir bǝti. Mǝ nǝ nyinggo agir pas a buo. Yiu li banɓoarnado mala mǝtala-ɓala mo!”

Matiu 25:23

Ɓwamǝgule male ne wi ama, “A pangŋǝna pepe, a nda mǝturo-ɓala mǝɓoarne andǝ mǝ'mǝsǝcau nì! A lǝmndǝ mǝsǝcau arǝ agir bǝti. Mǝ nǝ nyinggo agir pas a buo. Yiu li banɓoarnado mala mǝtala-ɓala mo!”

Matiu 25:40

Pǝlǝa Murǝm nǝ̀ nyesǝia wia ama, “Ɓafo, ǝn nggǝ bangga wun, gir mana kat wu pakki mwashat ata aɓwana mem, ko nggearǝ mǝnana à kǝ sǝni nda ɓwa mǝkyauwe mala aɓi ka, Mǝ nda wu pakkam ngga.”

Matiu 25:41

Pǝlǝa nǝ̀ ne aɓwana mana a bui mǝnggare ka ama, “Wu upi banam, wun mǝnana Ɓakuli su wun ngga! Wu kya ɓa bǝsa mǝnana li male pà nǝ̀ mal raka, mǝnana à pe ace Shetan andǝ amǝturonjar male ka.

Matiu 27:37

À gilǝ cau mana à ɓashi wi nǝi ka sǝ à gballì arǝ nggun amuri, ama: ƁWA MƏNIA KA NDA YESU, MURƏM MALA AMƏ YAHUDI.

Matiu 3:2

kǝ na ama, “Wu pwanzali wu pǝlǝ nzǝm wun arǝ acauɓikea ma'wun, ace mǝnana Domurǝm mala kuli gbashina.”

Matiu 5:19

Ɓǝ̀ yana kat sǝ yàllî nzong mǝkyauwe mwashat aɓalǝ amǝnia yì anzongcau, sǝ kǝ kani aɓwana ama ɓǝa pa kǝla yì ka, nǝ̀ ngga duk rítǎu aɓa Domurǝm mala kuli. Sǝ ɓwa mǝnana kǝ kpata amǝnia yì anzongcau sǝ kǝ kani aɓwana ama ɓǝa pa kǝla yì ka, nǝ̀ ngga duk ɓwamǝgule a Domurǝm mala kuli.

Markus 10:17

Lang Yesu longŋǝna nǝ̀ o ka, ɓeɓwa ɓangŋa ate kya kūndǝo a ɓadǝmbǝi, sǝ zǝmbǝi wi ama, “Malǝm mǝɓoarne, mana gir ni mǝ nǝ pa sǝ mǝ nǝ kum yilǝmu mǝnana málá male pà kàm raka?”

Markus 10:40

Sǝa ma, pa aɓa buam ɓǝn tsǝk ɓwa ɓǝ̀ do ata buam mǝli ko a buam mǝnggare ɗang. Ɓakuli gilǝki amǝno yì aban ngga ace aɓwana mǝnana tarkia ka.”

Luka 11:28

Yesu pa eare ama, “E, ɓafo, sǝa ma, tsǝkbu pwala mala Ɓakuli ka nda amur aɓwana mǝnana à kǝ ok cau male, sǝ à kǝ kpate ka!”

Luka 11:50

Ace mani ka, nkila mala amǝ'ɓangna mala Ɓakuli mǝnana à sukki ɗiɗyal, twal a tita ɓanza ka, à nǝ̀ ɗice a bu aɓwana mǝnana a nza man ngga.

Luka 12:32

Domwan mǝkyauwe, ɓangciu ɓǝ̀ kǝa pakka wun ɗang, acemǝnana Tar wun ngga ban kǝ ɓoari wi ɓǝ̀ pa wun agir mǝɓoarne mala Domurǝm male.

Luka 19:38

À kǝ bangŋa ama, “Ɓwangsǝban ɓǝ pa aban murǝm mǝnana kǝ yiu aɓa lullǝ Mǝtalabangŋo ka!” “Dorǝpwala na kam a kuli sǝ gulo ka aban Ɓakuli!”

Yohana 1:49

Pǝlǝa Nataniyel ne Yesu ama, “Rabbi, a nda Muna mala Ɓakuli! A nda Murǝm mala amǝ Isǝrayila!”

Yohana 12:13

Pǝlǝa à twalki ambu nkangga a buia sǝ à puro à nǝ̀ ngga kuli. À kǝ mak-gawan, à kǝ na ama, “Wu ɓwangsǝki Ɓakuli! Tsǝkbu mala Ɓakuli na amur ɓwa mǝnana kǝ yiu aɓa lullǝ Mǝtalabangŋo Ɓakuli ka! Tsǝkbu mala Ɓakuli na amur Murǝm mala amǝ Isǝrayila!”

Yohana 17:24

Dâ! Ən nggǝ earce nǝma aɓwana mǝnana a pamia ka, ɓǝa do atam aban mǝnana mǝ nda kam ngga; sǝ ɓǝa sǝn gulo mem mǝnana a pam, acemǝnana a kǝ earcem sǝ a yi pusǝ ɓanza ka.

Yohana 19:15

Kara yia kat à lo a rǝì gǝu ama, “Wali ɓǝ̀ wu! Wali ɓǝ̀ wu! Gballì a nggun-gangndi!” Bilatus ɗia ama, “Mana! Wu earce ɓǝ̀ ǝn gballì murǝm ma'wun a nggun le?” Pǝlǝa agbani pǝris malea ear ama, “Kǝ murǝm pa a bu sǝm ɗang, she kǝ Kaisar Mǝtala nzali mala amǝ Roma!”

Amǝ Mishan 15:18

Mǝnia ka Mǝtalabangŋo nǝ̀ bangŋa, yì ɓwa mana pusǝ amǝnia yì agir a banfana ɗiɗyal ka.”

Amǝ Mishan 3:26

Lang Ɓakuli loasǝna guro male Yesu ka, tasǝi aban wun, wun amǝ Isǝrayila peatu, ace mǝnana ɓǝ̀ tsǝka wun bu, a njar mala pǝlǝ koyan ata wun ngga, ɓǝ̀ nying ɓealɓikea male.

Amǝ Roma 8:17

Sǝ acemǝnana sǝm nda ka amuna male ka, sǝm nǝ̀ kum banì ma'sǝm mala liɓala male, mǝnana ci ace aɓwana male ka. Ɗǝm ngga, sǝm nǝ̀ kum sǝnǝa Yesu, gir mǝnana kat Ɓakuli ci ace ka. Ɓǝ̀ kàngkàng sǝm nu tanni ata Kǝrǝsti ulang mǝnana nu ka, sǝm nǝ̀ kum gbal aɓa male yì gulo.

1 Amǝ Korinti 15:50

Wun amǝ'eamrǝarǝu, cau mǝnana ǝn nakiyi ka ɓālǝi nda mǝnana ama, nggūrǝu mǝnia mala nyama andǝ nkila ka, à pà nǝ̀ kutio a Domurǝm mala Ɓakuli ɗang. Anggo gbal, gir mǝnana nǝ̀ wu ka, pà nǝ̀ liɓala mala gir mǝnana pà nǝ̀ wu raka ɗang.

1 Amǝ Korinti 2:9

Kǝla mǝnana Malǝmce bang ngga, “Kǝ mǝsǝu malaká sǝn ɗang, kiru malaká ok ɗang, yale malaká kutio aɓa ɗenyicau mala kǝɓwa ɗang, gir mǝnana Ɓakuli gilǝkini ace aɓwana mǝnana à kǝ earce ka.”

1 Amǝ Korinti 6:9

Wu sǝlǝ mbak ama amǝ'ɓealɓikea pa nǝ̀ kutio a Domurǝm mala Ɓakuli ɗang? Wu kǝa swarki ɓamur rǝ wun ɗang! Aɓwana mǝnana à kǝ dukdo kiɗìkì mala nonggi nǝ rǝarǝu, ko à kǝ peri ata ankúl andǝ nongginǝ amālá aɓea andǝ abura aɓea ka, à pà nǝ̀ kuti a domurǝm mala Ɓakuli ɗang. Sǝ kǝɓwa pà kàm ata amǝ kìɗìkì mala nongginǝban, ko aburana a rǝarǝia, ko amamǝna gbal a rǝarǝia, mana à nǝ̀ kum kutio a domurǝm mala Ɓakuli ka ɗang.

Amǝ Galati 5:21

andǝ shamgir mala ɓwa, andǝ wal-walo gir, andǝ ká kpapí mǝɓane mala nukiagir andǝ nongginǝban, andǝ acili acauɓikea kǝla amǝnia ka. Mǝ ɓǝsǝlǝa wuni ɗǝm kǝla mǝnana ǝn na wun a dǝmbǝa ka, ama ɓwa mǝnana kat kǝ do aɓata a'ulang mǝnia yì ado ka, pà nǝ̀ kutio a Domurǝm mala Ɓakuli ɗang.

Amǝ Afisu 5:5

Wu nǝ̀ gandǝ sǝlǝ kàngkàng ama ɓwa mana kat mǝ nongginǝban na, ko mǝ pakki agir ɓeami na, ko mǝ nzumon na ka, pà nǝ̀ kum kutio a Domurǝm mala Kǝrǝsti andǝ Ɓakuli ɗang. Acemǝnana nzumon ka, ndá mwashat andǝ peri aban agirkuncau.

1 Amǝ Tasalonika 2:12

Sǝm ɓuakia arǝ wun, sǝm ɓakɓabum wun, sǝ sǝm kwarkir wun ama, wu duk ulang do mǝnana ban nǝ̀ ɓoari Ɓakuli a rǝì, yi mana nda ɓwa mǝnana tunǝ wun ɓǝ̀ wu yi do aɓata domurǝm andǝ gulo male ka.

2 Timoti 2:12

Ɓǝ̀ sǝm twal gandǝrǝu aɓa tanni ka, sǝm nǝ̀ duk amurǝma ate. Ɓǝ̀ sǝm tǝmce surǝe ka, yì gbal ka, nǝ̀ tǝmce surǝ sǝm.

2 Timoti 4:8

Sǝ ado ka, tangnakusǝam, yì jeko mala turo-cauɓoarna ka, nda rǝ kundǝam, mǝnana Mǝtalabangŋo, Mǝɓashi aɓa mǝsǝcau nǝ̀ pam a Pwari nyare male ka. Sǝ tangnakusǝu man ngga pa acem nǝmurǝam ɗang, nda gbal acea aɓwana mǝnana kat à kǝ earce yiu male ka.

Amǝ Ibǝru 1:14

Nggearǝ amǝturonjar kat ka, abangŋo na mǝnana à pakkiyi turo, à kǝ turia ɓǝa kǝ ɗenyi nǝ aɓwana mǝnana à nǝ̀ kum amsǝban ngga re?

Amǝ Ibǝru 11:16

Sǝ yia ka, à nda ban alta nzali mǝɓoarne mǝnana kuti mǝno ka, nzali mǝnana a kuli ka. Nda gir mǝnana tsǝa sǝ Ɓakuli ka, kǝsǝkya pakki wi, yi mana ɓǝa tunǝi ama nda Ɓakuli malea ka ɗang, acemǝnana gilǝkina nggeala acea.

Amǝ Ibǝru 4:3

Sǝ sǝm mǝnana sǝm pà ɓamur sǝm ngga, sǝm nda sǝm nǝ̀ kutio aɓa usǝlǝo mǝno ka. Sǝ malea yì aɓwana mǝnana à pà ɓamuria raka, Ɓakuli na ama, “Pǝlǝa ǝn kánna aɓa bumlulla mem, ‘À pà nǝ̀ kutio aɓa usǝlǝo mem ɗang.’ ” Bang mǝnia ka, kat andǝ amani ama malǝna aturo male ɗiɗyal a shareta ɓanza ka.

Amǝ Ibǝru 9:26

Ɓǝ̀ nda anggo ka, ɓǝ́ Kǝrǝsti camǝna arǝ nu tanni tutu, twal a tita ɓanza yi bwal adyan. Sǝa ma ado ka, yi pusǝrǝi kusǝ mwashat ɓǝrɓǝr a masǝlǝata anza, ace mǝnana ɓǝ̀ twalban cauɓikea, nǝ́ pa mǝnana pà ɓamuri duk gir'nkila ka.

Jemis 2:5

Wu kwaki kir wun, wun amǝ'eamrǝarǝu mǝnana ǝn earkiyi acea raka, Ɓakuli twal aɓwana mǝnana amǝɓanza nyesǝia amǝtǝr na ka, ɓǝa duk amǝkume aɓa paɓamuru abani. Sǝ ɗǝm ngga ɓǝa kum domurǝm mǝnana Ɓakuli pàcau ama nǝ̀ pe aɓwana mǝnana à kǝ earce ka.

1 Bitǝrus 1:9

Wu ndanǝ ulang man yì banɓoarnado ka acemǝnana wu nda rǝ kum tangnakusǝu mala paɓamuru ma'wun abaní, yi amsǝban mala ayilǝmi wun.

1 Bitǝrus 3:9

Wu kǝa wu mbweban nǝ ɓealɓikea a kun ɓealɓikea ɗang. Ɓǝ̀ aɓwana sanggi wun ngga, ce wu nyesǝia wia nǝ sanggiban ɗang; a kun mani ka wu tsǝkia wia bu, acemǝnana nda àkǝ̀ ce mani sǝ Ɓakuli tunǝ wun, ama ɓǝ̀ wu kum tsǝkbu.

Sǝna 13:8

Aɓwana kat mǝnana à ndanǝ do a ɓanza ka, à nǝ̀ peri aban nyamɓikea, yì aɓwana mǝnana tite a share ɓanza ka, lullǝia pà kàm a gilǝe aɓa Malǝmce raka, yì Malǝmce Yilǝmu mala Mǝgam mǝnana à pwan meali ka.

Sǝna 17:8

Mǝno yì nyamɓikea a sǝni ka, ndakam ɗiɗyal nǝ yilǝmu, ado ka pà kàm ɗang, sǝ banì pà nǝ̀ sau ɗang ndo nǝ ngga puro aɓa tuli-tàtǝkǝtè, sǝ nǝ̀ kutio nǝ̀ ká lú mǝnana málá male pà kàm raka. Aɓwana mǝnana à ndanǝ do a ɓanza, amǝnana pur a share ɓanza ka, à gilǝ lullǝia aɓa Malǝmce Yilǝmu raka, à nǝ̀ ndali nǝ nyare-yiu mala man yì nyamɓikea mǝnana wú ɗiɗyal ka.

Sǝna 19:16

Arǝ daura male aban byali ka, lullǝu na kam à gilǝì ama: MURƏM MALA AMURƏMA ANDƏ GBANI AMUR AMƏTALA ANZALI.

Sǝna 21:7

Ɓwa mǝnana kat limurǝm ngga, mǝ nǝ pe wi liɓala mala amǝnia yì agir ka, sǝ yì ka, nǝ̀ duk munem sǝ mǝ nǝ duk Ɓakuli male.

Sǝna 5:10

A nyesǝnia à pǝlǝna aɓwana mǝnana Ɓakuli ma'sǝm nda murǝm amuria, sǝ apǝris ace pakki wi turo, sǝ à nǝ̀ duk agbani a ɓanza.”