Jemis 1:17 - Maləmce Məfele mala Ɓakuli: Kurcau Məbəshe

¹⁷ Koya ɓoro mǝɓoarne, mǝɓafoe ka, sulǝ nǝ kuli, nǝban Ɓakuli Tarrû mǝnana pak atalaban ngga, mǝnana ɓǝ̀ pǝlǝa aya bui ka kǝ nggaɗi ɗang sǝ kǝ tur pǝndǝa raka.

Jemis 1:17 ပူးပေါင်းရင်းမြစ်များ

Matiu 7:11

Kat andǝ ɓealɓikea ma'wun ngga wu sǝlǝ pe amuna ma'wun aɓoro mǝɓoarne, sǝ nǝ Tár wun mǝnana a kuli ka? Ndanǝ ɓabum mana ɓoaro kutibanì ka nǝ̀ pe aɓwana mǝnana à zǝmbǝi wi ka, agir mǝɓoarne!

Luka 11:13

Sǝ ɓǝ̀ wun, amǝ'ɓealɓikea, wu sǝlǝ pe amuna ma'wun aɓoro mǝɓoarne ka, sǝ koshi Tar wun mana a kuli ka! Yì ka, aɓa njar mǝnana wori mǝno ka nǝ̀ pea aɓwana mǝnana à zǝmbǝi wi ka, Bangŋo Mǝfele!

Yohana 1:9

Tǎlaban mǝ'mǝsǝcau nì, mǝnana kǝ ta aban ɓwapǝndǝa kat ka, ndo kǝ yiu a ɓanza ka.

Yohana 3:27

Pǝlǝa Yohana na ama: Ɓakuli na kǝ pe ɓwa turo mǝnana nǝ̀ pak ka.

Yohana 3:3

Yesu eari wi ama, “Mǝ nda ban no mǝsǝcau, ɓǝà ɓǝsǝlǝ ɓǝl ɓwa raka, pà nǝ̀ kutio aɓa domurǝm mala Ɓakuli ɗang.”

Yohana 8:12

Yesu nyar ɗǝm banggi aɓwana ama, “Mǝ nda tǎlaban mala ɓanza! Ɓwa mǝnana kat kpatam ngga, pà nǝ̀ gya a pǝndǝa ɗang, nǝ̀ kum tǎlaban mala yilǝmu.”

Amǝ Mishan 11:18

Lang à nǝ̀ o ana ka, à pànǝ kun nacau ɗǝm ɗang, kara à tita ɓwangsǝki Ɓakuli. À na ama, “Sǝm sǝnǝni ado, Ɓakuli pani aɓwana mǝnana amǝ Yahudi na raka gbal njargula mala pwanzali a mala pǝlǝ nzǝmia arǝ acauɓikea malea, ɓǝa kum yilǝmu!”

Amǝ Mishan 5:31

Nda Ɓakuli loasǝi, dumsǝi a buno mala gulo, a bui mǝli, nda sǝ duk Ɓwamǝgule andǝ Mǝ'amsǝban ngga. Ɓakuli pak mǝnia yì gir ka ace pe amǝ Isǝrayila dǝmbǝu mala pwanzali ɓǝa pǝlǝ nzǝmia arǝ acauɓikea malea, sǝ nǝ̀ twalia wia banì.

Amǝ Roma 6:23

Tangnakusǝ cauɓikea ka, lú na, sǝ ɓoro mala Ɓakuli ka, nda yilǝmu mǝnana málá male pà kàm raka, nǝ bu Kǝrǝsti Yesu Mǝtala sǝm.

1 Amǝ Korinti 4:7

We ka, a nda ɗàng andǝ acili aɓwana le? Mana gir nì a ndanǝi mǝnana à po nǝ pa raka? Sǝ ɓǝa po nǝ pa ka, man tsǝa sǝ a kǝ nggori kǝla a pak turo ace?

2 Amǝ Korinti 4:6

Ɓakuli mǝnana na ama, “Ɓǝ̀ tǎlaban ta aɓa pǝndǝa” ka, tana a ɓabum sǝm ace pà sǝm tǎlaban mala surǝ ɓoarɓwa mala Ɓakuli mǝnana à nǝ̀ sǝni a ɓamǝsǝ Yesu Kǝrǝsti ka.

Amǝ Afisu 1:18

Ən nggǝ pak hiwi gbal ama, ɓabum wun ɓǝ̀ lumsǝ nǝ tǎlaban, ace mǝnana ɓǝ̀ wu surǝ tsǝkɓalǝu mana Ɓakuli tunǝ wun aɓalǝi ka. Sǝ mǝnia yì tsǝkɓalǝu mǝnana nda ace aɓwana male mǝfele ka, nda mǝnana ama, ɓǝa kum agir mǝɓoarne kǝkǝr aɓa liɓala mǝgule, mǝnana Ɓakuli bangŋa ama nǝ̀ pea wia ka.

Amǝ Afisu 2:8

Ɓwamuru mala Ɓakuli na amsǝ wun ngga, nǝ paɓamuru ma'wun abani. Mǝnia ka, pe ma'wun na ɗang, ɓoro mala Ɓakuli na,

Amǝ Filipi 1:29

Acemǝnana dǝmbǝu mǝnana wu kumo arǝ pakki Kǝrǝsti turo ka, pa ace paɓamuru nǝmurǝì abani ɗang, nda gbal acemǝnana ama wu nǝ̀ nu tanni ace ka.

1 Timoti 6:16

Kǝ yì mwashat, nda mǝnana pà nǝ̀ wu raka, sǝ ban-do male ka, nda aɓa tǎlaban mǝcande mana kǝɓwa pà nǝ̀ gandǝ sungŋo abani raka. Kǝ mǝsǝu malaká sǝni ɗang, sǝ kǝ ɓe pà kàm nǝ̀ sǝni ɗang. Abani kat, sǝ gulo andǝ rǝcandǝa mǝnana málá male pà kàm raka, pa! Amin.

Amǝ Ibǝru 13:8

Yesu Kǝrǝsti kǝ nggaɗi ɗang; kǝ mǝ'mwashati na yilung, andǝ yalung, sǝ málá male pà kàm ɗang.

Jemis 1:5

Ɓǝ̀ kǝɓwa aɓalǝ wun ɗwanyi sǝlǝe ace pak mǝɓoarne ka, ɓǝ̀ zǝmbǝa aban Ɓakuli mǝnana kǝ pa nǝ ɓabumi kat nggwani pà kàm raka. Sǝ à nǝ̀ pe wi.

Jemis 3:15

Acemǝnana mɓali andǝ earce ɓamuru ka à pa aɓa sǝlǝe mǝnana mala Ɓakuli na ka ɗang. Amǝno yì agir ka à mala ɓanza na, mala Bangŋo mala Ɓakuli na ɗang; mala mgbǝrǝm na.

Jemis 3:17

Sǝ sǝlǝe mǝnana pur nǝ kuli ka mǝɓoarnsari na, sǝ ndanǝ earce dotarǝu, nda ɓukɓuk aɓa pa male, kǝ ɗenyi nǝ aɓwana, lumsǝ nǝ mǝsǝswatǝr andǝ aturo mǝɓoarne, kǝ lǝmndǝ tàrban ɗang sǝ kǝ pak gir aɓa mǝsǝcau.

1 Yohana 1:5

Mǝnia ka nda cau mǝnana sǝm oe abani, sǝ sǝm nggǝ hamnǝi aban wun ama: Ɓakuli ka tǎlaban na, sǝ kǝ pǝndǝa pa aɓalǝi ɗang ko bǝti.

1 Yohana 4:10

Mǝnia ka, nda nggearǝ earcearǝu: Sǝm nda mǝnana sǝm earce Ɓakuli ka ɗang, yì nǝ̀ earce sǝm, sǝ tur Muni ɓǝ̀ yi duk gir'nkila ace twal acauɓikea ma'sǝm.

Sǝna 21:23

Sǝ yì nggeala ka, pà nǝ̀ na ce pwari ko zongŋo ɓǝa tǎ amuri ɗang, acemǝnana tǎ mala ɓoarɓwa mala Ɓakuli ka, kǝ pa tǎlaban a ɓalǝi, sǝ Mǝgam ngga nda tǎlaban male.

Sǝna 22:5

Dù pà nǝ̀ nyare nǝ̀ pak ɗǝm ɗang. À pà nǝ̀ earce pitǝla ko pwari ace pa tǎlaban ɗǝm ɗang, acemǝnana Mǝtalabangŋo Ɓakuli ka, nda tǎlaban, nǝ̀ tǎ amuria. Sǝ à nǝ̀ duk amurǝma masǝlǝate pà kàm ɗang.