Lɔmukalu 12:12 - Ala Ya Salatikan Kula Kitabu

¹² Ài yi sawa ka bɛn ài jeisii ma, ka tɔlɔyalu mina ài ma sawali boloma, ka kɛ Ala dalila kudein.

Lɔmukalu 12:12 ပူးပေါင်းရင်းမြစ်များ

Matiyu 5:12

Ài kɔnɔlɔ yi diya bubale, kamasɔlɔn ài kɛtɔ balayi ba le sɔlɔnna haijɛnɛ, kamasɔlɔn ai ka kela kɔlɔkɔlɔlu jangata ten ne.»

Luka 10:20

Wo bɛ n'a kɛ, ài kà sawa ka bɛn jinalu koloko ma ài yɛ. Mafɔ, ài yi sawa kamasɔlɔn ài tɔɔlu sɛvɛnin haijɛnɛ.»

Luka 21:19

Wo le y'a ma, ài y'ài lɔgbeleya, fɔsa ài nii la yi kisi.

Luka 8:15

Malo minu na benna duu kein kan, wolu le mɔɔlu le minu yi Ala kumakan mɛnna, k'ai bolo kɛ a la ai josokun ɲuma lɔ, min telenin. A do yi sawatila ai ma ka bɛn aiya sawali ma.»

Kɛkolu 1:14

Ai bɛ tɛɛ ai ladɛnna Aladaliko lɔ miliya kelen ne kan waate bɛ, ailu ni moso dɔlu, ani Isa ba Mɔyamu, ni a dɔɔkɛlu.

Kɛkolu 12:5

Wo lɔ, ai tɛɛ Piyɛli lamalala kaso la, kɛɛ limaniyajama tɛɛ Ala dalila a yɛ kosɛvɛ.

Kɛkolu 2:42

Limaniyamɔɔlu k'ai sɛmɛdon kalan ma keladennu fɛ, ani ka ladɛn kɛ i ɲɔɔ fɛ iwo badenmalu, ani ka kɛ bulu lɔtalale i ɲɔɔ wotɛ, ani ka Ala dali i ɲɔɔ fɛ.

Kɛkolu 6:4

Ǹu koni kɛtɔ mɔ gbaladonna Aladaliko la ani ka Ala kumakan lase.»

Lɔmukalu 15:13

Ala min yi jeisii dila, wo y'ài josoladiya k'ài josolajii bɛlɛbɛlɛ kɛ àiya limaniya fɛ, fɔsa a dɔ yi to lala àiya jeisii kɔkan ka bɛn Nii Sɛnɛyanin ya seetiiya ma.

Lɔmukalu 15:4

Ko minu bɛ sɛvɛnin kɔlɔkɔlɔ le, wolu sɛvɛnin mɔ kalanko le lɔ, fɔsa m'i jeisii sɔlɔn ka bɛn sawali ni sɛmɛdonko ma, lɔhɔlɔma kitabulu yi minu dila mɔ ma.

Lɔmukalu 2:7

Wo ma, mɔɔ minu sawalinin aiya koɲumakɛko ma fɔsa ai yi magbiliyali ni buɲali ni habadan niimaya ɲinin ai jɛlɛ yɛ, Ala kɛtɔ niimaya banbali dila wolu le ma.

Lɔmukalu 8:25

Kɛɛ ni mɔ jei siinin ka kɛ ko yenbali dɔ la, m'i wo makɔnɔna sawali le boloma.

1 Kolɛntikalu 13:13

Wo le y'a ma yi ne, ko sawa le yi je minu totɔ je habadan: limaniya, jeisii, ani kanundeya. Kɛɛ a bɛ lɔ bubata le kanundeya le.

2 Kolɛntikalu 12:8

Ǹ na mɔ Tii madiyala siɲa sawa le, ǹ ko a yi tɔlɔya wo majaan ǹ na.

Filipikalu 3:1

Ka ǹa kuma laban m̀ badenmalu, ài yi sawa mɔ Tii ya kafonɲɔɔya lɔ. Ǹ tɛɛ vɛ kuma minu sɛvɛ ài ma sɔ, ka seikɔ wolu ma, wo tɛ ǹ ɲana ko le. Wo do kɛtɔ ài matangala.

Filipikalu 4:4

Ài yi sawa mɔ Tii ya kafonɲɔɔya lɔ. Ǹ'a fɔla yi ne kɔtunun, ài yi sawa!

Kɔlɔsikalu 1:11

M'i Ala dalila kɔtunun k'a fɔ ko a ài sɛmɛdon boloɲa suu bɛ ma ka bɛn aa fanga makawanin ma, fɔsa ài yi se ko bɛ minala ài ma sawali ni josoladiya boloma.

Kɔlɔsikalu 1:27

Ala n'a jatesiila ko k'ai lalɔnni gbonoko wo la, min do makawanin ka gbiliya dunuɲa siboloma bɛ ɲakɔlɔ. Gbonoko wo le min ne: Masa Tɔɔmasenin y'ài josokun nɔ, ale min àiya nɔɔlɔ sɔlɔnko jeisii le.

Kɔlɔsikalu 4:12

Ɛpafalasi, min y'ài dɔ le ani Masa Tɔɔmasenin Isa ya bɔiden, wo y'ài fola. A lɔgbeleyayine Aladaliko ma ài yɛ waate bɛ, fɔsa ài yi lɔjanin yi to, ka sawati, ani ka to hangililatɛɛ lɔ, ka dafa Ala sawo bɛ lɔ.

Kɔlɔsikalu 4:2

Ài y'ài lɔgbeleya Aladaliko ma kudein, ka to ài ɲana, ka kɛ balika bɔla Ala yɛ.

1 Tɛsalonikakalu 1:3

Mɔ Fa Ala ɲakɔlɔ, mɔ hangili toyine ài kɛkolu lɔ limaniya lɔ, ani àiya baalelu kanundeya lɔ, ani àiya sawali ka bɛn ai jeisiiko ma mɔ Tii Masa Tɔɔmasenin Isa la.

1 Tɛsalonikakalu 5:8

Kɛɛ komi m'i telelɔmɔɔ le le, wo lɔ, ài m'i mɔ jɛlɛ lɔmina. Ài m'i mɔ jɛlɛ lɔbɛn, ka limaniya ni kanundeya kɛ iwo sisimakalanfen, ani ka kisiko kɛ mɔ jeisii le, iwo nɛɛ fula.

2 Tɛsalonikakalu 1:4

Wo le n'a kɛla, ǹu gbu ɲalɔkɛnɛyanin àiya ko lasenko lɔ Ala ya limaniyajamalu ma, kamasɔlɔn ài yi jangata ni gbalo suu bɛ le minala ài ma, k'ài bolo kɛ àiya limaniya la kpekpe.

2 Tɛsalonikakalu 3:5

Mɔ Tii y'ài josokun daka Ala ya kanundeya yɛ, ani Masa Tɔɔmasenin ya sawali.

1 Timote 6:11

Ile Ala ya mɔɔ koni, i i jɛlɛ matanga ko wolu ma, ka bɔli telenmandeya kɔ, ani Alaɲasiyanɲɛ, ani limaniya, ani kanundeya, ani sawali, ani sɔniyali.

2 Timote 3:10

Ile koni yi ǹa kalanko kalama le feu, ani ǹ taamaɲa, ani ǹa kojatesiininnu, ani ǹa limaniya, ani ǹa sawali, ani ǹa kanundeya, ani ǹ'i kolu minala m̀ ma teme.

Tite 2:13

ka mɔ to mɔ jeisii hɛlɛlon makɔnɔna, mɔ Tii Ala makawanin ya magbiliyali lankɛnɛmayatɔ lon min na, min yi mɔ Lakisiba Masa Tɔɔmasenin Isa le.

Tite 3:7

fɔsa m'i kɛ telenmande le Ala ɲakɔlɔ ka bɛn aa nɛɛma ma, ka mɔ fɛ bila niimaya banbali sɔlɔnko la, m'i mɔ jeisii le.

Hebululu 10:32

Ài y'ài hangili to lon timinninu lɔ, ài bɔ kɔ divi lɔ, ài na sɛɛ gbɛlɛn ni tɔlɔya manɔla waate min nɔ.

Hebululu 10:36

Ài mako yi sawali la, fɔsa ài vɛ banna Ala sawonanko kɛla, ài yi balayi sɔlɔn min lahedi tanin.

Hebululu 12:1

Komi mɔ lamininnin sele jama ba suu min ne, wo le y'a ma, ài m'i ko bɛ to je min yi mɔ lasumayala ani julumbu minu ta diyanin mɔ bolo, fɔsa m'i se bɔli manɔla min latɛɛnin mɔ ma,

Hebululu 3:6

Kɛɛ Masa Tɔɔmasenin ka kɛ lanande le iwo denkɛ min siinin Ala ya bon kunna. Mɔ do kɛnin aa bon ne le, ni mɔ bolo ka to maa lanaya la kpekpe, ani maa ɲalɔkɛnɛya jeisii la.

Hebululu 5:7

Isa ya dunuɲalɔtɛɛ lɔ, a ka madaili ni madiyali kɛ Ala yɛ kasikan ba ni ɲaji lɔ, a see tɛɛ min yɛ k'a lakisi saya ma. Ado Ala ka aa madailikan javi ka bɛn a ɲasiyanɲɛ le ma.

Hebululu 6:12

Wo ma, ài kà kɛ saakɔlɔ le, mafɔ ài y'ài suma mɔɔ wolu ma, minu yi Ala ya lahedi taninnu sɔlɔnna ka bɛn aiya limaniya ni aiya sawali ma.

Hebululu 6:15

Ibulahima do k'a sawali haan fɔɔ a ka lahedi tanin sɔlɔn.

Janguba 5:7

Wo lɔ, m̀ badenmalu, ài y'ài sawali haan fɔɔ mɔ Tii nalon yi se. Ài y'a ye sɛnɛkɛbalu yi sɛnɛfen kulugbɛlɛnnu makɔnɔna teme ka bɔ aiya sɛnɛlu lɔ sawali boloma. Ai do sawalinin yi tola haan fɔɔ sanji kunfɔlɔ ni a labannu yi na.

1 Piyɛli 4:13

Mafɔ, ài y'ài kɔnɔlɔdiya, kamasɔlɔn ài vɛ ài ta sɔlɔn Masa Tɔɔmasenin ya tɔlɔya lɔ, fɔsa ài kɔnɔlɔ yi diya kɔtunun bɛlɛbɛlɛ kɛ aa magbiliyali la vɛ nkɛnɛmayala lon min na.

1 Piyɛli 4:7

Dunuɲa laban waate ma vɛ sulunya. Wo le y'a ma, ài y'ài hangili sii k'ài kɛ jɛlɛlɔminamɔɔ le, fɔsa ài yi se Ala dalila a ɲa bɛlɛbɛlɛ ma.

2 Piyɛli 1:6

ka jɛlɛlɔmina la àiya lɔnni kɔkan, ka sawali la àiya jɛlɛlɔmina kɔkan, ka Alaɲasiyanɲɛ la àiya sawali kɔkan,

Ko Lankɛnɛmayanin 13:10

Ni mɔɔ min ka kan ka mina jɔnya boloma, wo tii yi taa jɔnya lɔ. Ni mɔɔ min do ka kan ka faa siyamifan ne, wo tii yi faa siyamifan ne. Wo ma, fɔ mumininnu y'ai sawali ka to limaniya lɔ.