Luka 8:13 - Ala Ya Salatikan Kula Kitabu

¹³ Malo minu na benna fala kɔkan, wolu le mɔɔlu le minu yi Ala kumakan mɛnna, k'ai bolo sii a kɔlɔ telemanin sawa boloma. Kɛɛ kuma wo lilen tɛ donna ka jaanfa ai josokun nɔ. Ai yi waateni le kɛla limaniya lɔ, kɛɛ do lɔsumani waate vɛ senna ai ma, ai yi limaniya siya bilala.

Luka 8:13 ပူးပေါင်းရင်းမြစ်များ

Malɛkɛ 6:20

kamasɔlɔn a kɛ́ Helodi tɛɛ siyanna Yaya ɲa k'a lakana kobɛn. A tɛɛ k'a lɔn ko wo tɛɛ mɔɔ telennin ne le, ani mɔɔ sɛnɛyanin. Helodi tɛɛ v'a tolomalɔla Yaya la kotan, a hangili tɛɛ ɲaami. Wo bɛ n'a kɛ, Yaya kumakan diyayine tɛɛ a yɛ.

Luka 8:12

Malo minu na benna siya dala, wolu le mɔɔlu le minu yi Ala kumakan mɛnna. Kɛɛ wo kɔ, Soitana yi nala ka kuma wo bɔ ai josokun nɔ, alako ai kana limaniya ka kisi.

Luka 8:14

Malo minu na benna wonilu tɛma, wolu le mɔɔlu le minu yi Ala kumakan mɛnna, kɛɛ ai yi haminna dunuɲalɔtɛɛkolu le le, ani nafolokolu, ani jɛlɛdiyabɔkolu. Wo boloɲa ma, Ala kumakan lɔgbalinyine ai josokun nɔ, k'ai kɛ iwo malo fofo.

Yohana 15:2

Ni m̀ bolo min tɛ a dɛnna, ǹ Fa yi wo tɛɛle a la k'a lafili. Kɛɛ do, ni m̀ bolo min vɛ kɛla a denna, a yi wo kun latɛɛle, fɔsa a a den siyama kɛ ka timin a kunfɔlɔ ta la.

Yohana 15:6

Ni mɔɔ min kafonnin ma to ǹ kan, wo tii kɛyine iwo jili bolo tɛɛnin, min la yi filila, a yi ja. Jili bolo suu wolu la yi dɛnna k'ai ɲɛnin taa la.

Yohana 5:35

Yaya tɛɛ fitina le le min tɛɛ mɛnɛnna gbesekele. Ài do ka diɲa ka waateni kɛ sawala aa kɛnɛya lɔ.

1 Kolɛntikalu 13:2

Hali ni ǹ ka kelayakɛ see sɔlɔn ka gbonoko bɛ ɲaye ani ka lɔnni bɛ sɔlɔn, hali ni ǹa limaniya ka wala haan fɔɔ ka ǹ se tinilu bɔla ai nɔlu lɔ, ni kanundeya ma kɛ ǹ josokun nɔ, ǹ tɛ foi le.

1 Kolɛntikalu 15:2

Ài do kɛtɔ kisila Samakan Kein min ne fɛ, ni ài fasanin ka to a ma, iwo ǹ n'ài kawanila teme. Niwotɛ, àiya limaniya yi kɛle kofuun ne.

Galatiyakalu 3:1

Àilu Galatiyaka hangilindannu! Jene n'ài hangili ɲaamina? Masa Tɔɔmasenin Isa gbaannin kɔlɔman ma kun min na, ǹ na wo lagbɛla ài yɛ kɔlɔman ne.

Galatiyakalu 3:4

Ài na timinna ko minu bɛ lɔ, jalasa wo bɛ yi kofuun ne le? Ai tɛ kofuun ne feu!

Ɛfɛsikalu 3:17

fɔsa Masa Tɔɔmasenin yi sawati ài josokun nɔ ka bɛn limaniya ma. Ǹ'i Ala dalila kɔtunun, ǹ ko, àiya kanundeya lilen yi don ka bama,

Kɔlɔsikalu 1:23

Kɛɛ fɔ ài lilen yi don limaniya lɔ k'ài bama. Ài na jeisii min sɔlɔnna Samakan Kein lamɛn fɛ, ài la kà maamaa k'ài mataa jeisii wo la feu. Samakan Kein la vɛ se dunuɲamɔɔ bɛ ma, ado ǹe Pɔli vɛ kɛ samakan min bɔiden ne.

Kɔlɔsikalu 2:7

k'ài lilen don k'ài bama aa ko lɔ, ani k'ài sawati limaniya lɔ iwo ài kalannin a la teme, ài vɛ balika bɔla Ala yɛ kudein.

1 Tɛsalonikakalu 3:5

Wo le y'a ma, ǹ tɛɛ tɛ se a minala m̀ ma mingɛ, ǹ na Timote lataala ài ma k'a lɔn àiya limaniya yi teme. Kamasɔlɔn ǹ tɛɛ siyanna k'a fɔ ko Soitana vɛ ài manɛɛ boloɲa dɔ ma, ka maa baale kɛ kofuun ne.

1 Timote 1:19

i bolo kɛnin vɛ limaniya la, k'i joso sɛnɛyanin to. A dɔlu v'i ban wo ma k'aiya limaniya tiɲa tɛtɛ,

Hebululu 10:39

Ǹu do fɛ tɛ mɔɔ wolu la minu yi seikɔla ai kɔma ka halaki, mafɔ minu yi tola limaniya siya kɔkan ka kisi.

Janguba 2:26

Kamasɔlɔn falikolo yi fen sanin ne teme ni nii t'a lɔ, wo boloɲa kelen ma, limaniya min tɛ mɔɔ lɔla kɛko ɲumalu la, wo sayine.

2 Piyɛli 2:20

Ado ni mɔɔ minu k'ai sen bɔ dunuɲa kokɔsɔninnu lɔ ka bɛn mɔ Tii ni mɔ Lakisiba Masa Tɔɔmasenin Isa lɔnko ma, ni ko wolu k'ai mina ka see sɔlɔn ai ma kɔtunun, wo vɛ kɛla, mɔɔ wolu laban kɛwonyatɔle ka timin a kunfɔlɔ ta la.

2 Piyɛli 2:22

Aiya ko yi lala sana bɛlɛbɛlɛ minu le ma iwo: «Wuluni yi fennabɔ kɛla ka ban k'a kɔsei a ma,» ani fana: «Kɔsɛ v'i kola feeya, a a kɔseila ka kulukulu bɔɔ lɔ.»

1 Yohana 2:19

Mɔɔ wolu bɔnin mɔ tɛma le, kɛɛ ai fɛ tɛɛ tɛ mɔ la, kamasɔlɔn ni ai tɛɛ kɛ mɔ dɔ le, ai tɛɛ tole mɔ fɛ. Kɛɛ komi ai vɛ bɔ mɔ fɛ, wo v'a lagbɛ ko ai suu suu fɛ tɛɛ tɛ mɔ la.

Jude 1:12

Ài vɛ ài ladɛnna badenmaya boloma feetikɛko lɔ, mɔɔ wolu yi nala tiɲali le le ài tɛma, ai vɛ tolon kɛla ài fɛ malobaliya boloma. Saakunnasiiba le ai le minu gbalanin ai jɛlɛkanu ko le dein, ka saalu to je. Ai do kɛyine iwo sanbiliya minu yi taala fɔɲɛ fɛ, sanji tɛ minu lɔ. Ai kɛyine kɔtunun iwo kɔlɔman minu tɛ ai denna hali ai den waate ka kɛ, ani kɔlɔman minu ju bɔnnin duu lɔ ka sa feu.