Kɔlɔsikalu 3:16 - Ala Ya Salatikan Kula Kitabu

¹⁶ Masa Tɔɔmasenin kumakan yi sawati ài tɛma boloɲa bɛ ma, ài v'i ɲɔɔ kalanna k'i ɲɔɔ lali hangilimaya bɛ la, ani ka Zabuli kitabu dɔngililu la, ani baiti ni dɔngililu Nii Sɛnɛyanin yi minu dila, ka balika bɔ Ala yɛ ài josokun bɛ le.

Kɔlɔsikalu 3:16 ပူးပေါင်းရင်းမြစ်များ

Matiyu 26:30

Wo kɔ, ai ka baiti la, ka bɔ je ka taa Zeituna tini kɔkan.

Luka 2:51

Isa ka taa ai fɛ Nazalɛti, a do k'i fanmajii ai yɛ. A ba do tɛɛ ko wo bɛ ladalola a josokun nɔ.

Yohana 15:7

Ni ài kafonnin ka to ǹ kan, ani ǹ kumakannu ka sawati ài josokun nɔ bɛlɛbɛlɛ kɛ, ài vɛ ko ko si dalila, wo yi kɛle ài yɛ.

Lɔmukalu 10:17

Wo le y'a ma, mɔɔ yi limaniya sɔlɔnna tolomalɔ le fɛ, mɔɔ do yi min mɛnna, wo yi bɔla Masa Tɔɔmasenin kumakan ne lɔ.

Lɔmukalu 15:14

M̀ badenmalu, ǹe gbu layine a la ko àiya ɲumaya dafayine, ani àiya lɔnni walayine, ani a see y'ài yɛ k'i ɲɔɔ lali.

1 Kolɛntikalu 14:15

Ǹ'i mindɛ le kɛ wo lɔ? Ǹ kɛtɔ Ala dalila ǹ josokun ne ani ǹ hangili le fana, ka baiti la ǹ josokun ne ani ka baiti la ǹ hangili le kɔtunun.

1 Kolɛntikalu 14:26

M̀ badenmalu, ài ka kan k'a kɛ di wo lɔ? Ni ài vɛ ladɛn kɛla waate min nɔ, ni mɔɔ dɔ y'a fɛ ka baiti la, a a la. Ni kalan y'a dɔgbɛlɛ fɛ, a yi mɔɔlu kalan. Ni ko lankɛnɛmayanin dɔ ka kɛ a dɔgbɛlɛ fɛ ka bɔ Ala fɛ, wo tii y'a fɔ. Ni dɔ y'a fɛ ka kuma kan gbɛlɛ lɔ, a yi kuma. Ni a see yi mɔɔ dɔ yɛ ka kan gbɛlɛ wo latimin, a a latimin. Kɛɛ ko bɛ yi kɛ ka bɛn limaniyajama lasawatiko le ma.

Ɛfɛsikalu 1:17

Mɔ Fa Nɔɔlɔtii, min kɛnin mɔ Tii Masa Tɔɔmasenin Isa Tii Ala le, ǹ'i wo dalila, ǹ ko, a yi hangilimaya di ài ma, ka kolu lankɛnɛmaya ài yɛ fɔsa ài y'a lɔn a ɲa gbugbu ma.

Ɛfɛsikalu 5:17

Wo ma, ài kà kɛ hangilindan ne, mafɔ ài y'ài lɔja ka mɔ Tii sawo lɔn.

Ɛfɛsikalu 5:19

Ài i ɲɔɔ sɛmɛdon Zabuli kitabu dɔngililu le, ani baitilu, ani dɔngililu Nii Sɛnɛyanin yi minu dila. Ài yi dɔngililu la ka mɔ Tii tanu ài josokun bɛ le!

Ɛfɛsikalu 5:26

fɔsa a aa limaniyajama bila a ta fan a jɛlɛ yɛ, a ban kɔ wo lasɛnɛyala ji le ka bɛn a kumakan ma.

Kɔlɔsikalu 1:28

Wo lɔ, m'i Masa Tɔɔmasenin ya ko lasena mɔɔ bɛ ma, k'ai lali, ani k'ai kalan hangilimaya bɛ la, fɔsa m'i mɔɔ kelenkelenna bɛ dafanin lalɔ Ala ɲakɔlɔ Masa Tɔɔmasenin ya kafonɲɔɔya lɔ.

Kɔlɔsikalu 1:9

Wo le n'a kɛla, ka ta mɔ na àiya ko mɛnna lon min na, mɔ ma mɔ nɔningɛ Ala dalila ka bɛn ài ma, fɔsa ài yi Ala sawo dafanin lɔn ka bɛn hangilimaya ni koɲaye suu bɛ ma, Nii Sɛnɛyanin yi minu dila.

Kɔlɔsikalu 4:6

Àiya kumafɔɲa yi bɛn ka diya mɔɔlu yɛ waate bɛ, fɔsa ài y'a lɔn ài ka kan ka mɔɔ kelenkelenna bɛ javi teme.

1 Tɛsalonikakalu 1:8

Ài do vɛ kɛ sabu le, mɔ Tii kumakan vɛ jɛzɛn Masaduwani ni Akayi fan bɛ lɔ. Kɛɛ a do ma dan dingila wolu ma dein. Ài limaniyanin Ala ma teme, wo mangan vɛ jɛzɛn fan bɛ lɔ, ado mɔ mako tɛ wo fɔko la butu.

1 Tɛsalonikakalu 4:18

Ài ɲɔɔ sɛmɛdon kuma minu le.

2 Tɛsalonikakalu 3:15

Kɛɛ ài kà a ye ài juu le, mafɔ ài y'a lali iwo ài badenma.

1 Timote 6:17

Dunuɲa nafololu vɛ kɛla mɔɔ minu bolo, i yi wolu lali ko ai kà ai fannɔbuɲa. Ai do kà ai jei sii nafolo bantalu la, mafɔ Ala min yi fen bɛ dila mɔ ma bɛlɛbɛlɛ kɛ ka bɛn mɔ ladiyako ma.

2 Timote 3:15

Ka ta iya denniya waate ma, i vɛ lɔhɔlɔma kitabulu lɔn, minu yi se ka hangilimaya di i ma kisiko lɔ ka bɛn limaniya ma Masa Tɔɔmasenin Isa ma.

Tite 3:6

Ala ka mɔ sɔ Nii Sɛnɛyanin sɔ bɛlɛbɛlɛ kɛ mɔ Lakisiba Masa Tɔɔmasenin Isa sabu la,

Janguba 1:5

Ni ài dɔ dɛsɛnin ka kɛ hangilimaya la, wo tii yi Ala dali, a do yi hangilimaya dile wo tii ma. Ale le bolo fɔlinnin bɛ sɔko lɔ, makumali tɛ min nɔ.

Janguba 3:17

Kɛɛ hangilimaya min yi bɔla haijɛnɛ, wo yi nala sɛnɛyali le le kunfɔlɔ le, ka josolajii tuun wo la, ani sɔniyali ni nɔya. Henandeya y'a lɔ, a do kɛkolu ɲumayanin kosɛvɛ. A do tɛ lafisayali ni filangafoya kɛla.

Janguba 5:13

Jalasa mɔɔ dɔ y'ài tɛma min tɔlɔyanin? Wo vɛ kɛla, wo tii yi Ala dali. Jalasa mɔɔ dɔ y'ài tɛma min kɔnɔlɔdiyanin? Wo vɛ kɛla, wo tii yi baiti la.

1 Yohana 2:14

Dennilu, ǹ'i min sɛvɛla àilu le ma, kamasɔlɔn ài ka mɔ Fa lɔn. Falu, ǹ'i min sɛvɛla àilu le ma, kamasɔlɔn ale min yi je ka ta dunuɲa damina waate ma, ài ka a lɔn. Kavelennu, ǹ'i min sɛvɛla àilu le ma, kamasɔlɔn ài sɛmɛdonnin, ani Ala kumakan sawatinin ài josokun nɔ, ài do vɛ see sɔlɔn Soitana ma.

1 Yohana 2:24

Àilu koni, ài na kuma min mɛnna ka ta a damina ma, ài y'ài lɔja fɔsa wo yi sawati ài josokun nɔ. Ài na min mɛnna ka ta a damina ma, ni wo ka sawati ài josokun nɔ, àilu fana yi sawatile mɔ Fa ni a Denkɛ ya kafonɲɔɔya lɔ.

1 Yohana 2:27

Wo bɛ n'a kɛ, Masa Tɔɔmasenin n'ài sɔla a Nii Sɛnɛyanin min sɔ, wo le tonin ài fɛ. Ài mako tɛ kalanmɔɔ la, kamasɔlɔn Nii Sɛnɛyanin gbu y'ài kalanna ko bɛ la. Aa kalan do yi tuɲa le le, faɲa t'a lɔ. Wo le y'a ma, ài yi to aa kafonɲɔɔya lɔ iwo Nii Sɛnɛyanin n'ài kalanna teme.

2 Yohana 1:2

kamasɔlɔn tuɲa yi mɔ josokun nɔ, a do totɔle mɔ fɛ kudein.

Ko Lankɛnɛmayanin 14:3

Ai do tɛɛ baiti kula lala masayasiifen ɲafɛla lɔ, ani niimafen naani wolu ni kɛmɔbalu ɲakɔlɔ. Mɔɔ tɛɛ tɛ se baiti wo makalanna, mafɔ mɔɔ waa kɛmɛ ni mɔɔ waa binaani ni naani (144 000) wolu, Ala na minu kunmakala dunuɲamɔɔlu tɛma.

Ko Lankɛnɛmayanin 15:3

Ai tɛɛ Ala ya bɔiden Musa ya baiti lala, ani Saa Bolan ya baiti, ai vɛɛ: «Ala Seebɛtii, i kɛko bɛ makawayine ka buɲa. I kokɛɲalu telenyine, a bɛ yi tuɲa le le, ile, siboloma bɛ ya Masa.

Ko Lankɛnɛmayanin 19:10

Wo fɔ mɛlɛka bolo, ǹ ka m̀ bilin a sen kɔlɔ a batoko lɔ. Kɛɛ a do vɛɛ ǹ yɛ: «I kà wo kɛ dɛ! Bɔiden ne ǹ ne fana le iwo ile, ani i badenma minu bolo kɛnin Isa ya seleyakan na. I yi Ala le bato dein!» Kamasɔlɔn Isa ya seleyakan ne yi kelalu lɔla kelaya lasenko la.

Ko Lankɛnɛmayanin 5:9

Ai do vɛ baiti kula dɔ lala, ai vɛɛ: «Ka kafa mina, ani k'a tɔɔmaselu bɔ a ma, ile ni wo kaanyine. Kamasɔlɔn i kannatɛɛyine tɛɛ, ado ka bɛn i jeli bɔnko ma, i vɛ mɔɔlu kunmaka Ala yɛ, ka bɔ dunuɲa kabila bɛ lɔ, ani kan bɛ, ani siboloma bɛ, ani jamana bɛ.