Kɔlɔsikalu 3:11 - Ala Ya Salatikan Kula Kitabu

¹¹ Wo le y'a ma, wotɛbɔli tɛ butu Gɛlɛkika ni Jahudiyalu wotɛ, niwotɛ mɔɔ makɛnɛkɛnin ani mɔɔ makɛnɛkɛbalilu, niwotɛ tuukɔlɔmɔɔ ni siboloma ɲamakabalilu, niwotɛ jɔn ani hɔlɔlu, wo foi tɛ jatela. Min yi jatela, wo le Masa Tɔɔmasenin ne dein, a do yi bɛ le josokun nɔ.

Kɔlɔsikalu 3:11 ပူးပေါင်းရင်းမြစ်များ

Yohana 14:23

Isa k'a javi, a vɛɛ: «Ni mɔɔ min vɛ ǹ kanula, wo tii kɛtɔ ǹ kumakan labatola, ado ǹ Fa fana kɛtɔ a kanula. Ǹe ni ǹ Fa kɛtɔ nala a ma ka to a fɛ.

Yohana 15:5

«Ǹe le lɛzɛnju le, àilu le do y'a bolo le. Ni mɔɔ min kafonnin ka to ǹ kan ani ǹe fana kafonnin ka to a kan, wo tii le kɛtɔ a denna kosɛvɛ, kamasɔlɔn ni ǹe tɛ ài fɛ, ài tɛ se foi kɛla.

Yohana 17:23

Ǹ kafonnin ai kan, ado ile ni ǹe kafonnin i ɲɔɔ kan, fɔsa ai yi kɛ kelen ne bɛlɛbɛlɛ kɛ. Wo vɛ kɛla, dunuɲa kɛtɔ a lɔnna ko ile le na ǹ kelayala, ani i n'ai kanula iwo i na ǹ kanula teme.

Kɛkolu 15:17

Wo vɛ kɛla, mɔɔ tɔlu kɛtɔ ǹe ai Tii ɲininna, siboloma gbɛlɛ mɔɔlu koni, ǹ na minu bɛ kilila ǹ tɔɔ lɔ k'ai kɛ ǹ ta le. Ǹe ài Tii le na wo fɔla, ǹe min na ko wo bɛ kɛla,

Kɛkolu 28:2

Je duulennu k'ai bolo sii mɔ kɔlɔ kobɛn. Ai ka taa ba bila ka mɔ bɛ kili je, kamasɔlɔn sanji tɛɛ nala, nɛnɛ vɛ bɔla.

Kɛkolu 28:4

Je duulennu ka sa fasanin ye a bolo ma mingɛ, ai k'a fɔɔ i ɲɔɔ yɛ, ai vɛɛ: «Sika t'a lɔ, kɛ́ min yi mɔɔfaaba le le. Hali a kisinin ka kɛ ka bɔ kɔɔji lɔ, mɔ tii moso min yi koyonkɛbalu salala, wo ma diɲa a yi to a nii la.»

Lɔmukalu 1:14

A yi diyanigbeya le le m̀ ma ko ǹ'i Samakan Kein lase mɔɔ bɛ ma, sobakɔnɔmɔɔ ni toodalamɔɔlu bɛ, ani lɔnnila ni kalanbalilu bɛ.

Lɔmukalu 10:12

Wo lɔ saa, wotɛbɔli tɛ Jahudiyalu ni siboloma gbɛlɛ mɔɔlu wotɛ butu, kamasɔlɔn Tii kelen ne yi bɛ kunna, a do y'aa nɛɛma dila a tɔɔ kiliba bɛ le ma kosɛvɛ.

Lɔmukalu 3:22

Wo le k'a fɔ ko Ala yi mɔɔlu kɛla telenmande le ka bɛn limaniya le ma Masa Tɔɔmasenin Isa ma. Wotɛbɔli tɛ je,

Lɔmukalu 3:29

Niwotɛ, Ala yi Jahudiyalu Tii le le dein? Siboloma gbɛlɛ mɔɔlu fana Tii tɛ Ala le? Wolu fana y'a ta le le jɔ!

1 Kolɛntikalu 12:13

Kamasɔlɔn mɔ bɛ makonin Nii Sɛnɛyanin kelen ne bolo ka mɔ kɛ falikolo kelen ne. Wo le y'a ma, i ka kɛ Jahudiya le o, i ka kɛ siboloma gbɛlɛ le o, i ka kɛ jɔn ne o, i ka kɛ mɔɔ lafɛlɛnin ne o, mɔ bɛ laminnin Nii Sɛnɛyanin kelen ne le.

1 Kolɛntikalu 14:11

Mɔɔ min vɛ kumala ǹ fɛ, ni ǹ tɛ wo tii kan mɛnna, a kɛtɔ ǹ jatela kɔɔkanmɔɔ le le, ǹe fana kɛtɔ a jatela wo boloɲa kelen ne ma.

1 Kolɛntikalu 7:19

Kɛnɛkɛko ni kɛnɛkɛbaliya tɛ ko le, mafɔ Ala ya jamalilu latelenko.

Galatiyakalu 2:20

M̀'ɛ gbaan Masa Tɔɔmasenin fɛ kɔlɔman ma. Wo lɔ, ǹe gbu tɛ ǹ nii la butu, mafɔ Masa Tɔɔmasenin le a nii la ǹ nɔ. Ǹ'i ǹa dunuɲalɔtɛɛ min kɛla ǹ falikolo lɔ yi ne, ǹ'i wo kɛla ka bɛn limaniya le ma Ala Denkɛ ma, min na ǹ kanula k'a jɛlɛ di ǹa ko lɔ.

Galatiyakalu 5:6

Damanda mɔɔ yi Masa Tɔɔmasenin Isa ya kafonɲɔɔya lɔ, i ka kɛnɛkɛ o, i ma kɛnɛkɛ o, wo foi tɛ jatela. Min yi jatela, wo le limaniya le, min yi mɔɔ lɔla koɲuma kɛla kanundeya boloma.

Ɛfɛsikalu 1:23

a falikolo koni, aa ko bɛ dafanin min nɔ, k'a talan ale gbu yi ko bɛ dafala boloɲa bɛ ma.

Ɛfɛsikalu 2:14

Kamasɔlɔn ale gbu le maa josolajii le, min na mɔ bɛ kɛla kelen ne. A ka lagbeyaɲɛ jiin tiɲa min tɛɛ Jahudiyalu ni siboloma gbɛlɛ mɔɔlu wotɛbɔla. Ka bɛn ale gbu falikolo diko ma,

Ɛfɛsikalu 2:15

a ka Jahudiyalu ya seliya ni aa jamali ni kolatɛɛninnu bɛ laben, fɔsa aa kafonɲɔɔya lɔ, siboloma fila yi kɛ mɔɔ kula kelen ne, ka josolajii don ai tɛma.

Ɛfɛsikalu 3:17

fɔsa Masa Tɔɔmasenin yi sawati ài josokun nɔ ka bɛn limaniya ma. Ǹ'i Ala dalila kɔtunun, ǹ ko, àiya kanundeya lilen yi don ka bama,

Ɛfɛsikalu 3:6

Wo gbonoko le min ne: Ka bɛn Samakan Kein ma, Ala yi balayi minu ladalola aa mɔɔlu yɛ, Jahudiyalu ni siboloma gbɛlɛ mɔɔlu kɛtɔ wolu sɔlɔnna kelen ne, k'ai kɛ falikolo kelen ɲɔɔma le, ani k'ai dɛn lahedi la Masa Tɔɔmasenin Isa ya kafonɲɔɔya lɔ.

Ɛfɛsikalu 6:8

Ài k'a lɔn ko mɔ Tii kɛtɔ mɔ kelenkelenna bɛ salala, jɔn ni hɔlɔlu bɛ, ka bɛn maa koɲumakɛko ma.

Kɔlɔsikalu 2:10

Àilu fana ya ko bɛ vɛ dafa aa kafonɲɔɔya lɔ, ale min yi kuntii ni fangatii bɛ ya kuntii le.

1 Yohana 5:20

Ado mɔ k'a lɔn ne fana ko Ala Denkɛ nanin ka koɲaye di mɔ ma, fɔsa m'i wo lɔn, ale min y'a bɛlɛbɛlɛ le. Mɔ do kafonnin a bɛlɛbɛlɛ le kɔkan, ani a Denkɛ Masa Tɔɔmasenin Isa. Ala bɛlɛbɛlɛ le a le, ani niimaya banbali.

2 Yohana 1:9

Ni mɔɔ mɔɔ ka taa a kunfɛ, a ma to Masa Tɔɔmasenin ya kalan kɔkan, wo vɛ kɛla, wo tii tɛ Ala ta le. Kɛɛ do, ni mɔɔ min ka to Masa Tɔɔmasenin ya kalan kɔkan, wo tii yi mɔ Fa ni a Denkɛ ta le le.