Tito 3:9 - Manobo Sarangani

⁹ Meneng ikà eg-inabut te balaw wedad ontong, aw menge indan-indan tepad te menge monà otaw. Ikà eg-inabut te menge dindil te otaw egbolaw tepad te menge punù ingkeliwat i Moises, so wedad ontong tadon kenyan.

Tito 3:9 ပူးပေါင်းရင်းမြစ်များ

2 Timoteo 2:14

Pegtoladà ka te menge otaw doton te keilangan eked dan kelibeli se kedita niyan. Pegpunù ka kandan, so egtengtengen dan te Timanem, keilangan eked dan pegpedindilay tepad te kedegdagan te kagi. Wedad ontong kenyan, so olò iyan mekebaet te pegpemenal te menge otaw menenalan kenyan.

2 Timoteo 2:23

Pegpekediyò ka diyà te balaw wedad inenengen aw wedad ontong, so netegahan no te yan se eglekatan te dindil.

1 Timoteo 4:7

Ikà egpenenalan te menge indan-indan eked keibegi te Timanem aw wedad ontong. Meneng keilangan megpekagsen ka tomolò te Timanem.

2 Timoteo 2:16

Ikà eg-inabut te medaet balaw eked keibegi te Timanem, so pineokit kenyan labi pa megpekediyò se menge otaw diyà te ibeg te Timanem.

Tito 1:14

Keilangan tomanan dan te pegpenenalan dan diyà te kenà benal indan-indan te Judiyo gebii. Keilangan tomanan dan heman te pegtaking dan te menge punù te otaw timanan te kebenalan.

1 Korinto 8:1

Nayan, tomaba a te insà niyo tepad te pegkaen niyo te pengelapen imbegay diyà te inotaw egseligan te otaw kenà egsalig te Timanem. Ontò benal se inikagi niyo te netegahan te kedita tadon se kebenalan tepad te pegkaen te pengelapen imbegay diyà te inotaw. Meneng ikà niyo egkelibel kani. Aw meg-aneng-aneng kaw te netegahan niyo se kedita, yan se kelekatan te pegduyun niyo te kenyo pegkeotawun, meneng medaet iyan. Meneng aw megpedekelay kaw te pedowan, yan se kelekatan te pegpetebangay niyo tepad te pegtaking niyo te Pengolo tadon.

1 Korinto 13:2

Pengkey biyasa a egkeliwat te kagi te Timanem, pengkey doen impetaga-taga te Timanem kanak wedà din petega-tegahi diyà te doma otaw, pengkey netegahan ko se kedita te kebenalan, pengkey ontò a egsalig diyà te Timanem aw yan egpekeinang a te kepelahan, meneng aw wedad kedakel te pedowan ko diyà te doma otaw, wedad ontong kanak.

Santiago 4:1

Doen pa otaw egpedindilay kidoen kenyo. Meg-indan a den kenyo aw kenan iyan lekat. Lekat iyan te egkeibegan niyo se mekeboyo dini te keneyonan, aw yan nesamok se aneng-aneng niyo.