Tito 3:2 - Manobo Sarangani

² Pegtoladà ka kandan te eked dan peglibag, aw eked dan pegdindil. Meneng keilangan mèpiya se pedowan dan diyà te kedita te otaw, aw megsagman dan kandan,

Tito 3:2 ပူးပေါင်းရင်းမြစ်များ

Efeso 4:31

Ikà niyo egpeogpà te medaet diyà te pedowan. Ikà niyo egkeopal. Ikà niyo egdindil. Ikà niyo egbaet-baet. Ikà niyo heman eg-inang te medaet diyà te doma otaw.

Efeso 4:2

Ikà niyo egpelangkaw-langkaw. Keilangan melayat se pedowan niyo diyà te doma otaw tandà te pegpedekelay niyo te pedowan.

1 Timoteo 3:3

Eked kepakay aw eglasing, aw egbolaw, meneng keilangan mèpiya se pedowan din diyà te doma otaw. Eked kepakay aw egdindil aw egpengewarta.

1 Pedro 3:10

Doen kagi te Timanem insolat, “Aw meibeg se otaw meluba aw beyang-beyang dini lanto te tanà, keilangan eked sikandin ikagi te medaet, aw eked heman sikandin pegkebolalaw.

1 Pedro 3:8

Nayan, seini pa se ipunù ko kenyo. Keilangan megsebad kaw te aneng-aneng niyo aw pedowan niyo. Keilangan dakel se pedowan niyo te menge doma otaw egpemenal, aw keilangan megpeidoway kaw heman. Keilangan megpedanà kaw te kenyo pegkeotawun.

Santiago 4:11

Menge kedowa ko, ikà niyo egpesilahay. Aw somila kaw te doma otaw, aw meglindò kaw kandan, mekelindò kaw heman te punù te Timanem. Aw meglindò kaw te punù te Timanem, kenà kaw egtaking te punù din, so lomowan kaw peden kenyan.

Galasya 5:22

Meneng se otaw egbeyà-beyaan te Espiritu Santo, seini se eg-inangen din. Egkedekelan din se doma otaw te pedowan, ontò egkeluba, doen kelinaw te pedowan din, egpeketayod te kelimahan, mèpiya se eg-inangen din, egkebowasag sikandin diyà te doma otaw, aw egkeseligan sikandin,

Mat. 11:29

Tiangi niyo se ipeibing ko kenyo iling te yogo, aw peg-iling kaw heman kanak, so ontò mèpiya se pedowan ko, aw mekeetod kaw.

1 Pedro 2:1

So menge batà kaw den te Timanem, yan keilangan eked kaw den peg-inang te medaet diyà te doma otaw. Ikà niyo egkebolalaw. Ikà niyo egpelingo-lingo. Ikà niyo eg-ingà. Ikà niyo egbaet-baet.

Santiago 3:17

Meneng se otaw doen kebiyasa lekat te Timanem, yan se otaw kenà eg-inang te medaet, kenà egsamok, gayed mèpiya se pedowan din, kenà metugul, gayed egkeido aw egpenabang te doma, kenà egdowa-dowa, meneng melobos se pedowan din.

Galasya 6:10

Yan seini se mèpiya inangen tadon. Gayed tadon inangen se mèpiya diyà te kedita te otaw, aw labi pa diyà te menge kedowa tadon egpemenal.

Galasya 6:1

Menge kedowa ko te pegpemenal, aw doen kitaen niyo sebad otaw egpemenal meg-inang te medaet, mèpiya aw sikiyo menge otaw ontò egbeyà-beyaan te Espiritu Santo se megtabang kandin, amon ibingen niyo sikandin lomikò diyà te pegpenimanem, meneng keilangan mèpiya se pedowan niyo kandin. Ontò kaw pekeahà amon eked kaw heman keboyo i Satanas.

1 Timoteo 3:11

Keilangan metinuud heman se esawa dan. Eked kepakay aw egbaet-baet dan. Keilangan biyasa dan memallì te metòlid inangen dan. Keilangan keseligan dan te pengkey eden se eg-inangen dan.

1 Tesalonika 2:7

So sogounun kay i Cristo, mepakay aw somogò kay kenyo. Meneng peg-ogpà day doma kenyo, wedà kay sogò kenyo, so neido kay kenyo iling te pegkeido te inay diyà te menge batà din eg-ipaten din.

Filipos 4:5

Pekitai niyo diyà te kedita te otaw te medalem se pedowan niyo. Lomikò se Pengolo tadon te eked kenamay.

1 Korinto 9:19

Pengkey mepakay aw memallì a peden te inangen ko, aw wedad otaw mekeleges kanak, meneng migpeinang a iling te allang megtabang te kedita te otaw, amon pineokit kanak, medita se otaw memenal ki Cristo.

2 Korinto 12:20

Netetana a aw domateng a kidoen kenyo, kitaen ko sikiyo meg-inang te kenà ko ibeg. Aw yan se inangen niyo, inangen ko heman kenyo se kenà niyo ibeg, so segdahen ko sikiyo. Netetana a aw kitaen ko sikiyo megpedindilay, aw megpeingaay, aw megpeopalay, aw megpedemetay kaw. Doen besi heman kitaen ko menge otaw egbaet-baet, aw egbelikbik, aw egpelangkaw-langkaw, aw egsamok.

2 Korinto 10:1

Na, siak si Pablo doen ipunù ko kenyo lekat te pegketinuud aw keido i Cristo. Siak ekon se telawun aw kidoen a doma niyo, meneng mebolot a ekon aw somolat a kenyo lekat te mediyò.

Ininang 23:5

Yan minikagi si Pablo, “Menge kedowa ko, wedà ko ketegahi te sikandin se ontò pengolo te simbahan. Netegahan ko te doen kagi te Timanem insolat te keilangan eked silahi se otaw lomowan kenitadon.”

Judas 1:10

Meneng se menge otaw sìyan, egtompuyus dan te kedita wedà dan ketegahi. Iling dan te menge menenanap te kebenesan wedad aneng-aneng, so pengkey eden se ibeg te pedowan dan, yan se inangen dan. Yan se doun te pegbàtan dan te wedad temanan.

Judas 1:8

Medaet heman se eg-inangen te menge otaw sìyan egtoladà te kebolalaw. So kolang se aneng-aneng dan, yan medaet se eg-inangen dan pineokit te lawa dan. Kenà dan egtolò te Timanem, aw egtompuyus dan heman te menge anghil.

2 Pedro 2:10

Ontò medaet se pelumun din te kedita te otaw egtaking te medaet ibeg te lawa dan aw eked tolò te Timanem. Iling heman kenyan se menge otaw egpelingo-lingo te lekat te Timanem se ipegtoladà dan. Mebolot dan, aw kandan ibeg se egtekingan dan. Kenà dan egsagman te doen kelangkaw doton te langit, meneng egtompuyus dan kandan.

1 Pedro 4:4

Nepela den se menge medaet otaw tinekingan niyo kedengan, so kenà kaw den egtaking kandan te peg-inang dan te pengkey eden se medaet ibeg dan, aw yan egtompuyus dan kenyo.