Tito 3:10 - Manobo Sarangani

¹⁰ Aw doen otaw doton kenyo egsamok te doma din otaw egpemenal, pegsagda ka kandin. Aw eked sikandin tolò, todà ka pegsagda kandin. Meneng aw eked pa sikandin tolò, ikà egdoma kandin meneng pebeyai sikandin.

Tito 3:10 ပူးပေါင်းရင်းမြစ်များ

Roma 16:17

Menge kedowa ko, peg-ahà kaw te menge otaw egbaet te pegsebad te pedowan niyo aw egbaet te pegsalig niyo diyà ki Cristo, so kenà iling kenyan se kebenalan intoladà day kenyo. Ikà niyo egtaking kandan.

2 Juan 1:10

Aw doen otaw domateng kenyo aw doen itoladà din kenyo kenà onawa te kebenalan intoladà i Jesu Cristo, ikà niyo egpepenayit kandin diyà te balay niyo. Ikà niyo heman egliyag kandin,

2 Timoteo 3:5

Megpelingo-lingo dan menimanem, meneng eked dan pemenal te metolos se Timanem. Pegpekediyò ka diyà kandan.

2 Tesalonika 3:14

Aw doen otaw doton kenyo eked tolò te menge punù day diyà te solat day seini, peg-ahà kaw kandin, aw ikà niyo egdoma kandin amon meyàyà sikandin.

2 Tesalonika 3:6

Menge kedowa day, seini se ipunù day kenyo pineokit te ngadan te Pengolo tadon si Jesu Cristo. Aw tekahen se otaw egpemenal aw kenà egtolò te impunù day kenyo, ikà niyo egdoma kandin.

Galasya 5:20

egsimba te kenà benal timanem, egpengenito, egpeopalay, egdindil, eg-ingà, mesayo egkeopal, demeten, egpeitongay dan, egpekontrahay dan,

Galasya 5:12

Ibeg ko peden, megpetepò heman se menge otaw egsamok kenyo, sìyan egtoladà te keilangan tomolò kaw te punù ingkeliwat i Moises.

1 Korinto 11:19

Doen kèpiyaan aw wedà pegsebad se pedowan niyo, so pineokit kenyan, ketegahan aw sinu se egtaking te kebenalan.

2 Korinto 13:2

Kedengan te ikedowa ko peglegeb doton kenyo, minikagi a te ipelumun ko se menge otaw mig-inang te medaet. Yan se inikagi ko diyà te menge otaw mig-inang te medaet aw menge otaw wedà peg-inang te medaet. Todà ko den heman sikiyo ikegihan te iyogan ko pineokit te pegsolat ko seini, aw domateng a kidoen, ontò ko sikiyo ipelumun,

2 Pedro 2:1

Gebii doen menge otaw migpelingo-lingo te telekeliwat dan te kagi te Timanem, aw doen heman menge otaw megtoladà songkani megpelingo-lingo te lekat te Timanem se ipegtoladà dan. Meneng kebolalaw se itoladà dan, aw yan se mekedaet te pegsalig niyo diyà te Timanem. Eked dan keibeg aw lomowan kandan se Pengolo tadon migtansò kandan, aw yan egpedetengen dan se kededàtan te eked kenamay.