Roma 8:3 - Manobo Sarangani

³ So medaet se pedowan tadon, eked kidon peketolò te menge punù ingkeliwat i Moises. Meneng tinebangan kidon te Timanem, so insogò din se Batà din dini te tanà. Migpekeotaw sikandin amon ipelumun tandà te salà tadon. Pineokit te pegkematay din, wedad den eneg te salà, aw eked kidon den keleges tomaking te medaet ibeg te pedowan tadon.

Roma 8:3 ပူးပေါင်းရင်းမြစ်များ

Galasya 3:13

Meneng wedad otaw meketolò te kedita te punù sìyan. Se otaw egsalig diyà te punù ingkeliwat i Moises, yan se otaw ipelumun te Timanem pineokit te menge punù sìyan. Meneng si Cristo se migpelowà kenitadon lekat te pelumun, so sikandin se impelumun inselilin kenitadon. Se pegpelumun kandin, yan se pegkematay din doton te kros. So doen kagi te Timanem insolat, “Pengkey sinu otawi se imetayan aw bitinen doton te kayo intollok, yan se pengilala te ontò dakel se pelumun kandin.”

2 Korinto 5:21

Pengkey wedad salà i Cristo, meneng impelumun sikandin te Timanem tandà te salà tadon, amon eneng-enengen te Timanem te metòlid kidon pineokit te pegpesakop tadon diyà ki Cristo.

Menge Hebreo 10:14

Mekesebad olò se pegkematay i Cristo, aw pineokit kenyan, eg-aneng-aneng den se Timanem te metòlid kidon den te wedad temanan tandà te peglinis din kenitadon lekat te salà.

1 Pedro 2:24

Pegkematay din doton te kros, inibing din se kedita te salà tadon amon mekelowà kidon lekat te salà aw amon mekeinang kidon te metòlid. Pineokit te pegpelumun kandin, migkèpiya kidon den.

Roma 6:6

Netegahan tadon te peglansang ki Jesus doton te kros amon matay, iling te inlansang heman se tapay pedowan tadon doma kandin doton te kros, amon eked kidon den keibeg meg-inang te salà, aw amon eked kidon den keallang te salà,

Galasya 3:21

Ikà niyo eg-aneng-aneng te pineokit te punù sìyan migkewedad se impakang te Timanem. Kenà niyan, so simpana mekekinawà kidon te pedowan wedad temanan pineokit te pegtolò te punù ingkeliwat i Moises, yan se peokit te meg-aneng-aneng se Timanem te metòlid kidon.

Roma 8:32

Wedà din temengi se Batà din si Jesus, meneng insogò din sikandin simelilin kenitadon aw nematay amon megtabang kenitadon. Aw iling kenyan se keido din kenitadon, ibegay din heman se kedita te kelidoan tadon.

Roma 3:20

Yan se doun te wedad palos otaw eneng-enengen te Timanem te metòlid dan pineokit te pegtolò dan te punù ingkeliwat i Moises, so pineokit te pegketaga-taga tadon te menge punù ingkeliwat i Moises, netegahan tadon te salà se eg-inangen tadon.

Menge Hebreo 2:14

Sikitadon doen lawa egkematay se menge batà te Timanem sìyan. Yan migpekeotaw heman si Jesus amon matay sikandin, so pineokit te pegkematay din, dinaeg din den se eglekatan te kemetayun si Satanas.

Filipos 2:7

So lekat te kandin ibeg, tinenanan din se kelangkaw din, Aw migpedanà sikandin iling te kedanà te allang. Migpekeotaw sikandin aw timebaw.

Menge Hebreo 10:12

Meneng mekesebad olò se pegkematay i Jesu Cristo amon meabat se salà tadon, aw botong iyan te wedad temanan. Penga niyan, minonsad sikandin kidoen te tangkil te Timanem doton te langit.

Menge Hebreo 4:15

Netaga-taga se Telekagon tadon te kelomayan tadon aw ontò egkeido kenitadon, so pengkey eden kemoloi se ipegboyo i Satanas kenitadon, yan heman se tineyodan din, meneng wedà sikandin peg-inang te salà.

Menge Hebreo 2:17

Meneng eked sikandin peketabang kenitadon singed aw meinang sikandin iling kenitadon menge kedowa din. Yan se doun te migpekeotaw sikandin aw timayod te kelimahan amon meinang sikandin telekagon tadon doton te Timanem, aw amon pegwedaden din se menge salà tadon. So dinetengan sikandin te kelimahan, yan doen den keido din kenitadon egdetengan te kelimahan. So neketayod sikandin te pegboyo i Satanas, yan meketabang den sikandin te kedita te otaw boyowen i Satanas.

Roma 9:3

so pengkey kedomaan ko se menge doma Judiyo, meneng wedà dan pa salig diyà ki Cristo. Ibeg ko somelilin a peden kandan aw ipelumun a te Timanem amon ketebangan ko dan. Pegwedaden ko peden heman se pegpesakop ko diyà ki Cristo amon meinang dan menge sakop din.

Juan 1:14

Migpekeotaw sikandin iningedanan Kagi te Timanem, aw mig-ogpà sikandin doma kenami. Kinità day se kelangkaw din. Ontò sikandin melangkaw so sikandin se temisa Batà te Amay din. Ontò sikandin egpenabang, aw ontò benal se kagi din.

Juan 9:24

Yan todà dan impeangay se otaw negolian te mata din, aw minikagi dan, “Na, peg-indan ka den te benal, so kinità ka den te Timanem. Netegahan day den te limàpang sikandin te punù ingkeliwat i Moises.”

Mar. 15:27

Doen heman dowa megdedempasay inlansang diyà te kros kidoen te tangkil din, aw si Jesus diyà te tengà-tengà. [

Roma 7:18

Netegahan ko te wedad palos mèpiya kidoen te tapay pedowan ko, so pengkey meibeg a meg-inang te mèpiya, meneng eked ko iyan keinang.