Roma 7:9 - Manobo Sarangani

⁹ Kedengan te wedà ko ontò ketegahi aw eden se impunù te Timanem, eden ko aw mèpiya se pedowan ko. Meneng pegketaga-taga ko te kebenalan tepad te menge punù, netegahan ko den te nelegeb se pedowan ko te salà, aw detengan a te kemetayun wedad temanan.

Roma 7:9 ပူးပေါင်းရင်းမြစ်များ

Galasya 3:10

Meneng se kedita te otaw meibeg eneng-enengen te Timanem te metòlid dan pineokit te pegtolò dan te punù ingkeliwat i Moises, yan se ipelumun te Timanem. So doen kagi te Timanem insolat, “Ipelumun te Timanem se kedita te otaw kenà ontò egtolò te kedita te punù insolat i Moises.”

Roma 8:7

Se otaw eg-aneng-aneng tepad te pegtoman din te medaet ibeg te pedowan din, yan se egpoon te Timanem, so kenà sikandin egtolò te impunù te Timanem. Eked sikandin peketolò te impunù te Timanem.

Galasya 2:19

So netegahan ko te eked peg-aneng-aneng se Timanem te metòlid a pineokit te pegtolò ko te punù ingkeliwat i Moises, yan limengà a te pegtolò te punù sìyan amon megpesakop a diyà te Timanem.

Roma 10:5

Gebii, simolat si Moises tepad te inangen te menge otaw meibeg eneng-enengen te Timanem te metòlid dan pineokit te pegtolò dan te menge punù ingkeliwat din, kagi din, “Eneng-enengen te Timanem te metòlid se otaw ontò meketolò te menge punù ingkeliwat ko.”

Roma 7:11

Neekalan a te salà, so pengkey mèpiya peden se pinelimanan ko tandà te pegtolò ko te menge punù, meneng detengan a te kemetayun wedad temanan tandà te peglàpang ko te punù te Timanem.

Roma 7:6

Meneng so iling te nematay kidon den, eked kidon keleges tomolò te menge punù ingkeliwat i Moises, so impelowà kidon den te Timanem lekat te pegkeallang tadon kenyan. Kedengan te pegtaking tadon te menge punù insolat i Moises, wedà kidon peketolò te ibeg te Timanem. Meneng songkani, mekebatog kidon den tomolò te ibeg te Timanem so egtabang se Espiritu Santo kenitadon.

Roma 7:4

Menge kedowa ko, iling kidon heman kenyan, so pegkematay i Cristo, iling te nematay kidon heman doma kandin. So nematay kidon, eked kidon den keleges tomolò te menge punù ingkeliwat i Moises, meneng mepakay aw tomaking kidon den ki Cristo inantay te Timanem lekat te nematay, amon tomolò kidon te ibeg te Timanem.

Luc. 18:21

Timaba se obanen, “Gayed ko egtoloen se kedita niyan lekat te pegkebatà ko lamig seini.”

Luc. 15:29

Meneng minikagi se kakay batà din, ‘Tay law. Pengkey pila se omay, gayed a pa timolò kamno, aw wedad palos punù no linèpangan ko. Meneng wedad palos imbegay no kanak, pengkey kambing deitek, amon lelahen ko se menge sigalak ko.

Mat. 19:20

Minikagi se otaw, “Gayed ko egtoloen se kedita niyan. Eden lay se wedà ko pa inangi?”

Roma 7:8

Meneng pegketaga-taga ko te punù te Timanem tepad te peg-ingà, labi a pa gayed eg-ingà so medaet se ibeg te pedowan ko. Simpana wedad punù, wedà ko ketegahi aw eden se salà.

Roma 7:10

Pengkey doen kaling pedowan wedad temanan impakang diyà te otaw ontò tomolò te menge punù te Timanem, meneng netegahan ko te detengan a te kemetayun tandà te peglàpang ko te punù din.