Roma 7:6 - Manobo Sarangani

⁶ Meneng so iling te nematay kidon den, eked kidon keleges tomolò te menge punù ingkeliwat i Moises, so impelowà kidon den te Timanem lekat te pegkeallang tadon kenyan. Kedengan te pegtaking tadon te menge punù insolat i Moises, wedà kidon peketolò te ibeg te Timanem. Meneng songkani, mekebatog kidon den tomolò te ibeg te Timanem so egtabang se Espiritu Santo kenitadon.

Roma 7:6 ပူးပေါင်းရင်းမြစ်များ

2 Korinto 3:6

so sikandin se nemegay te kebiyasa kanak aw migsogò kanak megtoladà te doen kaling peokit ininang din. Kenà punù insolat se ipegkeliwat ko, meneng ipegkeliwat ko se intoladà te Espiritu Santo kanak. Se tapay punù insolat, yan olò se egpetaga-taga te menge otaw te medaet se pedowan dan. Meneng se Espiritu Santo, yan se egpemegay te kaling pedowan.

Roma 7:4

Menge kedowa ko, iling kidon heman kenyan, so pegkematay i Cristo, iling te nematay kidon heman doma kandin. So nematay kidon, eked kidon den keleges tomolò te menge punù ingkeliwat i Moises, meneng mepakay aw tomaking kidon den ki Cristo inantay te Timanem lekat te nematay, amon tomolò kidon te ibeg te Timanem.

Roma 6:4

Pineokit te pegpebonyag tadon, iling te nematay kidon doma kandin, aw iling te inlebeng kidon heman doma kandin. Neinang iyan amon begayan kidon te Timanem te kaling pedowan, iling te peg-antay din ki Cristo lekat te nematay pineokit te tolos din.

Galasya 3:13

Meneng wedad otaw meketolò te kedita te punù sìyan. Se otaw egsalig diyà te punù ingkeliwat i Moises, yan se otaw ipelumun te Timanem pineokit te menge punù sìyan. Meneng si Cristo se migpelowà kenitadon lekat te pelumun, so sikandin se impelumun inselilin kenitadon. Se pegpelumun kandin, yan se pegkematay din doton te kros. So doen kagi te Timanem insolat, “Pengkey sinu otawi se imetayan aw bitinen doton te kayo intollok, yan se pengilala te ontò dakel se pelumun kandin.”

Kolasas 3:10

aw kiminawà kaw den te kaling pegkeotawun doen kaling pedowan imbegay te Timanem, aw gayed din iyan ipegpetilles lamig iling kaw te Timanem, amon ontò kaw metaga-taga te kebenalan tepad kandin.

Galasya 6:15

Pengkey tolien se otaw aw eked, kenà niyan se eglekatan te mèpiya, meneng se mèpiya, yan se kaling pedowan wedad temanan mekinawà tadon.

Roma 12:2

Ikà niyo egtaking te ketanem te otaw kenà egpenimanem. Meneng pemoyoi niyo te inangen te Timanem kaling se aneng-aneng niyo amon metòlid se eg-inangen niyo. Yan ketegahan niyo aw eden se ibeg te Timanem inangen niyo, so mèpiya iyan, aw kelubahan din, aw wedad kolang niyan.

Roma 6:22

Meneng so impelowà kaw den te Timanem lekat te salà aw migpesakop kaw den diyà kandin, doen den ontong niyo, so ininang kaw din egpenimanem, aw yan begayan kaw din te kaling pedowan wedad temanan.

2 Korinto 5:17

Se otaw simalig ki Cristo, ontò den netodà se pedowan dan. Taman den niyan se pegkeallang dan diyà te medaet, so doen den kaling pedowan dan.

Roma 7:1

Menge kedowa ko, biyasa kaw tepad te menge punù te gobirno, aw yan netegahan niyo te keilangan tomolò se otaw te punù te gobirno taman olò te pegkematay din. Meneng aw matay se otaw, eked den keleges tomolò.

Roma 6:2

Meneng eked iyan kepakay. Pegpesakop tadon diyà ki Cristo, iling kidon te otaw nematay so eked kidon den keibeg te salà. Yan eked den heman kepakay aw meg-inang kidon te salà.

Roma 6:19

Kenà medalem se kagi ko kenyo seini, so ibeg ko mekelabet kaw te toladà ko kenyo. Kedengan, neallang kaw te salà, aw ginamit niyo se lawa niyo mig-inang te salà, aw gayed niyo pigdogangan se salà. Meneng songkani, keilangan gemiten niyo se lawa niyo meg-inang te metòlid amon benal kaw egpenimanem.

Roma 6:11

Iling heman kenyan, keilangan eneng-enengen niyo te iling kaw den te otaw nematay so eked kaw den keibeg te salà. Pineokit te pegpesakop niyo diyà ki Jesu Cristo, binegayan kaw den te kaling pedowan, aw yan keilangan iduyun heman se Timanem pineokit te eg-inangen niyo.

Roma 1:9

Netegahan te Timanem te melobos se pedowan ko kandin te pegtoladà ko te Mèpiya Indan tepad te Batà din si Jesu Cristo. Netegahan din te gayed a egtawal-tawal diyà kandin tepad kenyo.

Filipos 3:3

Meneng sikitadon se doen pengilala te ontò kidon sakop te Timanem, so egsimba kidon te Timanem pineokit te tabang te Espiritu Santo, aw doen den keluba tadon lekat ki Jesu Cristo. Impelowà kidon den lekat te salà, meneng kenà iyan pineokit te pegtolò tadon te punù ingkeliwat i Moises.

Roma 7:2

Yan eked todà pengognan se bayi doen esawa singed aw matay se esawa din, so yan se punù te gobirno. Meneng aw matay se esawa te bayi, mepakay aw mengognan todà, so wedad den labut din te punù sìyan.

Efeso 4:24

Keilangan kinewaen niyo den se kaling pegkeotawun ininang te Timanem iling kandin, aw ipekità niyo iyan pineokit te peg-inang niyo te ontò metòlid aw mèpiya.