Mat. 9:8 - Manobo Sarangani

⁸ Pegkità te doma otaw kenyan, ontò dan nelemitan, aw dimuyun dan te Timanem so insogò din si Jesus amon megwedad te salà te otaw.

Mat. 9:8 ပူးပေါင်းရင်းမြစ်များ

Luc. 7:16

Nelemitan se kedita te otaw kimità kenyan, aw induyun dan se Timanem, kagi dan, “Migtabang den se Timanem kenitadon menge sakop din, so insogò din dini kenitadon se metolos telekeliwat te kagi din seini.”

Mat. 15:31

Nepela se kedita te otaw, so kinità den dan te minikagi den se omo, aw negolian se nepantig, aw minipanaw se kapig, aw kimità den se bota. Yan se doun te dimuyun dan te Timanem egseligan te menge bowad-bowad i Israel.

Ininang 4:21

Meneng labi pa miglamit se menge obanen te simbahan kandan aw migpelowà dan kandan, so wedà dan ketegahi aw eden se ipelumun dan kandan, so dimuyun se kedita te otaw te Timanem te pegkegolì te otaw kapig.

Luc. 23:47

Kinità te kapitan te sondalo se kepelahan neinang te pegkematay i Jesus, aw dimuyun sikandin te Timanem, kagi din, “Ontò mèpiya se otaw sìyan.”

Luc. 17:15

Doen sebad otaw kidoen kandan, pegkità din te negolian den, dimuyun sikandin te Timanem te dakel se kagi din, aw limikò sebad din diyà ki Jesus.

Mar. 2:12

Yan minenaw sikandin, aw inibing din se inibatan din, aw tinengtengan sikandin te menge otaw se minolì. Yan se doun te nepela se kedita dan, aw induyun dan se Timanem. Migpebelaw-belaway dan, “Wedad palos kinità tadon iling kenyan.”

Galasya 1:24

Yan se doun te dimuyun dan te Timanem, so nemenal a den ki Jesu Cristo.

Juan 15:8

Iduyun se Amay ko pineokit te pegpemongo niyo te dakel, aw yan se kitaen te tinoledaan ko sikiyo.

Luc. 13:13

Penga niyan, pinemàdan sikandin i Jesus, aw pegketà negolian sikandin aw dimuyun te Timanem.

Ininang 11:18

Pegdineg dan te inikagi din, wedà den dan sila kandin, meneng induyun dan se Timanem, so minikagi dan, “Pengkey menge otaw kenà Judiyo, mepakay aw megselsel dan te salà aw somalig dan ki Jesus amon begayan dan te Timanem te kaling pedowan.”

Ininang 21:20

Pegdineg dan kenyan, induyun dan se Timanem. Penga niyan, minikagi dan diyà ki Pablo, “Mèpiya so nemenal den se menge otaw kenà Judiyo, meneng ikà egkelibel te minelalan heman se Judiyo nemenal ki Jesus. Measeb dan pa egtolò te punù ingkeliwat i Moises.

Mar. 7:37

Ontò dan nepela, aw minikagi dan, “Ontò mèpiya se kedita te ininang din, so pengkey bingelen impedineg din, aw omo impeikagi din.”

Mat. 28:18

Migpedapag si Jesus diyà kandan aw minikagi, “Impelowan a den diyà te kedita doton te langit aw dini heman te lanto te tanà.

Mat. 12:23

Nepela se kedita te otaw kimità kenyan, aw migpebelaw-belaway dan, “Sikandin besi se Misiyas, sìyan bowad-bowad i David egpelimanan tadon.”

Mat. 5:16

Iling heman kenyan, keilangan olò mèpiya se inangen niyo, so aw komità se menge doma otaw te mèpiya se eg-inangen niyo, iduyun dan se Amay niyo Timanem doton te langit.”

Mat. 9:7

Yan minenaw sikandin aw minolì.

Luc. 2:20

Penga niyan, minolì se telediyaga, aw gayed dan induyun se Timanem tandà te kedita te dinineg aw kinità dan, so netoman den se inikagi te anghil kandan.

Luc. 18:43

Pegketà, kimità sikandin, aw timaking ki Jesus. Gayed din pinesiontongan se Timanem. Dimuyun heman te Timanem se kedita te otaw kimità te pegpegolì kandin.

2 Korinto 9:13

Aw kitaen dan se pegtabang niyo kandan, iduyun dan se Timanem, so lekat te kebowasag niyo se pegtabang niyo kandan aw diyà te kedita te otaw. Iduyun dan heman se Timanem so egtoloen niyo se Mèpiya Indan tepad ki Cristo egseligan niyo.

1 Pedro 2:12

So tengtengen kaw te menge otaw wedà pa pemenal te Timanem, yan keilangan ontò metòlid se eg-inangen niyo, amon aw mikagi dan te doen salà niyo, metaga-taga dan beling te mèpiya se eg-inangen niyo, aw yan se doun te iduyun dan se Timanem te aldaw te pegdateng din.