Mat. 6:4 - Manobo Sarangani

⁴ Aw eked niyo petega-tegahi diyà te doma otaw se pegpemegay niyo diyà te otaw sagkep, kitaen iyan te Amay niyo Timanem doton te langit, aw begayan kaw din te ontong.”

Mat. 6:4 ပူးပေါင်းရင်းမြစ်များ

Mat. 6:18

amon eked ketaga-taga se doma otaw te wedà kaw kaen. Pengkey eked iyan ketegahi te doma otaw, meneng ketegahan iyan te Amay niyo Timanem eked kitai, aw doen ontong ibegay din diyà kenyo.”

Mat. 6:6

Meneng aw megtawal-tawal kaw, pegsiolì kaw. Tekepi niyo se lelebangan, aw pegtawal-tawal kaw diyà te Amay niyo Timanem eked kitai. Pengkey eked kaw kitai te doma otaw, komità se Timanem kenyo, aw begayan kaw din te ontong.

Luc. 14:14

Aw iling kenyan se otaw ipetanod no, ontò ka meluba, so eked dan keinang se ininang no diyà kandan. Meneng Timanem se memegay kamno te ontong te aldaw te peg-antay din lekat te nematay te kedita te otaw mig-inang te metòlid.”

Luc. 8:17

Iling heman kenyan, wedad in-eles songkani eked kitai te modi aldaw. Wedad heman imbolon songkani eked keindan te modi aldaw.

Judas 1:24

Nayan, iduyun se Timanem. Mekebatog sikandin meg-ipat kenyo amon eked kaw peg-inang te salà. Ibingen kaw din doton te ogpeanan din te wedad palos kolang niyo, aw yan ontò kaw meluba.

Menge Hebreo 4:13

Wedad palos mekeeles diyà te Timanem, so egkitaen din se kedita, aw sikandin se meg-okom te kenitadon eg-inangen.

Mat. 10:42

Eneng-enengi niyo se kagi ko kenyo seini. Aw melao se sebad otaw medanà egtaking kanak, aw memegay kaw te wayeg diyà kandin tandà te pegtaking din kanak, begayan kaw te Timanem te ontong.”

Impekità 2:23

Imetayan ko se kedita te tinoledaan din, amon ketegahan te kedita te otaw egpemenal te siak se netaga-taga te kedita kidoen te pedowan niyo, aw begayan ko se teg sebad-sebad kenyo te ontong tepad te ininang niyo.

1 Korinto 4:5

Yan ikà niyo eg-okom te eg-inangen te doma otaw, so wedà pa dateng se aldaw te peg-okom. Aw lomikò se Pengolo, ipetaga-taga din se kedita, sìyan wedà tadon pa ketegahi. Ipetaga-taga din heman se kedita te aneng-aneng te otaw, aw penga niyan, iduyun te Timanem se teg sebad-sebad otaw doen ontong.

Mat. 6:3

Meneng aw megtabang kaw te otaw sagkep, keilangan eked iyan ketegahi te doma otaw pengkey sigalak niyo.