Luc. 9:26 - Manobo Sarangani

²⁶ Aw eked ikagi se otaw te sikandin se sakop ko, aw eked heman tolò te kagi ko, yan se otaw eked ko heman ikegihi te sikandin se sakop ko te peglikò ko dini. Siak se Timanem Migpekeotaw, aw lomikò a pa dini tekingan te keanyag ko, aw keanyag te Amay ko, aw keanyag te menge anghil te Timanem.

Luc. 9:26 ပူးပေါင်းရင်းမြစ်များ

Mat. 16:27

Siak se Timanem Migpekeotaw, aw lomikò a dini tekingan te menge anghil aw kelangkaw te Amay ko. Aw lomikò a, begayan ko se kedita te otaw te ontong tepad te tapay dan ininang.

Mat. 25:31

“Aw lomikò a Timanem Migpekeotaw amon lomowan a, tekingan a te kedita te anghil. Penga niyan, menenoo a kidoen te melangkaw onsedanan te peglowan amon meg-okom a te kedita te otaw

Mat. 26:64

Minikagi si Jesus, “Benal se inikagi nikaw. Mikagi a den kani diyà kenyo. Te eked kenamay, komità kaw kanak Timanem Migpekeotaw egpenenoo kidoen te tangkil te Amay ko metolos amon lomowan a doma din. Lomikò a heman dini lekat te langit tekingan te labon.”

Mar. 8:38

Aw eked ikagi se otaw te sikandin se sakop ko, aw eked heman tolò te kagi ko meneng tomaking te otaw nelegeb te salà egtinàyog te Timanem, yan se otaw eked ko heman ikegihi te sikandin se sakop ko te peglikò ko. Siak se Timanem Migpekeotaw, aw lomikò a pa dini tekingan te kelangkaw te Amay ko aw sipat menge anghil te Timanem.”

Juan 12:43

Migbolon dan te pegpemenal dan, so pengkey doen ibeg dan iduyun te Timanem, meneng labi dan pa meibeg iduyun te doma otaw.

Juan 5:44

Ibeg niyo iduyun kaw te menge doma otaw, meneng eked kaw keibeg iduyun te sebad olò Timanem. Yan se doun te eked kaw pemenal.

Ininang 10:22

Timaba dan, “Insogò kay te sebad serhinto si Cornelio olo te sebad gatos sondalo. Sikandin se otaw egpenimanem aw egtolò te Timanem, aw induyun sikandin te medita Judiyo. Doen anghil te Timanem migpunù kandin te ipeangay ka din amon megtoladà ka kandin.”

Roma 1:16

Nayan, ontò dakel se pegsalig ko diyà te Mèpiya Indan sìyan, so yan se tolos te Timanem mekepelowà te kedita te otaw lekat te salà aw memenal dan kenyan. Nekeonà se menge Judiyo dimineg kenyan, aw penga niyan se menge otaw kenà Judiyo.

2 Korinto 12:10

So egtaking a ki Cristo, ontò a den egkeluba pengkey egkelomay a, aw tompuyusen a, aw egkelimahan a, aw egpemilangen a, aw eg-elegen a, so aw egkelomay a, yan egbegayan a te Timanem te kagsen amon meketayod a.

Galasya 6:14

Meneng se kanak, eked a keibeg domuyun te kanak pegkeotawun. Sebad olò se iduyun ko, yan se Pengolo tadon si Jesu Cristo. Nematay sikandin doton te kros amon megpelowà kenitadon lekat te salà. Pineokit te pegkematay din, kenà a den egkeallang te medaet ibeg te keneyonan, aw eked a den heman keibeg taking te mekeboyo.

1 Timoteo 5:21

Egtengtengen ki te Timanem, aw si Jesu Cristo, aw menge anghil te Timanem, aw yan egpunù a kamno te keilangan tomolò ka te insolat ko kamno. Keilangan wedad palos otaw pedigselan no te pegsagda no te medaet, so keilangan segdahen no se kedita te otaw, pengkey melangkaw otaw aw kenà.

2 Timoteo 1:12

aw yan se doun te egpemilangen a songkani. Meneng kenà a egkeyàyà, so netegahan ko aw sinu se sineligan ko. Netegahan ko te mekebatog sikandin meg-ipat kanak dalem te pegtoman ko te insalig din kanak lamig te aldaw te peg-okom din.

2 Timoteo 2:12

Aw meketayod kidon te pegpemilang kenitadon, lomowan kidon heman doma din. Meneng aw mikagi kidon te kenà kidon sakop din, mikagi heman sikandin te kenà kidon sakop din.

Menge Hebreo 11:26

Aneng-aneng din, pengkey mèpiya aw megkeyaman sikandin doton te Ehipto, meneng labi pa mèpiya aw pemilangen sikandin tandà te pegpemenal din te tomanen te Timanem se pakang din, sìyan tinoman din pineokit te pegsogò din te Misiyas. Labi pa iyan mèpiya diyà ki Moises, so egpemenal sikandin te doen ontong ibegay te Timanem diyà kandin te modi aldaw.

Menge Hebreo 13:13

Yan, impelowà kidon den lekat te menge punù ingkeliwat i Moises. Keilangan tenanan tadon se kedita niyan aw tomaking kidon te Pengolo tadon nematay doton te lowà te lonsod. Keilangan eked kidon kelemitan aw pemilangen kidon tandà te pegtaking tadon kandin, so pinemilang heman sikandin.

Judas 1:14

Gebii doen kagi te Timanem ingkeliwat i Enok tepad te menge otaw sìyan. Diyà te kedita te bowad-bowad i Adam, si Enok se apò din te ikepito keliwat. Minikagi sikandin, “Peg-ahà kaw, so domateng se Pengolo tadon tinekingan te minelalan anghil din.

Impekità 1:7

Na, lomikò si Jesu Cristo domaan te labon. Kitaen te kedita te otaw se pegdateng din, aw komità heman kandin se kedita te otaw nengimatay kandin. Megmatay se otaw te kedita te pongan dini te keneyonan tandà te puluk te pedowan dan, so sikandin se megpelumun kandan. Ontò iyan benal. Metoman iyan.

Impekità 20:11

Penga niyan, kinità ko se mepotì onsedanan te peglowan ontò dakel, aw doen nenenoo kidoen. Ontò migpekediyò se tanà aw langit lekat kandin tandà te kelangkaw din, aw eked den dan kitai.

Impekità 21:8

Meneng se kedita te otaw dàgen te kededàtan, aw eked tayod te pegsalig kanak, aw otaw nelegeb te salà, aw metibonò, aw eglayok te kenà kandan esawa, aw egketoigan, aw egsimba te kenà benal timanem, aw egkebolalaw, doen ontong te kedita dan kidoen te lanaw apoy aw esopri, yan se ikedowa kemetayun.”

Impekità 3:5

Se kedita te otaw eked dàgi te kededàtan, yan se ipesaol ko te mepotì. Eked ko palos gibowi se ngadan dan diyà te libro sinolatan ko te ngadan te kedita te otaw binegayan ko te kaling pedowan wedad temanan. Mikagi a heman diyà te Amay ko aw menge anghil din te yan se menge otaw migpesakop diyà kanak.