Luc. 21:19 - Manobo Sarangani

¹⁹ Pineokit te pegtayod niyo te kedita te kelimahan, metoman kaw kominawà te kaling pedowan wedad temanan.”

Luc. 21:19 ပူးပေါင်းရင်းမြစ်များ

Menge Hebreo 10:36

Keilangan medalem se pedowan niyo amon mekebatog kaw tomoman te ibeg te Timanem, aw yan kominawà kaw te impakang din kenyo.

Mat. 10:22

Kebensihan kaw te keditaan te otaw tandà te pegpesakop niyo diyà kanak. Meneng aw tomayod kaw te kedita te kelimahan, ipelowà kaw.

Santiago 1:3

so aw meketayod kaw te kelimahan aw gayed kaw somalig diyà te Timanem, yan se mekebegay kenyo te kedalem te pedowan.

Impekità 3:10

So ontò kaw timolò te impunù ko kenyo te keilangan tomayod kaw te kelimahan iling te kanak pegtayod te kelimahan, yan ontò a heman meg-ipat kenyo amon eked kaw detengi te ontò medaet kelimahan agpet domateng diyà te kedita te otaw te keneyonan.

Roma 5:3

Doen heman doma ingkeluba tadon. Neluba kidon te doen den kelimahan tadon tandà te pegtaking tadon ki Cristo, so pineokit te pegtayod tadon te kelimahan, doen keilingan tadon amon eked kidon dàgi pengkey eden se domateng kenitadon.

Roma 2:7

Doen menge otaw gayed eg-inang te mèpiya amon iduyun dan te Timanem, aw amon meg-ogpà dan doma din doton te langit te wedad temanan. Yan se otaw begayan din te kaling pedowan wedad temanan.

Impekità 13:10

Se kedita te otaw pinemallì amon dekepen, yan se metoman medakep. Se kedita heman te otaw mengibing te sondang aw mengimatay, yan se metoman imetayan te sondang. Yan se doun te keilangan tomayod te kelimahan se kedita tadon sakop te Timanem, aw keilangan somalig kidon heman diyà kandin.

Impekità 14:12

Yan se doun te keilangan tomayod se kedita tadon sakop te Timanem diyà te kelimahan, pengkey kedita tadon egtolò te impunù te Timanem aw egsalig diyà ki Jesus.

Menge Hebreo 6:11

Ibeg day, measeb kaw meg-iling te mèpiya lamig te aldaw te peglikò te Pengolo tadon aw metoman se kedita te mèpiya pinelimanan tadon.

1 Tesalonika 1:3

Te pegtawal-tawal day diyà te Amay tadon Timanem, kenà kay egkelibel te impetaga-taga niyo te benal nemenal kaw ki Cristo pineokit te eg-inangen niyo, aw impetaga-taga niyo te dakel se pedowan niyo kandin pineokit te pegpekeaseb niyo, aw impetaga-taga niyo te egpeliman kaw te Pengolo tadon si Jesu Cristo pineokit te pegtayod niyo te kelimahan.

Mat. 24:13

Meneng aw tomayod se otaw te kedita te kelimahan, ipelowà sikandin.

Impekità 1:9

Siak si Juan se simolat kani, kedowa niyo te pegpemenal. Iling a kenyo, so medalem heman se pedowan ko te pegtayod ko te pegpemilang dimateng kanak, so siak heman se migpesakop diyà te peglowan te Timanem. Impelumun a te gobirno aw impeibing a doton te polò iningedanan Patmos tandà te pegkeliwat ko te kagi te Timanem aw kebenalan intoladà i Jesu Cristo.

Menge Hebreo 6:15

Penga niyan, medalem se pedowan i Abraham lamig te pegkinawà din te impakang te Timanem kandin.

2 Tesalonika 3:5

Ibeg day beyà-beyaan kaw te Pengolo tadon amon labi pa megkedakel se pedowan niyo diyà te Timanem, aw amon meketayod kaw te kelimahan iling ki Cristo.

Roma 8:25

Meneng so wedà pa dateng se egpelimanan tadon, keilangan medalem se pedowan tadon dalem te pegpeliman tadon kenyan.

Luc. 8:15

Meneng se benì nesabog diyà te melambò tanà, yan se iling te otaw ontò melobos se pedowan dan. Aw domineg dan te kagi te Timanem, ontò dan iyan egtoloen. Egtayod dan te kelimahan lamig doen ontong dan.”

Roma 15:4

Netegahan tadon te insolat se kedita te kagi te Timanem gebii amon peg-ilingan tadon, so pineokit te kagi te Timanem, meketayod kidon te kelimahan, aw megkagsen se pedowan tadon dalem te pegpeliman tadon te aldaw domateng.

Roma 5:4

Aw meketayod kidon te kelimahan, metaga-taga kidon te egkeluba se Timanem te kenitadon pegpemenal, aw lekat kenyan, netegahan tadon te metoman se egpelimanan tadon.

Santiago 1:4

Aw megkedalem se pedowan niyo, ontò megketesan se pegpemenal niyo pineokit kenyan.

2 Pedro 1:6

Aw biyasa kaw, keilangan temengan niyo se ibeg niyo meg-inang te medaet. Aw meketameng kaw te ibeg niyo, keilangan meg-iling kaw heman te pegtayod te kelimahan. Aw meketayod kaw te kelimahan, keilangan tomolò kaw heman te ibeg te Timanem.