Luc. 17:30 - Manobo Sarangani

³⁰ Kesàban heman iling kenyan se otaw kenà egpeketagad te aldaw aw ipekità a Timanem Migpekeotaw.

Luc. 17:30 ပူးပေါင်းရင်းမြစ်များ

Mat. 16:27

Siak se Timanem Migpekeotaw, aw lomikò a dini tekingan te menge anghil aw kelangkaw te Amay ko. Aw lomikò a, begayan ko se kedita te otaw te ontong tepad te tapay dan ininang.

Mat. 24:3

Wedà kenamay, dimoton si Jesus te bontod te Olibo aw nenenoo kidoen. Dimoton se menge tinoledaan din kandin te wedad doma dan, aw mig-insà dan, kagi dan, “Indani kay. Kano lay ketoman se in-indan nikaw? Eden lay se pengilala kitaen day amon ketegahan day te agpet ka lomikò aw agpet heman se temanan te keneyonan?”

Mat. 24:37

Aw lomikò a Timanem Migpekeotaw, medita se otaw eked peketagad te pegdateng ko, iling te otaw gebii wedà penenalan ki Noe.

Mat. 24:39

Meneng wedà ketaga-taga se menge doma otaw te agpet dan megelà lamig nesàban dan te pegkelinep te tanà te wayeg, aw nelemes se kedita dan. Iling heman kenyan se peglikò ko Timanem Migpekeotaw, so medita heman se otaw eked peketagad te pegdateng ko.

Mat. 26:64

Minikagi si Jesus, “Benal se inikagi nikaw. Mikagi a den kani diyà kenyo. Te eked kenamay, komità kaw kanak Timanem Migpekeotaw egpenenoo kidoen te tangkil te Amay ko metolos amon lomowan a doma din. Lomikò a heman dini lekat te langit tekingan te labon.”

Mar. 13:26

Penga niyan, kitaen te kedita te otaw se pegdateng ko, so lomikò a Timanem Migpekeotaw tekingan te labon. Komità dan te ontò a metolos aw melangkaw a.

Luc. 17:24

so ontò metaen se peglikò ko iling te kilem ontò somiblat doton te kebelad te langit aw kitaen te kedita te otaw. Iling heman kenyan se pegdateng ko Timanem Migpekeotaw.

Luc. 17:29

Meneng aldaw te pegkesayo i Lot lekat te Sodoma, negelà se kedita te doma tege Sodoma, so nematay dan te apoy aw esopri nedagdag lekat te langit.

Luc. 21:22

Metoman ipelumun te Timanem se otaw medaet, aw tomanen din se kedita te pakang din insolat.

Luc. 21:27

Penga niyan, kitaen te kedita te otaw se pegdateng ko, so lomikò a Timanem Migpekeotaw tekingan te labon. Komità dan te metolos a aw ontò a melangkaw.

1 Korinto 1:7

aw yan wedad kolang diyà kenyo te kedita te kemolò te kebiyasa imbegay te Timanem diyà te otaw egpemenal, dalem te pegpeliman niyo te peglikò te Pengolo tadon si Jesu Cristo.

1 Korinto 1:8

Sikandin se megpekagsen te pegpemenal niyo amon wedad salà kitaen din diyà kenyo aw lomikò se Pengolo tadon si Jesu Cristo.

Kolasas 3:4

Si Cristo se nemegay kenyo te kaling pedowan wedad temanan. Aw lomikò sikandin, entayen kaw din aw megdoma kaw kandin te peglowan din.

2 Tesalonika 1:7

Meneng sikiyo egpemilangen songkani, inangen kaw din beyang-beyang sipat heman sikami. Yan se inangen din aw lomikò se Pengolo tadon lekat te langit. Iling te apoy se saol din, aw tekingan sikandin te menge anghil metolos lekat te langit. Ipelumun din se kedita te otaw kimulu te Timanem. Ipelumun din se kedita te otaw wedà pemenal te Mèpiya Indan tepad te Pengolo tadon si Jesus.

1 Pedro 1:13

So netegahan niyo den iyan, yan keilangan megpeketagad kaw meg-aneng-aneng te metòlid. Keilangan megpekebatol kaw. Keilangan megpeliman kaw te mèpiya ibegay te Timanem diyà kenyo te aldaw te peglikò i Jesu Cristo.

1 Pedro 1:7

so ibeg te Timanem tomayod kaw te menge kelimahan sìyan amon ipetaga-taga niyo te ontò nelobos se pegsalig niyo diyà kandin. Iling iyan te bolawan tonawen diyà te apoy amon ketegahan aw ontò iyan bolawan. Pengkey meelagà se bolawan, megkewedad iyan te eked kenamay. Meneng labi pa meelagà se pegsalig niyo diyà te Timanem, aw yan ipeokit kaw din diyà te kelimahan amon ketegahan din aw ontò kaw egsalig diyà kandin. Aw meketayod kaw kenyan, iduyun kaw din aw ipelangkaw kaw din te aldaw te peglikò i Jesu Cristo.

1 Pedro 4:13

Keilangan meluba se pedowan niyo, so iling te migdoma kaw den ki Cristo te pegtayod din te kelimahan dimateng kandin. Aw tomayod kaw te kelimahan, labi kaw pa meluba te aldaw aw komità kaw kandin te peglikò din.

1 Juan 2:28

Nayan menge batà ko te pegpemenal, peg-ogpà kaw diyà ki Cristo amon eked kaw kelemitan aw eked kaw keyàyà te peglikò din.

1 Juan 3:2

Menge kedowa egkedekelan ko te pedowan, batà kidon den te Timanem. Pengkey wedà tadon pa ketegahi aw eden se keilingan tadon te modi aldaw, meneng netegahan tadon te mekeiling kidon ki Cristo aw lomikò sikandin, so ontò tadon sikandin kitaen.

Impekità 1:7

Na, lomikò si Jesu Cristo domaan te labon. Kitaen te kedita te otaw se pegdateng din, aw komità heman kandin se kedita te otaw nengimatay kandin. Megmatay se otaw te kedita te pongan dini te keneyonan tandà te puluk te pedowan dan, so sikandin se megpelumun kandan. Ontò iyan benal. Metoman iyan.