Luc. 16:15 - Manobo Sarangani

¹⁵ Meneng minikagi si Jesus, “Sikiyo se egpelingo-lingo te metòlid se eg-inangen niyo, meneng netaga-taga se Timanem te medaet se pedowan niyo. Pengkey megpelangkaw-langkaw kaw, meneng ontò iyan medaet diyà te Timanem.

Luc. 16:15 ပူးပေါင်းရင်းမြစ်များ

1 Korinto 4:5

Yan ikà niyo eg-okom te eg-inangen te doma otaw, so wedà pa dateng se aldaw te peg-okom. Aw lomikò se Pengolo, ipetaga-taga din se kedita, sìyan wedà tadon pa ketegahi. Ipetaga-taga din heman se kedita te aneng-aneng te otaw, aw penga niyan, iduyun te Timanem se teg sebad-sebad otaw doen ontong.

Ininang 15:8

Netegahan te Timanem aw melobos se pedowan te kedita te otaw. Impetaga-taga din te sinakop din den se menge otaw kenà Judiyo pineokit te pegpemegay din te Espiritu Santo diyà kandan onawa te pegpemegay din diyà kenitadon kedengan.

1 Pedro 3:4

Meneng keilangan ipekità niyo se mèpiya but lekat te pedowan niyo. Aw metinuud kaw, aw metelek kaw, yan se doen ontò keelagà eked palos pegkedaet, so ontò meelagà diyà te Timanem se otaw iling kenyan.

Luc. 11:39

Meneng minikagi se Pengolo, “Sikiyo menge Parisiyo, gayed kaw eg-ingà aw eglalang te medaet. Iling kaw te otaw olò eg-onaw te lowà te baso aw lipong pengkey melipà pa se didalem niyan.

Luc. 10:29

Meneng ibeg te otaw sìyan, ipetaga-taga din te metòlid se eg-inangen din, aw yan se doun te mig-insà sikandin, “Sinu lay se doma otaw keilangan kedekelan ko te pedowan?”

Impekità 2:23

Imetayan ko se kedita te tinoledaan din, amon ketegahan te kedita te otaw egpemenal te siak se netaga-taga te kedita kidoen te pedowan niyo, aw begayan ko se teg sebad-sebad kenyo te ontong tepad te ininang niyo.

1 Pedro 5:5

Sikiyo heman menge kaling otaw, keilangan toloen niyo se menge egpengibing te simbahan. Ikà niyo egpelangkaw-langkaw, meneng keilangan megpedanà se kedita niyo diyà te menge doma niyo, so doen kagi te Timanem insolat te meinang poon te Timanem se otaw egpelangkaw-langkaw, meneng egtebangan din se otaw egpedanà.

Roma 3:20

Yan se doun te wedad palos otaw eneng-enengen te Timanem te metòlid dan pineokit te pegtolò dan te punù ingkeliwat i Moises, so pineokit te pegketaga-taga tadon te menge punù ingkeliwat i Moises, netegahan tadon te salà se eg-inangen tadon.

Juan 2:25

so netegahan din aw eden se awop te pedowan te kedita te otaw. Pengkey wedad mig-indan kandin tepad te awop te pedowan te otaw, meneng netegahan din den iyan, so tapay din netegahan aw eden se pedowan te otaw.

Mat. 23:5

Gayed dan ipekità diyà te doma otaw se pegtolò dan te menge punù amon iduyun dan. Eg-inangen dan pelaban dakel se solanan te kagi te Timanem egpengibingen dan, aw egpelasan dan se saol dan melayat amon meg-aneng-aneng se doma otaw te ontò melobos se pedowan dan diyà te Timanem.

Luc. 18:21

Timaba se obanen, “Gayed ko egtoloen se kedita niyan lekat te pegkebatà ko lamig seini.”

Luc. 18:11

Timindeg kidoen se Parisiyo aw migtawal-tawal, kagi din, ‘E Timanem, egpesiontong a diyà kamno, so labi a pa mèpiya diyà te menge doma otaw, so kenà a iling te otaw eg-akal, aw eglàpang te punù, aw eglakad. Egpesiontong a so kenà a medaet otaw iling te iskribinti sida.

Ininang 1:18

(Doen kwarta imbegay ki Judas tandà te peg-inang din te medaet, aw yan se imbayad din te pawà. Penga niyan, nedagdag si Judas aw migbeto se getek din. Nelowà se tegaken din aw nematay.

Luc. 20:47

Meneng sikandan se eg-agaw te kedònan te bayi balo, aw penga niyan menamay se pegtawal-tawal dan amon megpelingo-lingo dan te melobos se pedowan dan diyà te Timanem. Meneng metoman dan ontò ipelumun labi pa diyà te doma otaw.”

Luc. 20:20

Yan olò dan migtagad te mèpiya aldaw. Doen heman menge otaw insogò dan migpelingo-lingo te tomaking kandin, meneng olò dan nengemahà aw doen kemalì te ikegiyen din amon doen idimanda dan tepad kandin aw ipedakep te gobirnador.

Mat. 6:16

“Aw megpowasa kaw, ikà niyo egpetaga-taga kenyan diyà te doma otaw pineokit te bawa niyo. Ikà niyo eg-iling te menge otaw eden dan aw egpenimanem dan, so eg-inangen dan medaet se bawa dan amon metaga-taga se doma otaw te kenà dan egpengaen. Eneng-enengi niyo se kagi ko seini. Wedad den palos ontong ibegay te Timanem kandan.

Mat. 6:5

“Aw megtawal-tawal kaw diyà te Timanem, ikà niyo eg-iling te otaw eden dan aw egpenimanem dan, so egkeibeg dan egtawal-tawal doton te simbahan aw doton heman te dalan amon kitaen dan te menge doma otaw. Meneng eneng-enengi niyo se kagi ko seini. Wedad palos ontong ibegay te Timanem kandan.

Mat. 6:2

“Yan aw megtabang kaw te otaw sagkep, ikà niyo eg-indan diyà te kedita te otaw amon iduyun kaw dan, so iling kenyan se eg-inangen te otaw eden dan aw egpenimanem dan. Yan se eg-inangen dan doton te simbahan te Judiyo aw kidoen te dalan, amon iduyun dan te menge doma otaw. Meneng eneng-enengi niyo se kagi ko seini. Wedad palos ontong ibegay te Timanem kandan.

Juan 21:17

Mig-insà si Jesus te iketelo, “Simon, batà i Juan, ontò lay dakel se pedowan no kanak?” Nelidò se pedowan i Pedro so mig-insà si Jesus kandin te iketelo aw ontò dakel se pedowan din kandin. Timaba sikandin, “Pengolo, netegahan no se kedita. Netegahan no te ontò dakel se pedowan ko kamno.” Minikagi si Jesus, “Peg-ipat ka te menge sakop ko egkedekelan ko te pedowan.

Luc. 18:9

Nayan, mig-indan si Jesus te tegdeyanan seini diyà te menge otaw eden dan aw metòlid se eg-inangen dan, aw gayed dan eglindò te doma.

Luc. 18:14

Na, penenalan kaw te kagi ko. Peg-olì te iskribinti sìyan, pigwedad den te Timanem se salà din. Meneng se Parisiyo, wedà pegwedadi te Timanem se salà din. Inangen te Timanem medanà se kedita te otaw egpelangkaw-langkaw, meneng inangen din melangkaw se kedita te otaw egpedanà te kandan pegkeotawun.”

Ininang 1:24

Penga niyan, migtawal-tawal dan diyà te Timanem, “Pengolo, netegahan no se pedowan te kedita te otaw. Yan petega-tegahi kenami aw sinu se otaw pinemallì no

Roma 8:27

Netaga-taga se Timanem Amay aw eden se awop te pedowan tadon, aw netegahan din heman aw eden se aneng-aneng te Espiritu Santo, so egpemoyoen te Espiritu Santo diyà te Timanem se tabang din kenitadon menge sakop din lekat te kandin ibeg.