Kolasas 3:9 - Manobo Sarangani

⁹ Ikà niyo egkebolalaw, so tinenanan niyo den se tapay pegkeotawun mig-inang te medaet kedengan,

Kolasas 3:9 ပူးပေါင်းရင်းမြစ်များ

Efeso 4:25

Yan ikà niyo egkebolalaw. Keilangan benal se ikegiyen niyo diyà te doma otaw, so neinang se kedita tadon kinemoloan diyà te sebad olò lawa.

Efeso 4:22

Yan keilangan tenanan niyo den se tapay pegkeotawun niyo so yan se linekatan te medaet ketanem tinekingan niyo kedengan, so pineokit kenyan, egkeekalan kaw amon tomaking kaw te medaet ibeg te pedowan niyo, aw yan se mekedaet kenyo.

Juan 8:44

Si Satanas se ontò amay niyo, aw se ibeg din medaet, yan heman se ibeg niyo inangen. Lekat te ketebò te keneyonan, egpengimatay sikandin. Wedad palos labut din te kebenalan, so wedad kebenalan diyà kandin. Aw megkebolalaw sikandin, yan se ketanem te pedowan din, so bolelawun sikandin, aw sikandin se eglekatan te kedita te kebolalaw.

Roma 6:6

Netegahan tadon te peglansang ki Jesus doton te kros amon matay, iling te inlansang heman se tapay pedowan tadon doma kandin doton te kros, amon eked kidon den keibeg meg-inang te salà, aw amon eked kidon den keallang te salà,

Impekità 22:15

Meneng se kedita te otaw eg-inang te mekeyàyà, aw egketoigan, aw eglayok te kenà kandan esawa, aw metibonò, aw egsimba te kenà benal timanem, aw kedita te otaw egkebolalaw aw egkeibeg te kebolelawan, yan se eked pekeawop te lonsod.

Impekità 21:27

Meneng wedad palos medaet mekeawop kidoen. Eked heman pekeawop se otaw eg-inang te medaet aw egkebolalaw. Meneng se otaw mekeawop te lonsod sìyan, yan olò se otaw insolat se ngadan dan kidoen te libro sinolatan te Karniro te ngadan te kedita te otaw binegayan te kaling pedowan.

1 Timoteo 1:10

Doen punù amon segdahen se otaw eglayok te kenà kandan esawa, aw bayot, aw otaw eg-agaw te doma otaw, aw bolelawun, aw otaw egkebolalaw te pegsistigos dan, aw pengkey eden se medaet inangen te otaw kenà egtaking te kebenalan ipegtoladà tadon.

Impekità 21:8

Meneng se kedita te otaw dàgen te kededàtan, aw eked tayod te pegsalig kanak, aw otaw nelegeb te salà, aw metibonò, aw eglayok te kenà kandan esawa, aw egketoigan, aw egsimba te kenà benal timanem, aw egkebolalaw, doen ontong te kedita dan kidoen te lanaw apoy aw esopri, yan se ikedowa kemetayun.”

Kolasas 3:8

Meneng seini, keilangan tenanan niyo den se kedita te medaet ketanem iling kani. Ikà niyo egkeopal. Ikà niyo egbantak. Ikà niyo egbaet-baet te doma otaw. Ikà niyo eg-ikagi te medaet.