Kolasas 3:8 - Manobo Sarangani

⁸ Meneng seini, keilangan tenanan niyo den se kedita te medaet ketanem iling kani. Ikà niyo egkeopal. Ikà niyo egbantak. Ikà niyo egbaet-baet te doma otaw. Ikà niyo eg-ikagi te medaet.

Kolasas 3:8 ပူးပေါင်းရင်းမြစ်များ

Efeso 4:29

Ikà niyo palos eg-ikagi te medaet diyà te doma otaw. Meneng keilangan mèpiya se ikegiyen niyo diyà te doma otaw amon megkagsen dan aw ketebangan dan pineokit te kagi niyo. Aw meketepad se kagi niyo, yan ketebangan se otaw domineg kenyo.

Efeso 4:22

Yan keilangan tenanan niyo den se tapay pegkeotawun niyo so yan se linekatan te medaet ketanem tinekingan niyo kedengan, so pineokit kenyan, egkeekalan kaw amon tomaking kaw te medaet ibeg te pedowan niyo, aw yan se mekedaet kenyo.

Efeso 5:4

Eked heman kepakay aw mikagi kaw te medaet. Eked heman kepakay aw mikagi kaw te wedad ontong. Eked heman kepakay aw megkebawol kaw te medaet. Meneng keilangan gayed kaw megpesiontong diyà te Timanem.

Kolasas 3:5

Yan, so iling te nematay kaw den doma ki Cristo, keilangan imetayan niyo se ibeg te pedowan niyo meg-inang te medaet iling te ininang niyo kedengan. Ikà niyo eglayok te kenà kenyo esawa. Ikà niyo egkapoy. Ikà niyo egkeboyo te medaet pengkey lekat iyan te kenyo pedowan. Ikà niyo eg-ingà te kedònan te doma otaw, so iling iyan te pegsimba niyo diyà te kenà benal timanem.

Efeso 4:26

Aw doen ikeopal niyo, ikà niyo eg-inang te medaet. Pegwedadi niyo se keopal te eked pa sallep se aldaw,

Menge Hebreo 12:1

Nayan, ontò medita se otaw simalig diyà te Timanem gebii, aw yan impetaga-taga dan diyà kenitadon te ontò egkeseligan se Timanem. Iling te pegkoyà se pegtaking tadon te Timanem dini lanto te tanà, aw yan keilangan tomanan kidon heman te kedita mekeanggà kenitadon iling te inangen te otaw megkekoyà. Keilangan lomengà kidon heman te peg-inang tadon te salà gayed egpekeiket kenitadon. Keilangan megpekagsen kidon komagnan lamig domateng kidon doton te temanan.

Kolasas 3:9

Ikà niyo egkebolalaw, so tinenanan niyo den se tapay pegkeotawun mig-inang te medaet kedengan,

1 Pedro 2:1

So menge batà kaw den te Timanem, yan keilangan eked kaw den peg-inang te medaet diyà te doma otaw. Ikà niyo egkebolalaw. Ikà niyo egpelingo-lingo. Ikà niyo eg-ingà. Ikà niyo egbaet-baet.

2 Korinto 12:20

Netetana a aw domateng a kidoen kenyo, kitaen ko sikiyo meg-inang te kenà ko ibeg. Aw yan se inangen niyo, inangen ko heman kenyo se kenà niyo ibeg, so segdahen ko sikiyo. Netetana a aw kitaen ko sikiyo megpedindilay, aw megpeingaay, aw megpeopalay, aw megpedemetay kaw. Doen besi heman kitaen ko menge otaw egbaet-baet, aw egbelikbik, aw egpelangkaw-langkaw, aw egsamok.

1 Korinto 3:3

so egtaking kaw pa te medaet ibeg te kenyo pedowan. So doen pa kidoen kenyo egpeingaay aw doen heman egpedindilay, yan se pengilala te egtaking kaw pa te medaet ibeg te kenyo pedowan, iling te doma otaw kenà egtaking te Timanem.

Mat. 5:22

Meneng mikagi a den diyà kenyo te pengkey olò meopal se otaw diyà te doma, ibingen sikandin doton te otaw eg-osay. Aw mikagi se otaw te medaet diyà te doma, ibingen sikandin doton te kelengkawan te oseyanan. Aw mikagi se otaw diyà te doma, ‘Book ka,’ ibingen sikandin doton te apoy te kilot.

Galasya 5:15

Meneng aw megpedindilay aw megbolaw kaw, pekeahà kaw amon eked kebàti se pegsebad te pedowan niyo tomaking ki Jesu Cristo.

Roma 13:13

Keilangan tomalag mèpiya se eg-inangen tadon amon metaga-taga se kedita te otaw te wedad medaet mekeyàyà kenitadon. Ikà niyo eg-iling te otaw egsamok, aw eglasing, aw eglayok te kenà kandan esawa, aw metibayi wedad yàyà. Ikà niyo egdindil. Ikà niyo eg-ingà.

Judas 1:8

Medaet heman se eg-inangen te menge otaw sìyan egtoladà te kebolalaw. So kolang se aneng-aneng dan, yan medaet se eg-inangen dan pineokit te lawa dan. Kenà dan egtolò te Timanem, aw egtompuyus dan heman te menge anghil.

2 Pedro 2:18

Iling te medalem se ipegtoladà dan, meneng wedad kebenalan niyan. Pineokit te medaet ibeg te lawa, egboyowen dan se menge otaw kaling timanan te menge doma dan eg-inang te medaet.

Santiago 2:7

aw egtompuyus ki Jesu Cristo simakop kenyo.

1 Timoteo 1:20

Iling kenyan se neinang i Himeneo aw si Alejandro. Impebayà-bayà ko dan ki Satanas amon ketoledaan dan te eked kepakay se pegtompuyus dan te Timanem.

1 Timoteo 1:13

Kedengan te wedà a pa pemenal, migtompuyus a kandin, aw nemilang a te menge sakop din, aw nebensi a kandan. Meneng neidowan a din pa, so peg-inang ko kenyan, wedà a pa pemenal kandin, aw yan wedà ko ketegahi te medaet se ininang ko sìyan.

Galasya 5:26

Keilangan eked kidon pegpelangkaw-langkaw, eked kidon pegpetompuyusay, aw eked kidon pegpeingaay.

Galasya 5:20

egsimba te kenà benal timanem, egpengenito, egpeopalay, egdindil, eg-ingà, mesayo egkeopal, demeten, egpeitongay dan, egpekontrahay dan,

Mar. 7:22

aw egkeibeg te kedònan te doma, aw eg-inang te medaet, aw eg-akal, aw wedad yàyà metibayi, aw eg-ingà, aw egbaet-baet, aw egpelangkaw-langkaw, aw wedad inenengen.

Impekità 16:9

Tinollonan dan se Timanem simogò te menge kededàtan seini, so ontò meinit se aldaw. Meneng wedà dan pegselsel te medaet ininang dan, aw wedà dan heman duyun kandin.

Judas 1:13

Iling dan te dedakel balud doton te dagat. Eked kebolon se medaet eg-inangen dan so iling dan te sagbet ipegdagsà doton te enay. Kenà dan egkeseligan, so iling dan te menge bitoen nealin lekat te nesolan dan doton te langit. Yan impetagad te Timanem se ogpeanan dan kidoen te kengitngitan doton te kilot te wedad temanan.

2 Pedro 2:7

Meneng si Lot olò se impelowà din, so metòlid se eg-inangen din. Ontò nepuluk se pedowan din so wedad yàyà te menge otaw kidoen mig-inang te medaet.

Efeso 4:25

Yan ikà niyo egkebolalaw. Keilangan benal se ikegiyen niyo diyà te doma otaw, so neinang se kedita tadon kinemoloan diyà te sebad olò lawa.