Kolasas 3:3 - Manobo Sarangani

³ Iling te nematay kaw, aw iling te inantay kaw den te Timanem doma ki Cristo pengkey wedà pa iyan pekitai.

Kolasas 3:3 ပူးပေါင်းရင်းမြစ်များ

Galasya 2:20

Pegpemenal ko ki Cristo, iling te nematay a doma kandin kidoen te kros. Lekat niyan, kenà kenaken ibeg se egbayà-bayà kanak, meneng si Cristo se egbayà-bayà kanak so eg-ogpaan a din. Dalem pa te peg-ogpà ko dini te keneyonan, megpesakop a diyà te Batà te Timanem egseligan ko. Dakel se pedowan din kanak aw yan nematay sikandin simelilin kanak.

Roma 6:2

Meneng eked iyan kepakay. Pegpesakop tadon diyà ki Cristo, iling kidon te otaw nematay so eked kidon den keibeg te salà. Yan eked den heman kepakay aw meg-inang kidon te salà.

Kolasas 2:20

So migpesakop kaw diyà ki Cristo, iling te nematay kaw heman sipat kandin. Impelowà kaw din heman lekat te pegkeallang niyo diyà te ketanem te otaw dini te keneyonan. So kenà kaw den allang niyan, ikà niyo eg-aneng-aneng te keilangan tomolò kaw te menge punù iling kani.

Juan 5:24

“Eneng-enengi niyo se kagi ko kenyo seini. Se otaw menenalan te kagi ko, aw memenal heman diyà te Amay ko simogò kanak, yan se otaw begayan te kaling pedowan wedad temanan. Eked sikandin pelumuni, so nekelowà den sikandin lekat te kemetayun, aw doen den kaling pedowan din wedad temanan.

Roma 8:2

So pegsebad ko diyà ki Jesu Cristo, doen kaling pedowan imbegay te Espiritu Santo kanak, aw yan se doun te wedad den keilangan meg-inang a te salà, aw eked a den heman detengi te pelumun.

Roma 5:10

Pengkey poon kidon te Timanem, meneng pineokit te pegkematay te Batà din, migsebad kidon den kandin. So migsebad kidon den kandin, yan netegahan tadon den heman te ontò kidon ipelowà lekat te pelumun pineokit te pegkeantay i Cristo lekat te nematay.

2 Korinto 5:14

Tandà te kedakel te pedowan i Cristo kanak, neantag heman se pedowan ko. Netegahan ko den ini, te pegkematay i Cristo, iling te nematay se kedita te otaw, so nematay sikandin inselilin te kedita te otaw, amon eked kidon taking te kenitadon ibeg. Nematay amon tekingan tadon se kandin ibeg, so nematay aw neantay heman sikandin amon megtabang kenitadon.

Juan 5:21

Eg-antay se Amay ko te otaw nematay, aw egpemegay kandan te kaling pedowan. Iling heman kenyan se inangen ko, so memegay a heman te kaling pedowan diyà te kedita te otaw pemellien ko.

Juan 3:16

Ontò nedekelan te Timanem te pedowan se kedita te otaw, aw yan se doun te insogò din se Batà din temisa amon eked pelumuni se kedita te otaw memenal kandin, meneng begayan dan te kaling pedowan wedad temanan.

Juan 14:19

Te eked kenamay, eked a den todà kitai te menge doma otaw. Meneng sikiyo, todà kaw komità kanak. So doen pedowan ko wedad temanan, begayan kaw heman te pedowan wedad temanan.

1 Pedro 3:4

Meneng keilangan ipekità niyo se mèpiya but lekat te pedowan niyo. Aw metinuud kaw, aw metelek kaw, yan se doen ontò keelagà eked palos pegkedaet, so ontò meelagà diyà te Timanem se otaw iling kenyan.

Mat. 11:25

Penga niyan, migtawal-tawal si Jesus, kagi din, “Amà, Pengolo te kedita doton te langit aw dini heman te lanto te tanà, egpesiontong a diyà kamno, so wedà no petega-tegahi se kebenalan diyà te otaw biyasa aw dakel ontò netegahan, meneng impetaga-taga no den iyan diyà te otaw medanà.

Kolasas 3:4

Si Cristo se nemegay kenyo te kaling pedowan wedad temanan. Aw lomikò sikandin, entayen kaw din aw megdoma kaw kandin te peglowan din.

Menge Hebreo 7:25

Yan se doun te gayed sikandin mekebatog megpelowà te kedita te otaw megpedapag diyà te Timanem pineokit kandin. So wedad temanan din, gayed sikandin egpemoyò diyà te Amay din te itabang din kandan.

Kolasas 2:3

Si Cristo se kelekatan te kedakel te kebiyasa tepad te Timanem.

Juan 5:40

meneng eked kaw pa pemenal kanak, aw yan eked kaw begayi te kaling pedowan wedad temanan.

Juan 4:14

Meneng se otaw minem te wayeg ibegay ko kandin, yan se eked todà palos kelao. Se wayeg ibegay ko kandin, yan se meinang selep kidoen kandin egtebolan te wayeg mekebegay te kaling pedowan wedad temanan.”

Impekità 2:17

Se kedita niyo domineg te kagi ko, keilangan tomolò kaw te kagi te Espiritu Santo diyà te kedita niyo egpemenal. Se kedita niyo eked dàgi te kededàtan, yan se begayan ko te pan intagò kenyo kidoen te langit. Begayan ko heman sikiyo te bato mepotì sinolatan te kaling ngadan. Se otaw begayan ko kenyan, yan olò se otaw metaga-taga aw sinu se ngadan insolat kidoen.’”

1 Juan 3:2

Menge kedowa egkedekelan ko te pedowan, batà kidon den te Timanem. Pengkey wedà tadon pa ketegahi aw eden se keilingan tadon te modi aldaw, meneng netegahan tadon te mekeiling kidon ki Cristo aw lomikò sikandin, so ontò tadon sikandin kitaen.

Filipos 4:7

Aw yan se eg-inangen niyo, inangen te Timanem ontò melinaw se pedowan niyo igsà eked iyan kelebeti te otaw. Yan se ikelasag din te pedowan niyo aw aneng-aneng niyo tandà te pegsebad niyo ki Jesu Cristo.

1 Korinto 15:45

Doen kagi te Timanem insolat, te peg-inang te Timanem te tagnà otaw si Adam, yan se binegayan din te pedowan. Meneng si Cristo ingedanan Temanan Adam, sikandin se egpemegay te kaling pedowan.

1 Korinto 2:14

Meneng se otaw kenà egbeyà-beyaan te Espiritu Santo, yan se otaw eked pekekinawà te ibegay te Espiritu Santo, so aneng-aneng din wedad ontong niyan. Eked din iyan kelebeti, so kelebetan iyan olò aw tebangan kidon te Espiritu Santo.

Roma 5:21

Pengkey egkematay se kedita te otaw neallang te salà, meneng egtebangan te Timanem se kedita te otaw megpesakop diyà kandin, so eneng-enengen din te metòlid dan. Begayan din dan heman te kaling pedowan wedad temanan pineokit te ininang te Pengolo tadon si Jesu Cristo.

Kolasas 1:5

Yan se eg-inangen niyo, so kedengan te pegdineg niyo te kebenalan tepad ki Cristo, nemenal kaw te doen ontong ibegay kenyo doton te langit. Yan se Mèpiya Indan

2 Korinto 5:7

meneng songkani kenà ko egkitaen se egtekingan ko, meneng egtekingan ko se pinemenalan ko.

Roma 6:11

Iling heman kenyan, keilangan eneng-enengen niyo te iling kaw den te otaw nematay so eked kaw den keibeg te salà. Pineokit te pegpesakop niyo diyà ki Jesu Cristo, binegayan kaw den te kaling pedowan, aw yan keilangan iduyun heman se Timanem pineokit te eg-inangen niyo.

Efeso 3:9

Insogò a din amon ipetaga-taga ko diyà te kedita te otaw aw eden se tod te Timanem mig-inang te kedita. Wedà din petega-tegahi diyà te otaw gebii aw eden se tod din,

1 Pedro 4:2

so dalem te peg-ogpà niyo dini lanto te tanà, eked kaw taking te medaet ibeg te pedowan niyo, meneng ibeg te Timanem se tekingan niyo.