Kolasas 3:17 - Manobo Sarangani

¹⁷ Pengkey eden se inangen niyo aw ikegiyen niyo, eneng-enengi niyo te sakop kaw te Pengolo tadon si Jesus, aw pegpesiontong kaw heman diyà te Timanem Amay pineokit kandin.

Kolasas 3:17 ပူးပေါင်းရင်းမြစ်များ

Mat. 28:19

Yan isogò ko den sikiyo doton te kebelad te keneyonan. Pegtoladà kaw te kedita te otaw amon tomaking dan kanak. Pemonyagi niyo dan diyà te ngadan te Timanem Amay, aw Batà din, aw Espiritu Santo.

Ininang 19:17

Nedengeg iyan doton te Efeso, aw netegahan iyan te kedita te Judiyo aw otaw kenà Judiyo. Nepela se kedita dan, aw induyun dan se ngadan te Pengolo si Jesus.

Ininang 4:30

Pekitai se ketolos nikaw, aw pegolii se menge otaw doen mesakit. Pekitai se kepelahan aw doma inang no metolos pineokit te ngadan te insogò no si Jesus.”

Roma 1:8

Monà te kedita te kagi ko kenyo, egpesiontong a diyà te Timanem pineokit ki Jesu Cristo tepad te kedita niyo egpemenal, so pengkey doton te ogpeanan mediyò, medita den se otaw netaga-taga te nemenal kaw den ki Cristo.

1 Korinto 10:31

Nayan, pengkey eden se inangen tadon, pengkey komaen kidon, aw pengkey minem kidon, keilangan iduyun tadon se Timanem pineokit te kedita te inangen tadon.

Efeso 1:17

Egtawal-tawal a diyà te Timanem simogò te Pengolo tadon si Jesu Cristo, aw sikandin se Timanem Amay ipegduyun tadon. Egpemoyò a diyà kandin te tebangan kaw din pineokit te Espiritu Santo, amon megkebiyasa kaw, aw amon metaga-taga kaw heman te Timanem.

Efeso 5:20

Keilangan gayed kaw megpesiontong te kedita diyà te Timanem Amay tadon pineokit te ngadan te Pengolo tadon si Jesu Cristo.

Filipos 1:11

Ibeg ko, olò metòlid se inangen niyo pineokit te tabang i Jesu Cristo kenyo. Yan ipelangkaw aw iduyun se Timanem.

Filipos 2:11

So mikagi se kedita niyan te si Jesu Cristo se Pengolo te kedita dan, Aw yan iduyun dan se Timanem Amay.

Kolasas 1:12

Pegpesiontong kaw diyà te Timanem Amay, so impeakop kaw din diyà te menge sakop din begayan din te mèpiya doton te langit.

Kolasas 2:7

Aw lobosen niyo se pegsalig niyo diyà ki Cristo, iling kaw te kayo medalem se dalid, aw iling kaw te balay ontò dimasel. Aw yan se inangen niyo, ketegahan niyo te benal se intoladà diyà kenyo kedengan, aw gayed kaw megpesiontong diyà te Timanem.

Kolasas 3:15

Keilangan isawol niyo diyà te pedowan niyo se kelinaw ibegay i Cristo amon ketegahan niyo aw eden se mèpiya inangen niyo, so yan se tod din te peg-inang din kenyo iling te sebad lawa. Keilangan megpesiontong kaw heman diyà kandin.

Kolasas 3:23

Pengkey eden se terbaho niyo, keilangan ontò kaw measeb, so kenà olò otaw se toloen niyo te pegterbaho niyo, meneng toloen niyo heman se Pengolo tadon.

1 Tesalonika 1:1

Seini se solat ko, si Pablo, doma ki Silas, aw si Timoteo. Simolat kay te kedita niyo egpemenal kidoen te Tesalonika menge sakop te Amay tadon Timanem aw Pengolo tadon si Jesu Cristo. Ibeg day, tebangan kaw te Timanem aw begayan kaw din heman te kelinaw te pedowan.

1 Tesalonika 5:18

Keilangan gayed kaw megpesiontong diyà kandin pengkey eden se domateng kenyo. Yan se ibeg te Timanem inangen niyo pineokit ki Jesu Cristo.

Menge Hebreo 1:5

Wedad palos anghil inikegiyan te Timanem iling te inikagi din diyà ki Cristo, “Sikona se Batà ko, aw ipetaga-taga ko den te siaken se Amay nikaw.” Si Cristo olò heman se inikegiyan te Timanem kani, “Siak se Amay din, aw sikandin se Batà ko.”

Menge Hebreo 13:15

Doen den keilangan ibegay tadon diyà te Timanem pineokit ki Jesus, aw yan se pegduyun tadon te Timanem te wedad temanan. Keilangan gayed kidon megpetaga-taga te egpesiontong kidon diyà kandin.

1 Pedro 2:5

Binegayan kaw din te kaling pedowan wedad temanan. Aw beyà-beyaan kaw din, meinang kaw iling te menge bato gemiten te peg-inang te balay egsimbahan te Timanem. Inangen kaw din heman iling te menge pengolo te simbahan te Judiyo, so pineokit te tabang i Jesu Cristo, doen den mepakay tadon ibegay diyà te Timanem. Aw megsimba kidon kandin aw domuyun kidon heman kandin, yan se kelubahan din.

1 Pedro 2:9

Meneng kenà kaw iling kandan, so sikiyo se pinemallì te Timanem aw ininang kaw menge batà din. Ininang kaw din menge pengolo te simbahan eglowanan i Cristo. Ininang kaw din menge sakop din egpenimanem, aw tinig-apò kaw din heman. Pinemallì kaw din amon meg-indan kaw te doma otaw tepad te menge mèpiya ininang din diyà kenyo, so pegtawal din kenyo amon megpesakop kaw diyà kandin, inalin kaw din lekat te kengitngit doton te mèpiya kelowahan din.

1 Pedro 4:11

Aw insogò kaw te Timanem megtoladà, keilangan kagi te Timanem se itoladà niyo. Aw insogò kaw te Timanem megtabang te doma otaw, keilangan measeb kaw megtabang, so begayan kaw te Timanem te eneg. Aw iling kenyan se kedita te eg-inangen niyo, iduyun se Timanem pineokit te pegtabang i Jesu Cristo kenyo. Timanem se iduyun aw lomowan te wedad temanan. Metoman iyan.

1 Juan 2:23

Aw eked pemenal se otaw te Batà te Timanem, eked heman sikandin pegpesakop diyà te Timanem Amay. Meneng aw mikagi se otaw te ontò sikandin nemenal te Batà te Timanem, migpesakop den heman sikandin diyà te Timanem Amay.

1 Juan 3:18

Menge batà ko te pegpemenal, wedad ontong aw olò kidon mikagi te dakel se pedowan tadon te doma otaw meneng wedad ketomanan niyan. Keilangan ipekità tadon te benal dakel se pedowan tadon te doma otaw pineokit te tabang tadon kandan.