Kolasas 3:10 - Manobo Sarangani

¹⁰ aw kiminawà kaw den te kaling pegkeotawun doen kaling pedowan imbegay te Timanem, aw gayed din iyan ipegpetilles lamig iling kaw te Timanem, amon ontò kaw metaga-taga te kebenalan tepad kandin.

Kolasas 3:10 ပူးပေါင်းရင်းမြစ်များ

Roma 12:2

Ikà niyo egtaking te ketanem te otaw kenà egpenimanem. Meneng pemoyoi niyo te inangen te Timanem kaling se aneng-aneng niyo amon metòlid se eg-inangen niyo. Yan ketegahan niyo aw eden se ibeg te Timanem inangen niyo, so mèpiya iyan, aw kelubahan din, aw wedad kolang niyan.

Efeso 2:10

Meneng pineokit ki Cristo, ininang kidon den te Timanem kaling amon mekeinang kidon te mèpiya, so yan se tapay din inlalang kenitadon.

Kolasas 3:12

Pinemallì kaw te Timanem, aw sinakop kaw din, aw egkedekelan kaw din te pedowan. Yan keilangan todaen niyo se keogpà niyo, so keilangan megpeidoway kaw, aw meg-inang kaw te mèpiya diyà te doma otaw. Keilangan megpedanà kaw te pegkeotawun niyo. Keilangan medalem se pedowan niyo. Keilangan melayat se pedowan niyo.

2 Korinto 5:17

Se otaw simalig ki Cristo, ontò den netodà se pedowan dan. Taman den niyan se pegkeallang dan diyà te medaet, so doen den kaling pedowan dan.

Kolasas 3:14

Seini se melangkaw punù diyà te kedita nini. Keilangan megpedekelay kaw te pedowan, so pineokit kenyan megkèpiya se keogpà niyo aw wedad kolang niyan.

1 Juan 2:5

Meneng se otaw egtolò te kagi te Timanem, yan se otaw ontò nelobos se kedakel te pedowan din diyà te Timanem. Yan se pengilala te ontò kidon den diyà te Timanem.

Roma 13:14

Meneng peg-iling kaw te eg-inangen te Pengolo tadon si Jesu Cristo. Ikà niyo eg-aneng-aneng tepad te pegtoman niyo te medaet ibeg te lawa niyo.

1 Juan 2:3

Seini se pengilala amon ketegahan tadon te ontò Timanem se egtekingan tadon. Aw egtolò kidon te menge punù din, yan ketegahan tadon te egtaking kidon kandin.

Roma 8:29

Gebii lekat te keteboan te keneyonan, tapay netaga-taga se Timanem aw sinu se megpesakop diyà kandin. Miglalang sikandin meg-inang kenitadon iling te Batà din si Jesus, so ibeg din meinang se kedita tadon iling te telekedowa, aw meinang si Jesus iling te kakay tadon.

Juan 17:3

Seini se otaw doen kaling pedowan wedad temanan, se otaw netaga-taga kamno, sebad no se ontò benal Timanem, aw netaga-taga heman kanak, si Jesu Cristo insogò no dini te keneyonan.

Impekità 21:5

Minikagi se nenenoo kidoen te onsedanan te peglowan, “Na, inangen ko den kaling se kedita.” Minikagi heman sikandin, “Solati se kedita nini, so keseligan se kagi ko, aw metoman iyan.”

Efeso 2:15

Tandà te pegkematay i Cristo, impelowà kay din menge Judiyo lekat te menge punù ingkeliwat i Moises tinolò day, amon pegsebaden din se didowa pongan te otaw, se menge Judiyo aw otaw kenà Judiyo, pineokit te pegpesakop te kedita tadon diyà kandin. Pigsebad din se didowa kemolò te otaw, aw yan inabat din se peopalay tadon.

Galasya 6:15

Pengkey tolien se otaw aw eked, kenà niyan se eglekatan te mèpiya, meneng se mèpiya, yan se kaling pedowan wedad temanan mekinawà tadon.

2 Korinto 4:6

Peg-inang te Timanem te keneyonan, mengitngit aw penga niyan ininang din se kelowahan. Iling kenyan se ininang din kanak, so kedengan, iling te doen kengitngit diyà te pedowan ko, so wedà a kilala ki Jesu Cristo. Meneng linowa din den se pedowan ko amon ipekità din kanak se kelangkaw te Timanem diyà te bawa i Cristo.

2 Korinto 3:18

Wedad den belabag diyà te kedita tadon nemenal ki Cristo. Aw gayed tadon keleseban se kelangkaw te Pengolo, gayed heman elinen te Timanem se pegkesawol tadon, amon kitaen te doma otaw se kelangkaw te Pengolo diyà kenitadon. Yan se eg-inangen te Pengolo, sìyan Espiritu Santo, amon labi kidon pa megkelangkaw iling kandin.

Roma 13:12

Iling te agpet den lomaklak se kengitngit aw domateng se aldaw, so agpet den se peglikò i Cristo. Doun niyan, keilangan lomengà kidon meg-inang te medaet, aw keilangan meg-inang kidon te metòlid. Yan megpeketagad kidon iling te sondalo gayed egpeketagad.

Galasya 3:27

So nemenal den se kedita niyo ki Cristo, aw binonyagan kaw den tandà te pegtaking niyo kandin, yan ontò kaw den iling te pegkesawol din.

Genesis 5:1

Seini se ngadan te menge bowad-bowad i Adam. Peg-inang te Timanem te otaw, ininang din dan iling kandin.

Roma 6:4

Pineokit te pegpebonyag tadon, iling te nematay kidon doma kandin, aw iling te inlebeng kidon heman doma kandin. Neinang iyan amon begayan kidon te Timanem te kaling pedowan, iling te peg-antay din ki Cristo lekat te nematay pineokit te tolos din.

2 Korinto 4:16

Yan se doun te wedà a lengà. Pengkey melomay se lawa ko, meneng se pedowan ko gayed egkagsen.

Filemon 1:6

Egtawal-tawal a te pineokit te pegsebad tadon te pegpemenal, kedogangan se ketaga-taga no tepad te kedita te kèpiya imbegay i Cristo kenitadon tandà te pegpesakop tadon diyà kandin.