Kolasas 1:9 - Manobo Sarangani

⁹ Yan se doun te gayed kay egtawal-tawal tepad kenyo lekat te pegdineg day tepad kenyo kedengan lamig songkani. Gayed kay egpemoyò diyà te Timanem te ontò kaw metaga-taga aw eden se ibeg din inangen niyo pineokit te kebiyasa ibegay te Espiritu Santo kenyo.

Kolasas 1:9 ပူးပေါင်းရင်းမြစ်များ

Juan 7:17

Aw meibeg se otaw tomolò te ibeg te Timanem kandin, yan se otaw metaga-taga aw kenan lekat se kebenalan ipegtoladà ko, aw lekat iyan te Timanem aw tinebok ko.

Ininang 12:5

Dalem te pegkeleboso ki Pedro, ontò migtawal-tawal se menge otaw egpemenal diyà te Timanem tepad kandin.

Roma 12:2

Ikà niyo egtaking te ketanem te otaw kenà egpenimanem. Meneng pemoyoi niyo te inangen te Timanem kaling se aneng-aneng niyo amon metòlid se eg-inangen niyo. Yan ketegahan niyo aw eden se ibeg te Timanem inangen niyo, so mèpiya iyan, aw kelubahan din, aw wedad kolang niyan.

1 Korinto 1:5

Lekat te pegsebad te pedowan niyo kandin lamig songkani, ontò medita se tabang din kenyo, aw yan netegahan niyo se kebenalan, aw biyasa kaw egtoladà kenyan.

Efeso 1:8

so ontò sikandin bowasag te pegtabang din kenitadon. Lekat te kebiyasa te Timanem, wedà din petega-tegahi diyà te otaw gebii se impetaga-taga din den kenitadon te doen pa inangen din pineokit ki Cristo.

Efeso 5:10

Pekagsen kaw peg-iling te inang mekebegay te luba diyà te Pengolo tadon.

Efeso 5:17

Yan ikà niyo eg-inang te wedad ontong, meneng keilangan tomolò kaw te ibeg te Pengolo tadon.

Efeso 6:6

Keilangan gayed kaw tomolò, kenà olò dalem te pegtengteng te amo niyo, so kenà olò otaw se keilangan kelubahan niyo. Meneng so si Cristo se Pengolo niyo, keilangan lekat te pedowan niyo se pegtolò niyo te ibeg te Timanem.

Filipos 1:4

Gayed neluba se pedowan ko te kelikit ko egtawal-tawal diyà te Timanem tepad te kedita niyo.

Kolasas 1:6

intoladà den doton kenyo aw doton te kebelad te keneyonan. Medita den se doma otaw nemenal kenyan, aw eg-inang den dan te mèpiya. Mig-iling kaw heman kandan, so lekat te aldaw te pegdineg niyo te doen tabang te Timanem kenyo, olò mèpiya se eg-inangen niyo, so netegahan niyo den te benal iyan.

Kolasas 3:16

Keilangan isawol niyo diyà te pedowan niyo se kagi intoladà i Cristo. Pegpetoledaay kaw te kedita te kebenalan, aw pegpesegdahay kaw heman. Pekitai niyo te egpesiontong kaw diyà te Timanem pineokit te pegdelangan niyo diyà kandin.

Kolasas 4:12

Minikagi heman si Epapras sebad heman sakop te probinsya niyo te dakel se pedowan din kenyo. Gayed sikandin egtolò te ibeg i Jesu Cristo. Egtawal-tawal sikandin aw ontò egpemoyò diyà te Timanem te melobos se pegpemenal niyo. Ibeg din ontò kaw metaga-taga te kedita te ibeg te Timanem diyà kenyo.

Kolasas 4:5

Keilangan mèpiya se eg-inangen niyo diyà te menge doma otaw kenà egpemenal. Peg-indan kaw kandan tepad ki Cristo te pengkey eden eldawi.

1 Tesalonika 1:3

Te pegtawal-tawal day diyà te Amay tadon Timanem, kenà kay egkelibel te impetaga-taga niyo te benal nemenal kaw ki Cristo pineokit te eg-inangen niyo, aw impetaga-taga niyo te dakel se pedowan niyo kandin pineokit te pegpekeaseb niyo, aw impetaga-taga niyo te egpeliman kaw te Pengolo tadon si Jesu Cristo pineokit te pegtayod niyo te kelimahan.

1 Tesalonika 5:17

Keilangan gayed kaw megtawal-tawal diyà te Timanem.

2 Tesalonika 1:11

Yan se doun te gayed kay egtawal-tawal tepad kenyo. Egpemoyò kay diyà te Timanem te ipetagad kaw din kominawà te ibegay din kenyo. Ibeg day, tebangan kaw te Timanem amon metoman se kedita te ibeg niyo meg-inang te mèpiya tandà te pegsalig niyo kandin.

Filemon 1:4

Kedowa ko, Filemon, gayed a egpesiontong diyà te Timanem tepad kamno te kelikit te pegtawal-tawal ko,

Filemon 1:6

Egtawal-tawal a te pineokit te pegsebad tadon te pegpemenal, kedogangan se ketaga-taga no tepad te kedita te kèpiya imbegay i Cristo kenitadon tandà te pegpesakop tadon diyà kandin.

Menge Hebreo 10:36

Keilangan medalem se pedowan niyo amon mekebatog kaw tomoman te ibeg te Timanem, aw yan kominawà kaw te impakang din kenyo.

Menge Hebreo 13:21

Yan se doun te egtawal-tawal a diyà te Timanem egpemegay te kelinaw te begayan kaw te kedita te mèpiya tabang din amon mekebatog kaw tomoman te ibeg din. Ibeg ko heman, tebangan kaw din amon meg-inang kaw te mekeluba kandin pineokit te tabang i Jesu Cristo diyà kenyo. Iduyun sikandin te wedad temanan. Metoman iyan.

Santiago 1:5

Meneng aw doen otaw kidoen kenyo detengan te kelimahan, aw wedà ketaga-taga aw eden se inangen din, mèpiya aw memoyò sikandin diyà te Timanem amon ibegay din kandin se kebiyasa, so gayed egpemegay se Timanem diyà te kedita te otaw memoyò. Bowasag sikandin diyà kandan, aw eked din dan heman peyàyai.

Santiago 3:17

Meneng se otaw doen kebiyasa lekat te Timanem, yan se otaw kenà eg-inang te medaet, kenà egsamok, gayed mèpiya se pedowan din, kenà metugul, gayed egkeido aw egpenabang te doma, kenà egdowa-dowa, meneng melobos se pedowan din.

1 Pedro 2:15

Ibeg te Timanem, meg-inang kaw te metòlid, amon wedad isila te kedita te otaw wedà pa ketaga-taga te kebenalan aw wedad inenengen.

1 Pedro 4:2

so dalem te peg-ogpà niyo dini lanto te tanà, eked kaw taking te medaet ibeg te pedowan niyo, meneng ibeg te Timanem se tekingan niyo.

1 Juan 2:17

Meneng megkewedad se medaet ketanem dini te keneyonan te eked kenamay sipat medaet ibeg te otaw te keneyonan. Meneng se otaw egtoman te ibeg te Timanem, yan se otaw tomayod te wedad temanan.

1 Juan 5:20

Netegahan tadon heman te dimini se Batà te Timanem te keneyonan amon ketegahan tadon se benal Timanem. Sikitadon diyà te benal Timanem so diyà kidon te Batà din si Jesu Cristo. Sikandin se benal Timanem, aw sikandin se eglekatan te kaling pedowan wedad temanan.