Juan 9:22 - Manobo Sarangani

²² Yan se inikagi te amay aw inay din, so nelemitan dan te menge obanen te Judiyo. Tapay migsebad se menge obanen te eked den dan peopi te simbahan se otaw mikagi te si Jesus se Misiyas.

Juan 9:22 ပူးပေါင်းရင်းမြစ်များ

Luc. 6:22

“Doen keluba te kedita niyo kebensihan te doma otaw, aw pemilangen, aw tompuyusen, aw tindàten tandà te pegtaking niyo kanak Timanem Migpekeotaw,

Juan 1:19

Doen menge pengolo te simbahan te Judiyo aw menge bowad-bowad i Levi dimoton ki Juan Memonyagay. Insogò dan te menge obanen te Judiyo lekat te Jerusalem amon meg-insà dan ki Juan aw sinu sikandin. Seini se inikagi i Juan, so wedà din boloni se kebenalan, meneng timaba sikandin, kagi din, “Kenà ko se Misiyas megpelowà kenyo.”

Juan 16:2

Domateng se aldaw eked kaw peopi kidoen te menge simbahan te Judiyo. Imetayan kaw heman te otaw meg-aneng-aneng te yan se ibeg te Timanem.

Juan 19:38

Nayan, doen sebad otaw si Jose tege Arimatiya timaking ki Jesus, meneng mig-eles-eles te pegtaking din kandin so nelemitan sikandin te menge obanen te Judiyo. Dimoton si Jose ki Pilato aw mig-insà aw mepakay aw ebaten din se lawa i Jesus lekat te kros amon ilebeng din. Mepakay iyan diyà ki Pilato, aw yan dimoton aw inabat din se lawa.

Juan 20:19

Pegkedelem te Linggo sìyan, netipon se menge tinoledaan i Jesus kidoen te sebad balay, aw tinakep dan se lelebangan niyan amon eked dan kitai, so nelemitan dan te menge obanen te Judiyo. Pengkey netakep se lelebangan, meneng pegketà dimateng si Jesus timindeg kidoen te tengà-tengà dan, aw minikagi, “Ibeg ko melinaw se pedowan niyo.”

Juan 7:13

Meneng in-eles dan se peg-ikagi dan kenyan, so nelemitan dan te menge obanen te Judiyo neopal kandin.

Juan 9:18

Wedà pemenal se menge obanen te Judiyo te tapay sikandin bota aw negolì den se mata din, aw yan impeangay dan se amay aw inay din.

Juan 9:21

Meneng wedà day ketegahi aw nengà lay sikandin kimità den. Wedà day heman ketegahi aw sinu se migbolong kandin. Meneng mèpiya aw sikandin se insaen niyo, so dakel den sikandin. Sikandin se meketaba te menge insà niyo.”

Juan 9:34

Minikagi dan, “Pegtebaw no, bota ka so doen salà nikaw. Yan eked kepakay aw sikona se megtoladà kenami.” Penga niyan, impelowà dan sikandin lekat te simbahan.

Juan 9:35

Pegdineg i Jesus te impelowà dan lekat te simbahan se otaw negolian, pinengemahà din sikandin. Pegkità din kandin, mig-insà si Jesus, “Nemenal ka lay te doen Timanem Migpekeotaw?”

Ininang 4:18

Pegtawal dan ki Pedro aw si Juan, migpunù dan te eked dan ebey ikagi te ngadan i Jesus, aw eked dan heman pegtoladà tepad kandin.

Ininang 5:13

Doen menge doma otaw wedà akop diyà te otaw egpemenal tandà te ketalaw dan, meneng dimuyun dan te menge otaw egpemenal.

Ininang 5:40

Penga niyan, aneng-aneng dan, mèpiya se inikagi i Gamaliel. Peg-angay dan te menge sogounun i Cristo, impebadas dan pa. Migpunù dan kandan te eked dan palos peg-indan tepad ki Jesus. Penga niyan, impelowà dan.

Impekità 21:8

Meneng se kedita te otaw dàgen te kededàtan, aw eked tayod te pegsalig kanak, aw otaw nelegeb te salà, aw metibonò, aw eglayok te kenà kandan esawa, aw egketoigan, aw egsimba te kenà benal timanem, aw egkebolalaw, doen ontong te kedita dan kidoen te lanaw apoy aw esopri, yan se ikedowa kemetayun.”