Juan 6:63 - Manobo Sarangani

⁶³ Timanem olò se mekebegay te kaling pedowan. Eked iyan keabat pineokit te pagod te otaw. Meneng se kebenalan intoladà ko kenyo, yan se lekat te Timanem aw mekebegay te kaling pedowan.

Juan 6:63 ပူးပေါင်းရင်းမြစ်များ

Menge Hebreo 4:12

Ontò metolos se kagi te Timanem aw egpekebegay te kaling pedowan. Labi pa megalang se kagi te Timanem diyà te sondang mekesipal te luluwadun aw ogat, so mekeapet se kagi te Timanem doton te temanan te pedowan aw aneng-aneng te otaw. Pineokit kenyan, ipetaga-taga aw eden se egkeeneng-enengan tadon aw egkeibegan te pedowan tadon.

Galasya 5:25

Se Espiritu Santo, yan se nemegay kenitadon te pedowan wedad temanan, aw keilangan ontò kidon tomolò kandin.

Juan 6:68

Timaba si Simon, se doma ngadan din si Pedro, kagi din, “Pengolo, wedad palos doma tekingan day, so sebad no se egtoladà tepad te kaling pedowan wedad temanan.

1 Pedro 1:23

Todà kaw den timebaw kenà pineokit te otaw, meneng pineokit te kagi te Timanem wedad temanan egpemegay te kaling pedowan wedad temanan.

1 Korinto 15:45

Doen kagi te Timanem insolat, te peg-inang te Timanem te tagnà otaw si Adam, yan se binegayan din te pedowan. Meneng si Cristo ingedanan Temanan Adam, sikandin se egpemegay te kaling pedowan.

Roma 10:17

Yan netegahan tadon te eked pemenal se otaw singed aw menenalan dan te kebenalan. Se kebenalan, yan se ipegtoladà day tepad ki Cristo.

1 Pedro 3:18

so nematay heman si Cristo amon megpelowà kenitadon lekat te salà. Mekesebad sikandin kematay so botong se pegkematay din. Pengkey wedad salà din, meneng simelilin sikandin kenitadon pengkey doen salà tadon amon megkità kidon aw Timanem. Pengkey nematay se lawa din, meneng neantay sikandin.

1 Tesalonika 2:13

Gayed kay heman egpesiontong diyà te Timanem tepad kani. Pegtoladà day kenyo te kagi te Timanem, nemenal kaw kenyan, so netegahan niyo te kenà iyan olò kagi te otaw, meneng ontò benal kagi te Timanem. Pineokit te kagi te Timanem, doen eg-inangen din diyà te kedita niyo egpemenal.

Roma 8:2

So pegsebad ko diyà ki Jesu Cristo, doen kaling pedowan imbegay te Espiritu Santo kanak, aw yan se doun te wedad den keilangan meg-inang a te salà, aw eked a den heman detengi te pelumun.

Santiago 1:18

Lekat te ibeg din ininang kidon din menge batà din pineokit te pegpemenal tadon te kebenalan ipegtoladà. Yan se ininang din amon sikitadon se ontò meelagà diyà te kedita te ininang din.

Genesis 2:7

Penga niyan, inabat te Timanem se tanà, aw yan se ginamit din te pegtiyon din te otaw. Penga niyan, inedop din se idong te otaw, aw yan binegayan din se otaw te pedowan.

1 Pedro 3:21

Yan se pengilala tepad te pegpebonyag niyo, so impelowà kaw lekat te salà kenà tandà te peg-onaw te lawa niyo amon meabat se osing, meneng tandà te pegpemoyò niyo te Timanem te ebaten din se salà lekat te pedowan niyo. Impelowà kaw lekat te pelumun pineokit te pegkeantay i Jesu Cristo lekat te nematay.

1 Timoteo 4:8

Aw megpekagsen kidon te lawa tadon, doen ontong tadon. Meneng labi pa mèpiya se ontong tadon aw megpekagsen kidon tomolò te Timanem, so pineokit kenyan, mèpiya se keogpà tadon dini songkani aw doton heman te langit te modi aldaw.

Menge Hebreo 13:9

Aw doen otaw megtoladà kenyo te sebad kemolò toladà kenà iling te kebenalan tapay intoladà diyà kenyo, ikà niyo egpemenal kenyan. Pineokit te tabang te Timanem, melobos se pegsalig tadon diyà kandin. Eked kelobos se pegsalig tadon diyà kandin pineokit te pegtolò tadon te menge punù ipegtoladà dan tepad te kànen tadon, so kenà egketebangan se menge otaw egtolò te menge punù sìyan.

Galasya 6:15

Pengkey tolien se otaw aw eked, kenà niyan se eglekatan te mèpiya, meneng se mèpiya, yan se kaling pedowan wedad temanan mekinawà tadon.

Roma 2:25

Sikiyo menge Judiyo, aw tomolò kaw te punù ingkeliwat i Moises, benal doen ontong te pegpetolì niyo. Meneng aw lomàpang kaw te punù ingkeliwat i Moises, wedad ontong niyo pengkey tinolì kaw, so neinang kaw iling te otaw wedà tolii kenà egtolò te punù ingkeliwat i Moises.

Galasya 5:6

Diyà te menge otaw nemenal den ki Cristo, wedad elet diyà te otaw tinolì aw otaw wedà tolii. Onawa iyan diyà te Timanem. Meneng ibeg te Timanem, ipekità tadon te benal se pegpemenal tadon pineokit te dakel pedowan tadon.

Juan 5:21

Eg-antay se Amay ko te otaw nematay, aw egpemegay kandan te kaling pedowan. Iling heman kenyan se inangen ko, so memegay a heman te kaling pedowan diyà te kedita te otaw pemellien ko.

Ininang 5:20

“Doton kaw te dakel simbahan. Peg-indan kaw te menge otaw tepad te kaling pedowan ibegay te Timanem kandan.”