Juan 6:27 - Manobo Sarangani

²⁷ Ikà niyo egpengemahà te kànen megkewedad te eked kenamay. Meneng pengemahà kaw te kànen eked pegkewedad aw mekebegay te pedowan wedad temanan. Yan se ibegay ko kenyo, so siaken se Timanem Migpekeotaw, aw impetaga-taga te Amay ko Timanem te siak se insogò din.”

Juan 6:27 ပူးပေါင်းရင်းမြစ်များ

Kolasas 3:2

Ikà niyo eg-aneng-aneng tepad te menge keibegan te otaw dini te keneyonan, meneng keilangan meg-aneng-aneng kaw tepad te ibeg i Cristo doton te langit.

Juan 6:54

aw se otaw komaen te onod ko aw minem te dipanog ko, yan se otaw begayan ko te kaling pedowan wedad temanan, aw entayen ko pa sikandin te temanan aldaw.

2 Timoteo 2:19

Meneng eked ketodà se kebenalan impetoladà te Timanem, aw egketegahan iyan pineokit te kagi seini, “Netegahan te Pengolo se kedita te otaw egtaking kandin.” Doen heman doma kagi, “Keilangan eked pegpekesalà se kedita te otaw eg-ikagi te egtaking dan te Pengolo.”

Juan 6:40

Meibeg se Amay ko te begayan te kaling pedowan wedad temanan se kedita te otaw nengemahà aw nemenal kanak, aw entayen ko dan te temanan aldaw.”

Roma 6:23

Detengan te kemetayun wedad temanan se otaw eg-inang te salà. Meneng se ibowang te Timanem, yan se kaling pedowan wedad temanan pineokit te pegpemenal tadon te Pengolo tadon si Jesu Cristo.

Juan 10:28

Egpemegay a kandan te kaling pedowan wedad temanan, aw eked dan detengi te kemetayun. Wedad palos mekeagaw kandan diyà kanak.

Juan 6:51

Siaken se kànen insogò dini lekat te langit mekebegay te kaling pedowan. Aw komaen se otaw te kànen seini, wedad temanan te pedowan din. Se kànen seini ibegay ko, yan se onod ko, amon mekekinawà se kedita te otaw te kaling pedowan.”

Ininang 10:38

Simogò se Timanem kandin aw egbeyà-beyaan te Espiritu Santo. Pengkey peglegeb din, tinebangan din se menge otaw, aw pinegolian din se menge doma dinetengan te bosaw, so migtabang se Timanem kandin.

Juan 17:2

Insalig no kanak se peglowan diyà te kedita te otaw amon mekebegay a te kaling pedowan wedad temanan diyà te kedita te otaw imbegay no kanak.

Mat. 6:19

“Ikà niyo egtipon te kedònan dini lanto te tanà, so peg-enayen iyan, aw megkedaet iyan, aw ebaten iyan te menenakaw.

Juan 6:58

Seini se kànen lekat te langit. Kenà ini iling te mana, so nematay se kemonaan niyo pengkey kimaen dan kenyan. Meneng se otaw komaen te kànen seini, wedad palos temanan te pedowan din.”

2 Pedro 1:17

Migdoma kay kandin kedengan te pegduyun te Timanem Amay kandin aw pegpelangkaw din kandin. Dinineg day se kagi te Timanem Melangkaw, kagi din, “Seini se Batà ko. Dakel se pedowan ko kandin, aw ontò a neluba kandin.”

Filipos 2:13

so doen eg-inangen te Timanem kenyo amon meibeg kaw tomolò kandin, aw amon mekebatog kaw tomolò te ibeg din.

1 Pedro 1:24

Doen kagi te Timanem insolat, “Mebabà se omol te kedita te otaw. Iling dan olò te sagbet, aw iling olò te bolak te sagbet se otaw melangkaw, So egkematay se sagbet te eked kenamay, aw egkewedad se bolak niyan.

Luc. 3:22

aw kinità dan se Espiritu Santo migpedanà diyà kandin iling te bawa te selepati. Dinineg dan heman se kagi te Timanem lekat te langit, “Sikona se Batà ko. Dakel se pedowan ko kamno, aw ontò a neluba kamno.”

1 Tesalonika 1:3

Te pegtawal-tawal day diyà te Amay tadon Timanem, kenà kay egkelibel te impetaga-taga niyo te benal nemenal kaw ki Cristo pineokit te eg-inangen niyo, aw impetaga-taga niyo te dakel se pedowan niyo kandin pineokit te pegpekeaseb niyo, aw impetaga-taga niyo te egpeliman kaw te Pengolo tadon si Jesu Cristo pineokit te pegtayod niyo te kelimahan.

Kolasas 1:29

Yan se doun te ontò a egpekagsen te pegtoladà ko kenyan pineokit te kagsen imbegay te Timanem kanak.

Juan 3:33

Meneng se otaw memenal te kagi din, yan se otaw megpetaga-taga te benal se kagi te Timanem.

Ininang 2:22

“Na, menge kedomaan ko Judiyo, penenalan kaw te ikegiyen ko. Si Jesus tege Nasarit, yan se impetaga-taga te Timanem te sikandin se insogò din. Impetaga-taga din iyan pineokit te peg-inang din te inang metolos, aw kepelahan, aw ledyawan. Ontò niyo netegahan iyan so neinang iyan dini kenyo.

Juan 6:68

Timaba si Simon, se doma ngadan din si Pedro, kagi din, “Pengolo, wedad palos doma tekingan day, so sebad no se egtoladà tepad te kaling pedowan wedad temanan.

Luc. 9:35

Penga niyan, dinineg dan se kagi te Timanem lekat te labon, “Seini se Batà ko, aw pinemallì ko sikandin amon tomanen din se ibeg ko. Keilangan sikandin se penenelanen niyo.”

Menge Hebreo 12:16

Peg-ahà kaw amon wedad otaw doton kenyo meg-inabut te kenà kandin esawa, aw tominggetan heman sikandin te Timanem. Iling kenyan si Esau gebii, so pengkey sikandin se keliwatan peden te pakang te Timanem diyà te kemonaan din so sikandin se penganay batà te amay din, meneng inliwan din se pegkepenganay din diyà te kànen neamin te sebad olò pegpengaen.

Galasya 5:6

Diyà te menge otaw nemenal den ki Cristo, wedad elet diyà te otaw tinolì aw otaw wedà tolii. Onawa iyan diyà te Timanem. Meneng ibeg te Timanem, ipekità tadon te benal se pegpemenal tadon pineokit te dakel pedowan tadon.

Menge Hebreo 4:11

Yan, so doen mèpiya ogpeanan impetagad te Timanem kenitadon, keilangan megpekagsen kidon amon ipeogpà kidon din doma din doton te mèpiya ogpeanan sìyan impetagad din. Keilangan eked kidon peg-iling te menge kemonaan tadon sìyan, so wedà dan tolò aw yan wedà din dan peogpai doton.

Kolasas 2:22

Wedad den ontong te kedita te punù sìyan, pengkey toloen aw eked. Ikà niyo egpenenalan te toladà sìyan so olò iyan lekat te aneng-aneng te otaw.

1 Korinto 9:2

Pengkey doen doma otaw eg-aneng-aneng te kenà a sogounun i Cristo, meneng sikiyo se netaga-taga kenyan, so pineokit te pegtoladà ko, nemenal kaw aw yan se pengilala te sogounun a i Cristo.

1 Korinto 6:13

Eneng-enengi niyo ini. Benal se eg-ikegiyen te doen kànen amon isawol diyà te getek, aw doen heman getek amon solan te kànen. Meneng eked kepakay aw megkelagok kidon, so doen kwani aldaw pegbàtan te Timanem se getek aw kànen. Iling heman kenyan se lawa tadon. Ininang iyan te Timanem kenà amon meibeg kidon te kenà kenitadon esawa, meneng ininang kidon din amon tomolò kidon te ibeg te Pengolo tadon, aw netegahan te Pengolo tadon se keilangan te lawa tadon.

Roma 4:11

Penga te pegpemenal i Abraham, migpetolì sikandin. Yan se pengilala te inaneng-aneng te Timanem te metòlid sikandin tandà te pegpemenal din te wedà pa tolii. Yan neinang sikandin olo te kedita te otaw egpemenal pengkey wedà dan tolii, so inaneng-aneng heman te Timanem te metòlid dan tandà te pegpemenal dan.

Juan 15:24

Simpana wedà dan kità te menge kepelahan ininang ko eked keinang te doma otaw, eked dan heman petega-tegahi te doen salà dan. Meneng nebensi dan kanak aw Amay ko, pengkey kinità dan se kepelahan ininang ko.

Juan 14:6

Minikagi si Jesus, “Siak se dalan. Siak se kebenalan. Siak se eglekatan te kaling pedowan. Eked pekedoton se otaw te Amay ko singed aw onà dan mokit kanak.

Juan 11:42

Netegahan ko te gayed a no egpenenelanen. Meneng migtawal-tawal a den kamno seini amon ketebangan se menge doma otaw dini, so ibeg ko memenal dan te sikona se simogò kanak dini te tanà.”

Juan 8:18

Yan egkeseligan a, so siak se eg-indan kenyo tepad kanak, aw Amay ko simogò kanak, sikandin heman se eg-indan te benal tepad kanak.”

Mar. 9:7

Penga niyan, doen labon dimateng diyà kandan, aw wedà dan ebey kità kandan. Penga niyan, dinineg dan se kagi te Timanem lekat te labon, “Seini se Batà ko aw ontò dakel se pedowan ko kandin. Keilangan sikandin se penenelanen niyo.”

Mar. 1:11

Penga niyan, dinineg dan se kagi te Timanem lekat te langit, “Sikona se Batà ko. Dakel se pedowan ko kamno, aw ontò a neluba kamno.”

Mat. 17:5

Telobo pa minikagi si Pedro, doen labon melowa dimateng diyà kandan aw wedà dan ebey kità kandan. Penga niyan, dinineg dan se kagi te Timanem lekat te labon, “Seini se Batà ko. Dakel se pedowan ko kandin, aw ontò a neluba kandin. Keilangan sikandin se penenelanen niyo.”

Mat. 3:17

Penga niyan, dinineg dan se kagi te Timanem lekat te langit, “Seini se Batà ko. Dakel se pedowan ko kandin, aw ontò a neluba kandin.”

Santiago 1:11

so aw megkelangkaw se aldaw aw meinit, melanes se bolak, aw matay, aw medaet iyan tengtengen. Iling heman kenyan se menge otaw meyaman, so pengkey mebuyung dan mengewarta, meneng ketenanan dan se kedita aw matay.

2 Korinto 4:18

Kenà ontong dini te keneyonan se ehaen ko, so megkewedad iyan te eked kenamay. Meneng gayed ko egpelimanan se benal ontong eked kitai te mata dini te keneyonan, so wedad temanan niyan.

Mat. 8:20

Meneng minikagi si Jesus, “Mèpiya pa se menge menenanap te kebenesan, so doen ogpeanan dan. Mèpiya pa heman se menge manok, so doen heman embonganan dan. Meneng melima aw tomaking ka kanak Timanem Migpekeotaw, so wedad palos ibatan ko te delem.”

Mat. 25:46

Penga niyan, ipedeleg dan doton te pelumun wedad temanan. Meneng se otaw eg-inang te metòlid, begayan dan te kaling pedowan wedad temanan.”

Juan 3:15

Meinang iyan amon kebegayan te kaling pedowan wedad temanan se kedita te otaw memenal kanak.”

Juan 6:47

Eneng-enengi niyo se kagi ko kenyo. Doen kaling pedowan wedad temanan te kedita te otaw nemenal kanak.

Juan 6:53

Minikagi si Jesus, “Eneng-enengi niyo se kagi ko kenyo. Aw eked kaw kaen te onod ko, aw eked kaw heman inem te dipanog ko, wedad kaling pedowan ibegay kenyo. Siak se Timanem Migpekeotaw,

Juan 6:62

Labi pa besi se kebensi niyo aw kitaen a niyo Timanem Migpekeotaw aw megpeengat a doton te langit eg-ogpaan ko kedengan.