Aw teboken te otaw se itoladà din, ibeg din domuyun te kandin pegkeotawun. Meneng aw pineokit te pegtoladà din, iduyun din se simogò kandin, yan se pengilala te benal se ipegtoladà din, aw kenà sikandin bolelawun.
Wedad keilangan ko te doen otaw meg-indan te benal tepad kanak. Meneng pineeneng-enengan ko sikiyo tepad te inikagi i Juan Memonyagay amon memenal kaw kanak, aw mekelowà kaw lekat te salà.
Timaba si Jesus, “Simpana megpelangkaw-langkaw a, wedad ontong ko. Meneng ipegpelangkaw a te Amay ko, aw eg-ikagi kaw te sikandin se Timanem egsimbahen niyo.
Meneng nesayo den si Jesus lekat kidoen sebad din, aw dimeleg doton didaya, so netegahan din te doen ibeg dan megleges kandin amon inangen dan sikandin selotan dan, meneng kenà niyan se ibeg din.
Migdoma kay kandin kedengan te pegduyun te Timanem Amay kandin aw pegpelangkaw din kandin. Dinineg day se kagi te Timanem Melangkaw, kagi din, “Seini se Batà ko. Dakel se pedowan ko kandin, aw ontò a neluba kandin.”
Ibeg te Timanem tomayod kaw te kelimahan. Nelimahan heman si Cristo aw timayod sikandin kenyan amon ketebangan kaw din. Sikandin se gegonan niyo amon meketayod kaw heman te kelimahan.
