Juan 20:19 - Manobo Sarangani

¹⁹ Pegkedelem te Linggo sìyan, netipon se menge tinoledaan i Jesus kidoen te sebad balay, aw tinakep dan se lelebangan niyan amon eked dan kitai, so nelemitan dan te menge obanen te Judiyo. Pengkey netakep se lelebangan, meneng pegketà dimateng si Jesus timindeg kidoen te tengà-tengà dan, aw minikagi, “Ibeg ko melinaw se pedowan niyo.”

Juan 20:19 ပူးပေါင်းရင်းမြစ်များ

Mat. 10:13

Aw mèpiya se pedowan te otaw eg-ogpà kidoen, metoman dan begayan te kelinaw pineokit te kagi niyo. Meneng aw wedad otaw kidoen mèpiya se pedowan din, lomikò diyà kenyo se inikagi niyo.

Mat. 18:20

Pengkey olò dowa aw telo se otaw metipon amon megsimba kanak, kidoen a heman doma dan.”

Mar. 16:14

Penga niyan, migpekità si Jesus diyà te sempolò tegusà tinoledaan din dalem te pegpengaen dan. Simila sikandin kandan so wedà dan pemenal aw magsen se olo dan, so wedà dan pemenal te kagi te menge otaw kimità kandin penga te pegkeantay din lekat te nematay.

Juan 14:27

“Ibegay ko den kenyo se kelinaw te pedowan. Kenaken kelinaw se ibowang kenyo. Eked pekebegay se otaw dini te keneyonan te kelinaw te pedowan ibowang ko den kenyo. Yan ikà niyo egketetana. Ikà niyo heman egkelemitan.

Juan 16:22

Iling kaw heman kenyan, so pengkey melidò kaw den, meneng todà kaw komità kanak. Todà heman meluba se pedowan niyo, aw wedad otaw mekeabat te keluba kidoen kenyo.

Juan 16:33

Minikagi a kani diyà kenyo amon doen kelinaw te pedowan niyo tandà te pegpesakop niyo diyà kanak. Pengkey pemilangen kaw te otaw dini te keneyonan, meneng pegpekagsen kaw, so dinaeg ko se kedita te medaet dini te keneyonan.”

Juan 20:21

Penga niyan, todà minikagi si Jesus, “Ibeg ko melinaw se pedowan niyo. Iling te pegsogò te Amay ko kanak, yan isogò ko den heman sikiyo.”

Juan 20:26

Penga te sebad simana, todà netipon se menge tinoledaan i Jesus doton te balay, aw kidoen heman si Tomas doma dan. Netakep se lelebangan, meneng pegketà dimateng si Jesus timindeg diyà te tengà-tengà dan, aw minikagi, “Ibeg ko melinaw se pedowan niyo.”

Juan 21:1

Penga niyan, todà migpekità si Jesus diyà te menge tinoledaan din kidoen te kilid te Lanaw te Tibiryas. Meg-indan a den kenyo tepad te pegpekità din kandan.

Juan 21:14

Yan se iketelo te pegpekità i Jesus diyà te menge tinoledaan din penga te pegkeantay din lekat te nematay.

Juan 7:13

Meneng in-eles dan se peg-ikagi dan kenyan, so nelemitan dan te menge obanen te Judiyo neopal kandin.

Roma 15:33

Ibeg ko, tebangan se kedita niyo te Timanem egpemegay te kelinaw te pedowan.

1 Korinto 15:5

Penga te pegkeantay din lekat te nematay, onà migpekità diyà ki Pedro, aw penga niyan migpekità heman diyà te menge doma tinoledaan din.

Efeso 2:14

Pineokit kandin, migsebad den se menge Judiyo aw otaw kenà Judiyo. Yan se doun te wedad den peopalay te menge Judiyo aw otaw kenà Judiyo, so inabat din se elet diyà te tengà-tengà tadon.

Efeso 6:23

Menge kedowa ko, ibeg ko doen kelinaw te pedowan niyo aw megpedekelay kaw te pedowan dalem te pegsalig niyo te Timanem. Yan se ibegay kenyo te Timanem Amay aw Pengolo tadon si Jesu Cristo.

Filipos 1:2

Ibeg ko, begayan kaw te tabang aw kelinaw te pedowan lekat te Timanem Amay tadon, aw lekat te Pengolo tadon si Jesu Cristo.

2 Tesalonika 3:16

Ibeg day, gayed kaw begayan te Pengolo tadon te kelinaw te pedowan pengkey eden se domateng kenyo, so sikandin se eglekatan te kelinaw te pedowan. Ibeg day heman, gayed megdoma se Pengolo tadon kenyo.

Menge Hebreo 7:2

Si Melkisedec heman se binegayan i Abraham te ikesempolò ketengà te kedita neabat din. Se kedegdagan te ngadan i Melkisedec, yan se kagi metòlid. Yan tewalen sikandin “Selotan Eglowan te Metòlid.” Doen heman kedegdagan te kagi Salem, yan se kagi kelinaw. Yan tewalen heman sikandin “Selotan te Kelinaw.”

3 Juan 1:14

so doen ibeg ko meglegeana a kidoen kamno te eked kenamay amon megpebelaw-belaway ki.

Impekità 1:4

Siak si Juan se simolat kani diyà te kedita niyo menge sakop te pito simbahan kidoen te probinsya te Asya. Ibeg ko tebangan kaw aw begayan kaw heman te kelinaw te pedowan lekat te Timanem, aw Espiritu Santo, aw si Jesu Cristo. Gayed doen Timanem pengkey seini, aw gebii, aw modi heman aldaw. Se Espiritu Santo insogò lekat te langit, gayed din ipegpetaga-taga te metolos sikandin pineokit te pito keokit. Keseligan se kagi i Jesu Cristo. Sikandin se tagnà neantay lekat te nematay amon mengolo diyà te kedita te otaw meantay lekat te nematay. Sikandin se eglowan diyà te kedita te selotan dini te keneyonan. Dakel se pedowan din kenitadon, aw yan impelowà kidon din lekat te salà tadon pineokit te dipanog din te pegkematay din doton te kros.