Juan 20:17 - Manobo Sarangani

¹⁷ Minikagi si Jesus, “Ikà eg-awid kanak, so wedà a pa pegpeengat doton te Amay ko. Meneng doton ka te menge kedowa ko, aw peg-indan ka kandan te molì a pa doton te Amay ko, doton te Timanem ko. Sikandin se Amay niyo heman aw Timanem niyo.”

Juan 20:17 ပူးပေါင်းရင်းမြစ်များ

Juan 16:28

Insogò a din dini te keneyonan, aw mesayo a den lekat te keneyonan amon molì a doton te Amay ko.”

1 Pedro 1:3

Iduyun se Timanem, Amay te Pengolo tadon si Jesu Cristo. Ontò kidon neidowan te Timanem, aw binegayan kidon din te kaling pedowan. Yan doen egpelimanan tadon tandà te pegkeantay i Jesu Cristo lekat te nematay.

Galasya 3:26

Na, songkani batà kaw den heman te Timanem pineokit te pegpemenal niyo ki Jesu Cristo.

Juan 17:11

Nayan, agpet a den molì doton kamno, aw eked a peg-ogpà dini te keneyonan. Meneng meg-ogpà pa dini te keneyonan se kedita te sakop ta. Amà, metòlid se kedita te eg-inangen nikaw. Peg-ipat ka kandan amon eked dan soway lekat te kebenalan tepad te kamno pegkeotawun insalig no kanak. Peg-ipat ka kandan amon megsebad dan te pedowan, iling te pegsebad te pedowan ta.

1 Juan 3:2

Menge kedowa egkedekelan ko te pedowan, batà kidon den te Timanem. Pengkey wedà tadon pa ketegahi aw eden se keilingan tadon te modi aldaw, meneng netegahan tadon te mekeiling kidon ki Cristo aw lomikò sikandin, so ontò tadon sikandin kitaen.

Juan 14:6

Minikagi si Jesus, “Siak se dalan. Siak se kebenalan. Siak se eglekatan te kaling pedowan. Eked pekedoton se otaw te Amay ko singed aw onà dan mokit kanak.

Mar. 16:19

Nayan, penga te peg-ikagi i Jesus diyà kandan, neengat sikandin doton te langit, aw nenenoo kidoen te tangkil te Timanem amon lomowan doma din.

Impekità 21:3

Doen dinineg ko timawal kidoen te onsedanan te peglowan, kagi din, “Na, meg-ogpà den se Timanem doma te otaw. Meg-ogpà doma kandan, aw meinang sakop din se kedita dan, aw sikandin se meg-ipat kandan, aw sikandin se gayed dan egseligan.

2 Korinto 6:18

Meinang a amay niyo, aw meinang kaw batà ko. Yan kinewaen ko sikiyo.” Yan se inikagi te Timanem eglowan diyà te kedita.

Roma 8:29

Gebii lekat te keteboan te keneyonan, tapay netaga-taga se Timanem aw sinu se megpesakop diyà kandin. Miglalang sikandin meg-inang kenitadon iling te Batà din si Jesus, so ibeg din meinang se kedita tadon iling te telekedowa, aw meinang si Jesus iling te kakay tadon.

Juan 17:25

E Amà, metòlid se kedita te eg-inangen nikaw. Se otaw egtaking te medaet dini te keneyonan, wedà dan ketegahi aw sinu ka, meneng netaga-taga a kamno, aw netegahan heman te menge sakop ta seini te insogò a nikaw.

Mat. 28:7

Na, kegaen kaw den doton te menge tinoledaan din, aw indani niyo dan te neantay den sikandin lekat te nematay, aw nekeonà den sikandin diyà kenyo pesalo doton te probinsya te Galiliya. Kitaen niyo sikandin doton. Yan se kagi ko kenyo.”

Mat. 12:50

Se menge otaw egtolò te ibeg te Amay ko doton te langit, yan se meinang inay ko aw menge kedowa ko meama aw bayi.”

Impekità 21:7

Doen ontong ibegay ko diyà te kedita te otaw eked dàgi te kededàtan, so siak se Timanem megtonggò kandan, aw meinang dan menge batà ko.

Menge Hebreo 8:10

Minikagi heman se Timanem, “Iling kani se kaling peokit inangen ko te menge bowad-bowad i Israel te modi aldaw. Ipeaneng-aneng ko kandan se menge punù ko amon eked dan iyan kelibeli. Iling te isolat ko se menge punù ko kidoen te pedowan dan amon meibeg dan tomolò kenyan. Penga niyan, siaken se Timanem simbahen dan, aw sikandan se otaw ipaten ko.

Juan 20:27

Penga niyan, minikagi sikandin diyà ki Tomas, “Soli se intetodò no dini. Tengtengi se belad ko. Ilami heman se kilid ko. Ikà egdowa-dowa, meneng pemenal ka kanak.”

Juan 17:5

Nayan Amà, pekitai heman kidoen te langit te melangkaw a, iling te kelangkaw ko gebii te pegdoma ko kamno te wedà pa inangi se keneyonan.

Juan 14:28

Dinineg niyo se inikagi ko gina kenyo, te agpet a den mesayo, aw lomikò a pa heman dini kenyo. Aw ontò dakel se pedowan niyo kanak, meluba kaw heman kenyan, so molì a doton te Amay ko. Sikandin se labi pa melangkaw diyà kanak.

Juan 14:2

Medita se tambì kidoen te balay eg-ogpaan te Amay ko. Simpana kenà iyan benal, eked a peden peg-indan kenyo. Meneng domoton a den amon ipetagad ko kenyo se ogpaan niyo.

Juan 13:3

Meneng si Jesus, tapay netegahan din te insalig diyà kandin se pegpengibing te kedita. Netegahan din heman te Timanem se migsogò kandin aw sikandin se olian din heman.

Juan 13:1

Te wedà pa dateng se aldaw te Pista te Pegpelowà, tapay netegahan i Jesus te agpet den se pegkesayo din lekat te keneyonan amon molì doton te Amay din. Gayed dakel se pedowan din diyà te menge tinoledaan din dini te keneyonan, aw nedekelan din dan te pedowan lamig te pegkematay din.

Juan 7:33

Minikagi si Jesus diyà te otaw netipon, “Te eked kenamay, mesayo a lekat dini, so molì a doton te simogò kanak.

Luc. 10:4

Ikà niyo egpengibing te kwarta, aw kelepì, aw sepatos ekasan niyo. Aw doen otaw kitaen niyo doton te dalan, ikà niyo egsempetanun kandan amon eked kaw keanggà.

Mat. 25:40

Tomaba a, ‘Eneng-enengi niyo se kagi ko seini. Pineokit te peg-inang niyo kenyan diyà te ontò medanà otaw egtaking kanak, ininang niyo iyan diyà kanak.’

Menge Hebreo 11:16

Meneng wedà dan olì doton, so doen ibeg dan meg-ogpà doton te ogpeanan labi pa mèpiya, sìyan ogpeanan doton te langit. Doun niyan, wedà keyàyà se Timanem te egtewalen dan sikandin Timanem dan, aw yan impetagad din den se ogpeanan dan.

Mar. 12:26

Wedà kaw ketaga-taga te metoman meantay se otaw lekat te nematay, so wedà kaw besi pegbasa te libro insolat i Moises gebii. Pegsolat din tepad te pegpekità te Timanem diyà kandin kidoen te sagbet limegdeg, minikagi se Timanem diyà kandin, ‘Siak se Timanem gayed egseligan i Abraham, aw si Isaac, aw si Jacob.’