Juan 16:33 - Manobo Sarangani

³³ Minikagi a kani diyà kenyo amon doen kelinaw te pedowan niyo tandà te pegpesakop niyo diyà kanak. Pengkey pemilangen kaw te otaw dini te keneyonan, meneng pegpekagsen kaw, so dinaeg ko se kedita te medaet dini te keneyonan.”

Juan 16:33 ပူးပေါင်းရင်းမြစ်များ

Juan 14:27

“Ibegay ko den kenyo se kelinaw te pedowan. Kenaken kelinaw se ibowang kenyo. Eked pekebegay se otaw dini te keneyonan te kelinaw te pedowan ibowang ko den kenyo. Yan ikà niyo egketetana. Ikà niyo heman egkelemitan.

1 Juan 5:4

so se kedita tadon menge batà te Timanem, mekedaeg kidon te kedita te medaet dini te keneyonan, so nekedaeg kidon den te medaet pineokit te kebenalan pinemenalan tadon.

2 Tesalonika 3:16

Ibeg day, gayed kaw begayan te Pengolo tadon te kelinaw te pedowan pengkey eden se domateng kenyo, so sikandin se eglekatan te kelinaw te pedowan. Ibeg day heman, gayed megdoma se Pengolo tadon kenyo.

1 Juan 4:4

Menge batà ko te pegpemenal, diyà kaw den te Timanem aw yan domaeg kaw te kedita dan egkeliwat te kagi kenà lekat te Timanem, so doen eg-ogpà diyà te pedowan niyo labi pa melangkaw diyà ki Satanas pengolo te medaet otaw dini te keneyonan.

Filipos 4:7

Aw yan se eg-inangen niyo, inangen te Timanem ontò melinaw se pedowan niyo igsà eked iyan kelebeti te otaw. Yan se ikelasag din te pedowan niyo aw aneng-aneng niyo tandà te pegsebad niyo ki Jesu Cristo.

1 Pedro 5:9

Salig kaw diyà te Timanem, aw ato kaw ki Satanas, so netegahan niyo te kenà olò sikiyo se egdetengan te kelimahan, meneng nelimahan heman se kedita te doma niyo egpemenal dini lanto te tanà.

Juan 14:1

Minikagi si Jesus diyà te menge tinoledaan din, “Ikà niyo egketetana. Pemenal kaw te Timanem. Pemenal kaw heman kanak.

2 Timoteo 3:12

Pemilangen pa se kedita te otaw migpesakop diyà ki Jesu Cristo aw melobos se pedowan dan tomolò te ibeg te Timanem.

Ininang 14:22

Migtoladà dan te menge otaw egpemenal, aw mig-antag dan te pedowan te menge otaw kidoen amon melobos se pegsalig dan te Timanem. Minikagi dan, “Onà kidon tomayod te kelimahan, aw penga niyan lomowan se Timanem diyà kenitadon.”

Impekità 3:21

Se kedita te otaw eked dàgi te kededàtan, yan se ipeonsad ko kidoen te tangkil ko dalem te peglowan ko, iling te peg-onsad ko kidoen te tangkil te Amay ko penga te pegdaeg ko te kedita.

Menge Hebreo 11:25

Eked sikandin keibeg tomaking te menge otaw egpengemahà te keluba pineokit te peg-inang dan te salà, so egkewedad se keluba te salà te eked kenamay. Meneng ibeg din beling makop diyà te menge sakop te Timanem amon pemilangen sikandin doma dan.

Impekità 7:14

Timaba a, “Apò, wedà ko ketegahi. Indani a.” Minikagi sikandin, “Lekat dan te ontò kelimahan. Migbugsak den dan te saol dan diyà te dipanog te Karniro amon ontò iyan megkepotì.

1 Tesalonika 3:7

Menge kedowa day, so mèpiya se dinineg day tepad kenyo, pengkey ontò kay pa egkelimahan aw egpemilangen, meneng neluba kay den tandà te pegtaking niyo te Timanem.

Impekità 12:11

Meneng dinaeg dan sikandin pineokit te dipanog te Karniro inimetayan doton te kros, aw pineokit te peg-indan te kebenalan tepad ki Cristo, so wedà dan kelemitan pengkey imetayan dan tandà te pegsalig dan diyà ki Cristo.

Kolasas 1:20

Ibeg te Timanem, pegsebaden din se kedita diyà kandin, pengkey dini te tanà aw doton te langit, aw yan se ininang din pineokit te Batà din si Jesu Cristo, so lekat te pegkematay din doton te kros, mepakay aw megsebad se otaw aw Timanem.

2 Korinto 1:3

Iduyun se Timanem, Amay te Pengolo tadon si Jesu Cristo. Lekat kandin se keido, aw sikandin heman se egtabang.

2 Korinto 13:11

Na, menge kedowa ko, keluba kaw den. Imendayi niyo se peg-ogpà niyo. Toloi niyo se impunù ko kenyo. Pegsebad kaw te pegpemenal aw pedowan niyo. Domaan kaw te Timanem eglekatan te kedakel aw kelinaw te pedowan.

1 Tesalonika 3:4

Peg-ogpà day doton kenyo kedengan, migtoladà kay kenyo te domateng se aldaw te pegpemilang kenitadon, aw netegahan niyo den te netoman den iyan.

Galasya 6:14

Meneng se kanak, eked a keibeg domuyun te kanak pegkeotawun. Sebad olò se iduyun ko, yan se Pengolo tadon si Jesu Cristo. Nematay sikandin doton te kros amon megpelowà kenitadon lekat te salà. Pineokit te pegkematay din, kenà a den egkeallang te medaet ibeg te keneyonan, aw eked a den heman keibeg taking te mekeboyo.

2 Korinto 7:4

Ontò ko sikiyo egseligan. Ontò ko sikiyo ipegduyun diyà te doma otaw. Ontò a neluba te pegdineg ko tepad kenyo. Pengkey ontò a nelimahan, meneng doen pa gayed keluba ko.

Ininang 27:25

Nayan menge doma ko, peseligi se pedowan niyo. Egsalig a te Timanem te metoman se kedita te kagi din kanak.

Galasya 1:4

Lekat te kandin ibeg, nematay si Cristo amon meabat se kedita te salà tadon, amon eked kidon taking te menge otaw eg-inang te medaet dini te keneyonan. Timolò si Cristo mig-inang kenyan, so yan se ibeg te Timanem Amay tadon.

Ininang 9:31

Penga niyan, wedad den migsamok te otaw egpemenal doton te kedita te lonsod te Judiya aw Galiliya aw Samarya. Nelobos se pedowan dan, aw timolò dan te Pengolo, aw migtabang se Espiritu Santo kandan.

Juan 12:31

Lekat seini, ipelumun te Timanem se kedita te poon din dini te keneyonan. Dàgen din heman se pengolo te medaet dini te keneyonan si Satanas.

Luc. 2:14

“Iduyun tadon den se Timanem doton diatas te langit. Begayan din te kelinaw te pedowan se otaw egkelubahan din dini te tanà.”

Ininang 27:22

Na, mikagi a diyà kenyo, peseligi se pedowan niyo, so wedad otaw melemes, meneng olò pangkò se kebàtan.

Luc. 19:38

Migpegais dan, “Iduyun se Selotan seini insogò te Pengolo tadon Timanem. Begayan kidon din te kelinaw te pedowan lekat te langit. Iduyun den se Timanem.”

Ininang 23:11

Tengà te delem, migpekità se Pengolo diyà ki Pablo aw minikagi, “Ikà egkelemitan. Mig-indan ka den tepad kanak dini te Jerusalem. Meg-indan ka pa heman doton te Roma.”

Menge Hebreo 7:2

Si Melkisedec heman se binegayan i Abraham te ikesempolò ketengà te kedita neabat din. Se kedegdagan te ngadan i Melkisedec, yan se kagi metòlid. Yan tewalen sikandin “Selotan Eglowan te Metòlid.” Doen heman kedegdagan te kagi Salem, yan se kagi kelinaw. Yan tewalen heman sikandin “Selotan te Kelinaw.”

Juan 16:11

Ipetaga-taga din heman te metoman dan ipelumun te Timanem, so dinaeg se pengolo te medaet dini te keneyonan.

Mat. 9:2

Wedà kenamay, dimateng se otaw neningga te otaw kenà egpekeiwal. Pegkità i Jesus te ontò dan simalig diyà kandin, minikagi sikandin diyà te otaw kenà egpekeiwal, “Elew, peseligi se pedowan no, so pigwedad den se salà nikaw.”

2 Korinto 2:14

Meneng ontò a egpesiontong diyà te Timanem, so sikandin se nenalo kenitadon, aw impetaking kidon din te ibeg din, aw impeakop kidon din diyà ki Cristo. Insalig te Timanem diyà kenitadon se kebenalan tepad ki Cristo amon ipetaga-taga tadon iyan diyà te kedita te otaw, so mèpiya se kebenalan tepad ki Cristo, iling te sebad metinadeg keedekan pengkey kenan.

2 Korinto 4:7

Iling a te koden wedad keelagà sinolan te bolawan meelagà, so pengkey wedad keelagà ko, meneng insalig te Timanem kanak se pegtoladà te kebenalan tepad ki Cristo amon ketegahan te menge otaw te sikandin se eglekatan te tolos. Kenà iyan lekat kanak.

2 Korinto 6:4

Pengkey eden se inangen ko, ipekità ko te metòlid se keogpà ko, so keilangan metòlid se eg-inangen te menge otaw insogò te Timanem. Impekità ko den iyan pineokit te pegtayod ko te menge kelimahan.

1 Juan 2:13

Menge obanen, simolat a den kenyo so ibeg ko megpeaneng-aneng a kenyo te egtaking kaw den ki Cristo tapay doen gebii te wedad pa keneyonan. Menge kaling otaw, simolat a den kenyo so ibeg ko megpeaneng-aneng a kenyo te dimaeg kaw den ki Satanas. Menge batà ko te pegpemenal, simolat a kenyo so ibeg ko megpeaneng-aneng a kenyo te egtaking kaw den diyà te Timanem Amay.