Juan 15:4 - Manobo Sarangani

⁴ Keilangan meg-ogpà kaw diyà kanak aw meg-ogpà a heman diyà kenyo, so eked pongo se belagen singed aw meg-ogpà diyà te pinonoan. Iling kaw heman kenyan, so wedad ontong niyo singed aw meg-ogpà kaw diyà kanak.

Juan 15:4 ပူးပေါင်းရင်းမြစ်များ

Mat. 12:33

“Aw mèpiya se kayo, mèpiya heman se pongo niyan. Aw medaet se kayo, medaet heman se pongo niyan. Aw kitaen niyo se pongo te kayo, ketegahan niyo aw eden kemoloi se kayo sìyan.

Luc. 8:15

Meneng se benì nesabog diyà te melambò tanà, yan se iling te otaw ontò melobos se pedowan dan. Aw domineg dan te kagi te Timanem, ontò dan iyan egtoloen. Egtayod dan te kelimahan lamig doen ontong dan.”

Juan 14:20

Aw domateng se aldaw sìyan, ontò niyo ketegahan te diyà a te Amay ko, aw diyà kaw kanak, aw diyà a kenyo.

Juan 17:23

so diyà a kandan aw diyà ka kanak. Ibeg ko, ontò dan megsebad te pedowan amon ketegahan te kedita te otaw dini te keneyonan te sikona se simogò kanak, aw dakel se pedowan no kandan iling te kedakel te pedowan no kanak.

Juan 6:56

Se otaw komaen te onod ko aw minem te dipanog ko, yan se eg-ogpà diyà kanak, aw siak diyà kandin.

Juan 8:31

Minikagi si Jesus diyà te menge Judiyo nemenal kandin, “Aw ebey kaw tomolò te itoladà ko, meinang kaw ontò tinoledaan ko.

Ininang 11:23

Mèpiya otaw si Bernabe aw simalig diyà te Pengolo aw egbeyà-beyaan heman te Espiritu Santo. Pegdateng din doton te Antyokya, neluba sikandin so kinità din te ontò dan tinebangan te Timanem. Migtoladà sikandin kandan te eked pegdowa-dowa se aneng-aneng dan, aw lobosen dan se pedowan diyà te Pengolo. Pegdineg dan te kagi din, medita se otaw nemenal diyà te Pengolo.

Ininang 14:22

Migtoladà dan te menge otaw egpemenal, aw mig-antag dan te pedowan te menge otaw kidoen amon melobos se pegsalig dan te Timanem. Minikagi dan, “Onà kidon tomayod te kelimahan, aw penga niyan lomowan se Timanem diyà kenitadon.”

2 Korinto 13:5

Ontò niyo eneng-enengi. Sikiyo se keilangan meg-ahà te kenyo pegkeotawun aw lulub kaw ki Cristo. Mèpiya aw lobosen niyo se pegpemenal ki Cristo. Eneng-enengi niyo ini te kenà metòlid se otaw diyà te Timanem singed aw eg-ogpà si Jesu Cristo diyà kandin.

Galasya 2:20

Pegpemenal ko ki Cristo, iling te nematay a doma kandin kidoen te kros. Lekat niyan, kenà kenaken ibeg se egbayà-bayà kanak, meneng si Cristo se egbayà-bayà kanak so eg-ogpaan a din. Dalem pa te peg-ogpà ko dini te keneyonan, megpesakop a diyà te Batà te Timanem egseligan ko. Dakel se pedowan din kanak aw yan nematay sikandin simelilin kanak.

Efeso 3:17

Egpemoyò a diyà te Timanem te gayed meg-ogpà si Cristo diyà te pedowan niyo tandà te pegpemenal niyo kandin. Egpemoyò a heman diyà kandin amon labi pa megkedakel se pedowan niyo diyà te Timanem aw diyà te doma otaw.

Filipos 1:11

Ibeg ko, olò metòlid se inangen niyo pineokit te tabang i Jesu Cristo kenyo. Yan ipelangkaw aw iduyun se Timanem.

Kolasas 1:23

Meneng keilangan gayed kaw somalig diyà ki Jesu Cristo, aw keilangan lobosen niyo se pegpemenal niyo kandin. Ikà niyo egsoway lekat te kagi te Timanem pinemenalan niyo tepad ki Cristo, so doen den egpelimanan niyo. Yan se Mèpiya Indan intoladà den diyà te menge otaw doton te kebelad te keneyonan, aw yan heman se ipegtoladà ko.

Kolasas 1:27

so ibeg din ipetaga-taga din diyà kenitadon te ontò mèpiya se kebenalan seini. Ipetaga-taga din iyan heman doton te menge otaw kenà Judiyo. Seini se kebenalan sìyan wedà din petega-tegahi kedengan, te isogò din si Jesu Cristo meg-ogpà kidoen te kenyo pedowan, aw yan se doun te netegahan niyo te doen kèpiyaan pelimanan niyo doton te langit.

Kolasas 2:6

Pegpemenal niyo ki Jesu Cristo, neinang sikandin Pengolo niyo, aw yan keilangan tomaking kaw kandin te kelikit te aldaw.

1 Tesalonika 3:5

Yan se doun te insogò ko si Timoteo doton kenyo. So ontò a dimela kenyo, insogò ko sikandin amon metaga-taga a tepad te pegtaking niyo te Timanem, so netetana a aw neekalan kaw i Satanas, aw yan nebàtan besi se nebatog day doton kenyo.

Menge Hebreo 10:39

Meneng menge kedowa ko, kenà kidon iling te sìyan telawun pegbàtan te Timanem, so melobos se pegsalig tadon diyà kandin, aw yan eked kidon din pegbàti.

1 Juan 2:6

Aw eg-ikagi se otaw te diyà sikandin te Timanem, keilangan inangen din se kandin pegkeotawun iling te pegkeotawun i Jesu Cristo.

2 Juan 1:9

Aw somoway se otaw lekat te kebenalan intoladà i Jesu Cristo, aw isogpat din se kebolalaw diyà te kebenalan, wedad Timanem kidoen kandin. Meneng aw ontò egsalig se otaw diyà te kebenalan intoladà i Jesu Cristo, kidoen kandin se Timanem Amay aw Batà.